سەرلەبەیانی ڕۆژی چوارشەممە ٨ی ڕەشەممە، حوکمی ئێعدامی “بێهروز سەفەری قەڵا زنجیری” تەمەن ٣٤ ساڵ و خەڵکی گوندی قەڵازنجیر سەر بە شاری داڵەهۆی کرماشان لە زیندانی دیزڵئاوا جێبەجێ کرا.
بە وتەی سەرچاوەیەکی ئاگادار، ئەم بەندکراوە ٤ ساڵ لەمەوبەر بە تۆمەتی “کوشتنی بەئەنقەست” دەستبەسەر و لە کۆتاییدا لەلایەن دەزگای دادوەری کۆماری ئیسلامی بە ئێعدام مەحکووم کرابوو. هاوکات، حوکمی ئێعدامی بەندکراوێک بە ناوی “عەلیڕەزا بەساتی نیا” تەمەن ٢٣ ساڵ خەڵکی ئیلام و دانیشتووی تاران، لە زیندانیی قزڵحساری کەرەج جێبەجێ کراوە. شایانی باسە، ناوبراو سێ ساڵ لەمەوبەر بە هەمان تۆمەت دەستبەسەر و دواتر بە ئێعدام مەحکووم کرابوو. هەر لەم پێوەندەدا، سەرلە بەیانی چوارشەممە ٨ی ڕەشەممە، حوکمی ئێعدامی بەندکراوێک بە ناوی “عەبدوڵڵا سەفەرزهی” کە پێنج ساڵ لەمەوبەر بە تۆمەتی “تاوانەکانی پەیوەندیدار بە مادە هۆشبەرەکان دەستبەسەر کرابوو، لە زیندانی بیرجەند جێبەجێ کراوە. لە لایەکی دیکەوە، حوکمی ئێعدامی “مستەفا هەژیرپیروز” تەمەن ٤٠ ساڵ و خەڵکی “ئەسەدئاوا”ی کرماشان، کە پێنج ساڵ لەمەوبەر بە هەمان تۆئمەت دەستبەسەر کرابوو، لە زیندانی قزڵحیساری کەرەج جێبەجێ کرا.