بەپێی ڕاپۆرتەکان، سەرەتای مانگی ڕەزبەری ئەمساڵ، “ئایهان ئیبراهیمی عەلیکانی” تەمەن ٢٨ ساڵ، لەلایەن لقی ٣ی دادگای ورمێ بە تۆمەتی “ئەندامێتی لە گرووپە ئۆپۆزیسیۆنەکانی ڕژیم” بە ٦ ساڵ زیندان مەحکووم کراوە.
شایانی باسە، ئایهان ئیبراهیمی عەلیکانی بە بەکارهێنانی هەشتەگی “ژن، ژیان، ئازادی” تۆمەتبار کراوە، . ئەمە لەحاڵێکدایە، دامەزراوە ئەمنییەکانی کۆماری ئیسلامیی لە بەرامبەر هەر زانیارییەک سەبارەت بە گرتن و دادگایی کردنی کوڕەکەیان هەڕەشەیان لە بنەماڵەی ئەم هاووڵاتییە کردووە. جێگای ئاماژەیە، ئایهان ئیبراهیمی عەلیکانی کاتژمێر ٣ی بەرەبەیانی ڕۆژی دووشەممە ١٨ی پووشپەڕ، لە ماڵی باوکی لە ورمێ بە بەکارهێنانی توندوتیژییەوە دەستبەسەر و تائێستا هەواڵی دەستبەسەرکرانی لە میدیاکان بڵاونەکرابووەوە. ئایهان ئیبراهیمی عەلیکانی دوای ١٠ ڕۆژ لە دەستبەسەرگەی ئیدارەی ئیتلاعاتەوە بۆ بەندی ئەمنییەتی زیندانی ناوەندیی شاری ورمێ گواسترابوویەوە و دواتر بە دانانی بارمتەی دوو ملیارد تمەنی، بەشێوەی کاتی لە زیندان ئازاد کرابوو.