پەرەسەندنی هێرشەکانی دەوڵەتی ئیسرائیل بۆسەر لۆبنان و حوسییەکان و هەڕەشەکانی لەدژی کۆماری ئیسلامی لەماوەی ڕۆژانی ڕابردوو، نیشانەی ئەوەیە کە ئیسرائیل هەروا لەسەر سیاسەتی شەڕخوازیی خۆی بۆ ڕاکێشانی حیزبوڵڵا و کۆماری ئیسلامی بۆ ناو شەڕێکی گشتگیر لە ناوچەکە بەردەوامە. دەتوانین بڵێین کە ئیسرائیل بە هێرشە نیزامییەکانی خۆی لەماوەی دوو حەفتەی ڕابردوو دژبە حیزبوڵڵا بەشێک لەم سیاسەتەی وەدیهێناوە. ئیسرائیل بە هێرشی چاوەڕواننەکراوی تەقاندنەوەی پەیجەر و بێسیمەکانی ڕێبەران و بەرپرسانی حیزبوڵڵا بێجگە لە کوشتنی دەیان کەس و بریندار کردنی زیاتر لە سێ هەزار کەس لە ڕێبەران و بەرپرسانی حیزبوڵڵا، توانیی پەیوەندیی ناوەوە و دەرەوەی حیزبوڵڵاش لەم بارودۆخە هەستارەدا بپچڕێنێت. سەرکەوتنی ئەم عەمەلیاتانە بووەتە هاندەری دەوڵەتی نەتانیاهۆ بۆ درێژەدان و پەرەپێدانی شەڕ و کوشتار.
بەڵام بەردەوامبوون و پەرەستاندنی شەڕی ئیسرائیل دژی حیزبوڵڵا هاوکات لەگەڵ درێژەی جینوسایدی خەڵکی فەلەستین لە غەززە و هێرش بۆسەر حوسییەکان و هەوڵ بۆ ڕاکێشانی کۆماری ئیسلامی بۆ ناو شەڕی ڕاستەوخۆ، بە بێ یارمەتی و هاوکاری و پشتیوانیی هەمەلایەنەی ئەمریکا و دەوڵەتە هاوپەیمانەکانی لە ناوچەکە مومکین نابێت. هەفتەی ڕابردوو لە گەرمی شەڕی ئیسرائیل دژی حیزبوڵڵا، ئەمریکا ڕەزامەندیی خۆی سەبارەت بە پێدانی بەستەی یارمەتیی نیزامیی ٨ ملیارد و ٧٠٠ ملیۆن دۆلاری بە ئیسرائیل ڕاگەیاند. جگە لەوە بایدن فەرمانی بە وەزارەتی بەرگری و پێنتاگۆن دا بنکە نیزامییەکانی ئەمریکا لە ناوچەکە بەهێز بکەن بۆ ئەوەی لە ئەگەری دەستتێوەردانی نیزامیی کۆماری ئیسلامی دژبە ئیسرائیل ڕێگری بکرێت.
ناردنی نوێنترین مۆدێلی بۆمبی سەنگەرشکێنی “جی بی یو ٢٨”ی ئەمریکا بۆ ئیسرائیل کە بووە هۆی کوژرانی حەسەن نەسڕوڵڵا ڕێبەری حیزبوڵڵا لە ژێرزەمینی مەقەڕی سەرەکیی ئەم حیزبە لە ناوچەی “زاحیە” لە بەیروت، یەکێک لەو ئیمکاناتەیە کە ئەمریکا بۆ پشتیوانی لە ئیسرائیل خستوویەتە ئیختیارییەوە. لەم عەمەلیاتەدا کە ڕۆژی شەممە ٧ی مانگی ڕەزبەر بە هاوکاریی دەست و پەیوەندە سیخوڕییەکانی ئیسرائیل لە ناو حیزبوڵڵا ئەنجام درا، ١٥ کەسی دیکە لە ڕێبەران و فەرماندەکانی حیزبوڵڵا و سپای پاسداران، لەوانە عەباس نیلفروشان جێگری عەمەلیاتی گشتی سپای پاسداران و عەلی کەرکی فەرماندەی بەرەی سەرەکیی شەڕی حیزبوڵڵاش کوژران و زیاتر لە ٩٠ کەسی تر لە کادرە سەرەکییەکانی حیزبوڵڵا برینداربوون. عەمەلیاتە نیزامییەکانی ئیسرائیل دژبە حیزبوڵڵای لۆبنان و حوسییەکانی یەمەن و پایەگاکانی کۆماری ئیسلامی لە سووریە، ڕۆژی یەکشەممە هەروا درێژەی بوو و ئەرتەشی ئیسرائیل ڕایگەیاند کە لە هێرشی ئاسمانی بۆسەر باشوور و ناوەند و ڕۆژهەڵاتی لۆبنان، دەیان بنکەی نیزامیی حیزبوڵڵای بۆمباران کردووە.
