ڕۆژی یەکشەممە، ٢١ی جۆزەردان، شەش هاووڵاتیی لاوی خەڵکی شاری “سەراوەڵە”ی سەر بە پارێزگای ئیلام، بە ناوەکانی “یوونس گەڕاوەند، مێهرداد قەیسەربەیگی تەمەن ٣٤ ساڵ، ئەیووب گەڕاوەند تەمەن ٣٦ ساڵ، نەوید محەممەدنەژاد تەمەن ١٧ ساڵ و ڕاهێنەری وەرزشی بواری ڤۆشۆ، محەممەد تەهماسبی، تەمەن ٣٦ ساڵ و مامۆستای قوتابخانە و حامید ڕەحمانی، تەمەن ٢٣ ساڵ و شۆفێری تاکسی”، لە لایەن هێزەکانی ڕژیمەوە ڕفێندران.
بە زانیارییەکان، ئەو شەش هاووڵاتییەی شاری سەراوەڵە، دوای ئەوەی کە لەلایەن هێزە حکوومەتییەکانەوە دەستبەسەر کراون، بۆ دەستبەسەرگەی ناوەندیی شاری ئیلام گواستراونەتەوە. جێگەی ئاماژەیە، پێشتریش مێهرداد قەیسەربەیگی و ئەیووب گەڕاوەندی، لە مانگی خەزەڵوەری پارەکەدا لە ڕەوتی ناڕەزایەتییە جەماوەرییەکانی شاری سەراوڵە لە لایەن هێزە حکوومەتییەکانەوە جارێکی دیکە دەستبەسەر کرابوون. تا کاتی داڕشتنی ئەم هەواڵە، هیچ زانیارییەک لەسەر ئەو تۆمەتانەی دراونەتە پاڵ ئەم ٦ هاووڵاتییە و هەروەها باری تەندروستیان دوای دەستبەسەربوونیان لەلایەن هێزە حکوومەتییەکانەوە، لە بەردەستدا نییە. هەروەها ڕۆژی یەکشەممە ٢١ی جۆزەردان، “دانا قوربانی” تەمەن ١٩ ساڵ و خەڵکی کامیاران، لە دوکانەکەی خۆی هەڵکەوتوو لە فازی چواری ئەمشارە، لە لایەن هێزەکانی ڕژیمەوە ڕفێندرا. شایانی باسە هێزەکانی ڕژیم بە سێ ئۆتۆمبێلەوە هەڵیان کوتاوەتە سەر دووکانی دانا قوربانی و بەشێوەیەکی توندوتیژانە ئەم لاوەیان ڕفاندووە.