ڕۆژی چوارشەممە ۲۹ی ڕەشەممە، “سۆما محەممەدڕەزایی” چالاکی مەدەنی تەمەن ۳۸ ساڵی خەڵکی شاری سنە، پاش ۹ ڕۆژ دەستبەسەربوون، بەدانانی بارمتەی یەک ملیارد تمەنی و بەشێوەی کاتی لە زیندانی ناوەندیی ئەمشارە ئازاد کرا.
سۆما محەممەدڕەزایی ئێوارەی ڕۆژی ۲۰ی ڕەشەممە، لە شوێنی کارەکەی خۆی لە “مۆڵی ئەڵماس”ی سنە دەستبەسەر کرا. هێزەکانی ئیدارەی ئیتلاعات ئەو چالاکە مەدەنییەیان لە پەیوەندی لەگەڵ بەشداریکردن و ئامادەبوونی ناوبراو لە بەڕێوەچوونی ڕێوڕەسمی تایبەت بە ڕۆژی جیهانی ژنان لە سنە دەستبەسەر کردبوو.
هاوڕێ لەگەڵ ناوبراو، سێ چالاکی دیکە لەو پەیوەندییەدا دەستبەسەر کرابوون کە تا ئێستا سۆهەیلا موتاعی، چالاکی بواری ژنانی خەڵکی دێگوڵان بەشێوەی کاتی ئازاد کراوە و باران ساعیدی و لەیلا پاشایی لە دەستبەسەرگەدا ڕاگیراون. لە لایەکی دیکەوە، سۆران محەممەدپوور و مووسا ڕەسووڵی، دوو هاووڵاتیی خەڵکی شاری پیرانشار کە بە بەکارھێنانی توندوتیژییەوە دەستبەسەر کرابوون، پاش نزیکەی سێ مانگ دەستبەسەربوون بەدانانی بارمتەی سێ ملیارد تمەنی و بەشێوەی کاتی لە زیندان ئازاد کراون.