Komala

مەهدی نەورۆزی و ئارام ساڵح پوور دوو هاووڵاتیی دەستبەسەرکراوی خەڵکی بانە ڕۆژی سێشەممە ١٥ی خەرمانان، دوای نزیکەی دوو مانگ دەستبەسەر کران بە دانانی بارمتەی ٣٠٠ ملیۆن تمەنی و بەشێوەی کاتی لە دەستبەسەرگەی ئیتلاعاتی سنە ئازاد کران.
مەهدی نەورۆزی و ئارام ساڵح پوور لە ماوەی ئەو ڕۆژانەی کە دەستبەسەر بوون لە مافی هەبوونی پارێزەر و هەروەها چاوپێکەوتن لەگەڵ بنەماڵەکانیان بێبەش کراون.
مەهدی نەورۆزی و ئارام ساڵح پوور ڕۆژی دووشەممە ٢٠ی پووشپەڕی ئەمساڵ هاوڕێ لەگەڵ ٦ هاووڵاتیی دیکەی خەڵکی بانە بە ناوەکانی محەممەد مەحموودزادە، هادی مەحموودی، ڕەحمان ساڵح پوور، محەممەد قەوسی، زانا مێهری و جەعفەر زەریفی، لەلایەن هێزەکانی ئیدارەی ئیتلاعاتی بانە دەستبەسەر کران کە شەش کەسەیان پێشتر بە بارمتە ئازاد کرابوون.