تۆپبارانکردنی ناوچە سنوورییەکانی کوردستان لەلایەن سپای پاسدارانەوە
دوشەممە ۰۴-۰۷-۱۴۰۱ | 26-09-2022
هاوکات لەگەڵ ئاخێزە جەماوەریەکان لە ئێران و کوردستان سپای پاسدارانی کۆماری ئیسلامی ناوچە سنوورییەکانی نێوان باشوور و ڕۆژهەڵاتی کوردستانی تۆپباران کرد.
ڕۆژی یەکشەممە ٣ی ڕەزبەر، سپای پاسداران ناوچە شاخاوی و سنوورییەکانی نێوان باشوور و ڕۆژهەڵاتی کوردستانی تۆپباران کرد و خەسار و زیانێکی زۆری بە باخ و ڕەزی گوندنشینانی هەرێمی کوردستان گەیاند، ئەو کردەوە تێکدەرانەی سپای پاسدارانی کۆماری ئیسلامی لە کاتێک‌دایە کە لە کوردستان و ئێران خەڵکی وەزاڵەهاتوو یەکگرتووانە دژی ڕژیم ڕژاونەتە سەر شەقامەکان و خوازیاری نەمانی ڕژیمی کۆماری ئیسلامین.