بریندار بوونی دوو سووتەمەنیبەری بەلووچ بە تەقەی ڕاستەوخۆی هێزەکانی ڕژیم
یەکشەممە ۱۳-۰۱-۱۴۰۲ | 02-04-2023
ڕۆژی شەممە ١١ی خاکەلێوە، دوای ئەوەی هێزە نیزامییەکانی کۆماری ئیسلامی لە ناوچەی “پیردان”ی سەر بە شاری سەرباز لە پارێزگای سیستان و بەلووچستان تەقەیان لە سووتەمەنیبەرەکانی بەلووچ کرد، دوو سووتەمەنیبەر بە سەختی بریندار بوون.
بەپێی ڕاپۆرتەکان، هێزە سەربازییەکان ویستوویانە دەست بەسەر ئۆتۆمبێلی هەڵگری تانکەرەکانی سووتەمەنیدا بگرن کە لە لایەن سووتەمەنیبەرەکانەوە پێشیان پێگیراوە و ئەم هێزانە بۆ بڵاوە پێکردن بە هاووڵاتییان دەستیان کردووە بە تەقە کردن لە خەڵک. شایانی باسە، دوای ئەم تەقەکردنە هێزەکانی ڕژیم دەستیان بەسەر ئۆتۆمبێلی تانکەرە سووتەمەنییەکاندا گرتووە و لەگەڵ خۆیان بردوویانە.