ڕۆژی چوارشەممە ٢٩ی ڕەشەممە، ئەنوەر ئیبراهیمی، تەمەن ٣٧ ساڵ و خەڵكی گوندی “كۆنە لاجان”ی سەر بە پیرانشار بە دانانی بارمتەی پێنج میلیاری و بە شێوەی كاتی تا كاتیی كۆتاییهاتنی دادگاییەكەی لە زیندانی ناوەندیی نەغەدە ئازاد كرا.
شایانی باسە، ناوبراو لە ماوەی دەستبەسەر كرانیدا لە مافی دەستپێڕاگەیشتن بە پارێزەر بێبەش بووە و لە لایەن ناوەندە ئەمنییەكانەوە بە هاوكاری لەگەڵ یەکێک لە حیزبە كوردستانییەكانی دژی حكوومەت تۆمەتبار كراوە. ئەم هاووڵاتییە سەر لە بەیانی ڕۆژی دووشەممە ١ی ڕێبەندان، لە لایەن هێزەكانی ئێدارەی ئیتلاعات لە ماڵەكەی خۆی و بە بەكارهێنانی توندوتیژی دەستبەسەر و بۆ یەكێك لە دەستبەسەرگەكانی ئیتلاعات لە ورمێ گواسترابوویەوە. هەروەها ڕۆژی پێنجشەممە ٣٠ی ڕەشەممە، ئارەزوو جەلیل زادە، تەمەن ٤٦ ساڵ و مامۆستای قوتابخانەکانی سەردەشت، بە دانانی بارمتە و بە شێوەی کاتی تا کۆتایی دانیشتنی دادگا لە زیندانی ناوەندیی ورمێ ئازاد کرا. ئارەزوو جەلیل زادە ڕۆژی دووشەممە ١٣ی ڕەشەممە لەلایەن هێزەکانی ئیدارەی ئیتلاعات دەستبەسەر و بۆ یەکێک لە دەستبەسەرگەکانی ئیتلاعاتی ورمێ گواسترابوویەوە.