کۆماری ئیسلامی لەم ماوەیەدا نەتەنیا نەیتوانیوە کاردانەوە و وڵامێک بەم شەڕ و کوشتارەی ئیسرائیل لەدژی حیزبوڵڵا، واتە باسکی سیاسی و نیزامیی خۆی لە لۆبنان بداتەوە، بەڵکوو هەڵوێست و تەبلیغاتی هەڕەشەئامێزی نیزامیشی کەمتر کردووەتەوە و بەتەواوی کەوتووەتە حاڵەتی دیفاعییەوە. خامنەیی و بەرپرسانی دیکەی ڕژیم و فەرماندەکانی سپای پاسداران ئەمجارە تەنانەت باس لە تۆڵەکردنەوەش ناکەن. حسێن سەلامی فەرماندەی سپای پاسدارانی ڕژیمی ئیسلامی کە پێشتر دروشمی توند و هەڕشەئامێز و بێناوەرۆکی تۆڵەکردنەوە لە ئیسرائیل و ئەمریکای دەکوتەوە، سەبارەت بە کوژرانی سەرتیپ عەباس نیلفروشان جێگری عەمەلیاتی گشتی سپای پاسداران، لە هەڵوێستێکی لاوازدا مەرگی ئەوی لە پەنا حەسەن نەسروڵڵا بە “فەزیلەت” و باشترین چارەنووس وەسف کرد و وتی: “کوژرانی ئەوان ئاڵوگۆڕی مێژوویی لە جیهانی ئیسلامدا پێکدەهێنێت”. لە هەمان حاڵدا هەواڵنێریی ڕوویتێرز ڕۆژی یەکشەممە ٨ی مانگی ڕەزبەر ڕایگەیاند کە: “دوای کوژرانی حەسەن نەسڕوڵڵا بەهۆی نیگەرانی دەزگا ئەمنییەکانی کۆماری ئیسلامی لە دووپات بوونەوەی وەها عەمەلیاتێک لەناو ئێران، عەلی خامنەیی بۆ شوێنێکی نهێنی و ئەمن ڕاگوێزراوە. ئەم ترس و نیگەرانییەی ڕێبەرانی کۆماری ئیسلامی لە کاتێکدایە کە زۆرێک لە شرۆڤەکارانی سیاسی لەو باوەڕەدا بوون کە هێرشی ئیسرائیل بۆسەر حیزبوڵڵای دەستسازی کۆماری ئیسلامی، کاردانەوەی توندی نیزامیی ڕژیم و تەنانەت شەڕی ڕاستەوخۆ لەگەڵ ئیسرائیلی لێدەکەوێتەوە.
ئەم بارودۆخە سیاسەتە ناوچەییەکانی کۆماری ئیسلامیی بەتەواو مانا خستووەتە ژێر پرسیارەوە. لەلایەکەوە درێژەی ئەم سیاسەتانە کرێکاران و خەڵکی ستەمدیدەی ئێران لەگەڵ مەترسیی داگیرسانی شەڕێکی نەخوازراو ڕووبەڕوو دەکاتەوە کە کوشتار و وێرانی و ئاوارەیی زیاتری ئەوانی لێدەکەوێتەوە. لەلایەکی دیکەوە نیشانی دا کە “ستراتێژی هێرشی بەرگرانەی ڕژیم” واتە شەڕی خۆپارێزی، کە کۆماری ئیسلامی لەماوەی چوار دەیەی ڕابردوودا لەڕێگەی بەفیڕۆدانی میلیاردها دۆلار لە سفرەی جەماوەری کرێکار و زەحمەتکێش و بە داسەپاندنی هەژاری و فەلاکەت و نائەمنی بەڕێوەیبردووە، شکستی خواردووە. ئەم سیاسەتە جەنایەتکارانەیە جگە لە هەزینەی بەرینی ماڵی، بووەتە هۆی کوشتاری سەدان هەزار کەس لە خەڵکی عێراق، سووریە، لۆبنان، یەمەن، فەلەستین و بە کوشتدانی هەزاران کەس لە خەڵکی ئێران، ئەفغانستان و شوێنەکانی تر. هەڵبەت تووڕەیی و بێزاریی ملیۆنان کەس لە خەڵکی ئەم وڵاتانەی لە حکوومەتی ئیسلامیش لێکەوتووەتەوە. چونکە شەڕی جەنایەتکارانەی ئیسرائیل بەدژی حیزبوڵڵای لۆبنان و خەڵکی فەلەستین نیشانی دا کە کۆماری ئیسلامی نەتەنیا داکۆکیکاری خەڵکی لۆبنان و فەلەستین نەبووە، بەڵکوو ئەوانی بۆ بەرەوپێشبردنی سیاسەتەکانی و بۆ درێژەی دەسەڵاتی نگریسی خۆی بەکار هێناوە و کەڵکی لێوەرگرتوون. ئەم ستراتێژییە نەزانانەیەی حکوومەتی ئیسلامی لە هەمان کاتدا بووەتە هۆی ئەوەیکە ناوچەی ڕۆژهەڵاتی ناوەڕاست ببێتە جبەخانەی چەکی ئەمریکا و باقیی دەسەڵاتەکانی سەرمایەداری. هەتا کاتێک ئیمکانی بەکارهێنانی ئەم چەکانە لەلایەن دەوڵەتەکانەوە دژبە خەڵکی ناوچەکە و لەپێناوی بەرژوەند و قازانجی خۆیان بوونی هەبێت، کوشتار و وێرانی و ئاوارەیی خەڵک زیاتر پەرەدەستێنێت و ژینگەی ئەم ناوچەیەش زیاتر وێران دەبێت.
زاڵبوون بەسەر مەترسییەکانی شەڕی دەوڵەتی ڕەگەزپەرست و فاشیستی ئیسرائیل و ڕزگاربوون لە کارەسات و مەترسییەکانی سیاسەتی فراوانخوازی و دەستێوەردانی کۆماری ئیسلامی لە ژێر ناوی “ستراتێژی بەرگرانە” تەنیا بە هێزی هاوپشتی و سەرتاسەریی جەماوەری کرێکار و زەحمەتکێش لە ئێران دەستەبەر دەبێت. چینی کرێکاری یەکگرتوو و ڕێکخراوی ئێران دەتوانێ بە ڕووخاندنی شۆڕشگێڕانەی کۆماری ئیسلامی، ڕۆڵ و ئەرکی خۆی لەم بوارە گرینگەدا بەجێ بێنێت و خەڵکی ئێران و ناوچەکەش لە چنگ کۆماری ئیسلامی ڕزگار بکات.