ئەمانە تەنیا بەشێک لەو دروشمانە بوون کە ڕۆژی هەینی شەشی مانگی خەزەڵوەر لاوانی مەهاباد لەناو بڵێسەکانی ئاگر کە لەسەر شەقامەکان دایانگیرساندبوو، هاواریان دەکرد. ئەم دروشمانە ئەگەر جەماوەری بنەوە هاوکات لەگەڵ دروشمەکانی “مەرگ بۆ دیکتاتۆر”، “مەرگ بۆ خامنەیی” و “ژن، ژیان، ئازادی” دەتوانن ئاسۆیەکی ڕوون لەبەردەم ئەم ئاخێزە شۆڕشگێڕانەیە دابنێن. سەمای ناو بڵێسەکانی ئاگر نیشانەی ڕوونی تووڕەیی خرۆشاوی جەماوەرێکە کە ئێستا زیاتر لە چل ڕۆژە، بەردەوام لە زۆرێک لە شارەکانی ئێران دێنە سەر شەقام. بوێری و قارەمانیەتیی ژنان و پیاوانی ئازادیخواز جێگای ستایشە. ئەوان لە بەرامبەر یەکێک لە دڕندەترین ڕێژیمەکانی جیهاندا ڕاوەستاون و بە سەرکەشییەوە دروشمی مەرگ و نەمان بۆ دیکتاتۆر هاوار دەکەن. ئەوان تەنانەت لە پرسەی ئازیزانیاندا ڕایدەگەیەنن “هەر یەک کەس بکوژرێ، هەزار کەس لە پشتێتی”. ڕایدەگەیەنن کە: خوێندکاران و لاوانی شۆڕشگێڕ ماتەمین بۆ گیان بەختکردووانیان ناگرن، ڕێگاکەیان درێژە دەدەن. ئەوان بەو باوەڕە گەیشتوون کە باشترین ڕێگای ڕێزگرتن لە گیان بەختکردووانی ئاخێزی ژینا نەک ماتەمین گرتن، بەڵکوو درێژەدانی ڕێگایانە.
شارەکانی ئێران لە دەستپێکی حەوتەمین حەفتەی ئاخێزی شۆڕشگێڕانەی ژینادا، هەروا مەیدانی ژنان و پیاوانی ئازادیخواز، خوێندکاران و بنەماڵەی گیان بەختکردووانن. لە زۆرێک لە شارەکان سەنگەر درووست کرا. لە شارەکانی مەهاباد و قەسری شیرین بۆ بەرەنگاربوونەوە لەگەڵ هێرشی هێزە سەرکوتگەرەکان، فەرماندارییەکانیان ئاگر تێبەردان. لە تاران پایەگای سپای پاسداران لە شەقامی پیروزی ئاگری تێبەردرا و لەسەر دیوارەکانی دروشمی “مەرگ بۆ ستەمگەر، چ شا بێت و چ ڕێبەر”، “ژن، ژیان، ئازادی، ئیدارەی شۆرایی” نووسرا. خەڵک لە ڕەشت هێزە سەرکوتگەرەکانیان لەناو شادی و خۆشیدا ڕاونا. لە ئەهواز خۆپیشاندەران لە پارکی ساحلی کۆبوونەوەی ناڕەزایەتی و ئاگریان بەرپا کرد و ناویان نا ئاگری ڕاپەڕین. زۆرێک لە شەقامەکانی سنە شەوانە بەدەست لاوانەوەن. هێرشی هێزە سەرکوتگەرەکانی ڕێژیم بۆسەر خابگای خوێندکاران لە زانکۆی علوومی پزیشکیی سنە نەیتوانی دەنگی مەرگ بۆ بەکرێگیراوانی ڕێژیم کپ بکات. لە ورمێ هەر لە سەعاتەکانی ئەوەڵی شەوەوە لاوان کۆبوونەوەی ناڕەزایەتییان بەڕێوەبرد و لە بەرامبەر هێرشی هێزەکانی دوژمندا ڕێبەندانیان درووست کرد. لە سەقز لاوانی شۆڕشگێڕ تاکتیک و شێوازی نوێیان لە بەرامبەر هێزە بەکرگیراوەکانی ڕێژیم گرتەبەر. لە خوڕەم ئاباد ڕێوڕەسمی یادکردنەوەی نیکا شاکەرەمی بوو بە مەیدانی دەربڕینی تووڕەیی و ناڕەزایەتیی جەماوەری ڕاپەڕیو. لە زاهیدان هێزە سەرکوتگەرەکان ئەمجارەیان بە تانکەوە هاتنە سەر شەقام و تەک تیرەندازیان لەسەر چەند ساختمان دانا، بەڵام سەرەڕای هەمووی ئەم هەوڵانە، خەڵک لەگەڵ هێزە سەرکوتگەرەکان دەرگیر بوون و ڕاویان نان.
لەحاڵێکدا کە لە زۆرێک لە شارەکان، زانکۆ و مەدرەسەکان کۆبوونەوەی ناڕەزایەتی و ڕووبەڕووبوونەوە لەگەڵ هێزە سەرکوتگەرەکان ئیدامەی بوو، شۆرای ڕێکخستنی ناڕەزایەتییەکانی کرێکارانی پەیمانیی نەوت لەڕێگەی بانگهێشتێکەوە ڕایگەیاند کە “بۆ پشتیوانی لە خەباتی خەڵک دەست دەدەینە مانگرتن”. بێگومان مانگرتنی کرێکارانی نەوت ئەگەر دەست پێ بکات و پەرە بستێنێت، هاوسەنگیی هێز بە قازانجی ئەم ئاخێزە شۆڕشگێڕانەیە دەگۆڕێت. ئێستا نەتەنیا خەباتکارانی سەر شەقام، مامۆستایان و خوێندکاران کە شەقام و زانکۆ و مەدرەسەیان کردووەتە مەیدانی ناڕەزایەتی و ڕووبەڕووبوونەوە لەگەڵ هێزە سەرکوتگەرەکانی کۆماری ئیسلامی، بەڵکوو گشت کۆمەڵگاش بە شور و شەوقەوە چاوی لە مانگرتنی کرێکارانی نەوت بڕیوە. لەبیرمانە کە لە مانگی جۆزەردانی ساڵی ڕابردوودا کاتێک کە مانگرتنی کرێکارانی نەوت زیاتر لە سەد پاڵاوگە، شیرکەتی پێترۆشیمی و وزەخانە و ناوەندی بەرهەمهێنانی گرتەوە، چۆن کاریگەریی خستە سەر گشت کەشوهەوای سیاسیی کۆمەڵگە. بەڕێوەبردنی مەجمەعی عموومیی کرێکاران لە بەشێک لە ناوەندەکانی سەنعەت و پێترۆشیمی و ئاراستەی ڕێبەریی جەمعی و شۆرایی ئەوان، نیشانی دا کە دەستکەوتی مەزنی کرێکارانی قارەمانی حەوت تەپە بە هەموو ئەو هەزینە قورسانەی کە بۆیان دا، خەریکە دەبێتە ئاراستەیەکی جێکەوتوو لەناو بزووتنەوەی کرێکاریدا. هەڵبەت بێگومان ئەم بابەتەش بۆ پێشڕەویی بزووتنەوەی کرێکاری یەکجار گرینگە.
ئێستا کە زیاتر لە شەش حەفتە لەم ئاخێزە شۆڕشگێڕانەیە تێپەڕیوە و کۆمەڵگە کەوتووەتە پێگەیەکی شۆڕشگێڕانەوە، تۆڕی پەیوەنددراوی لاوانی شۆڕشگێڕ لە گەڕەکە جۆراوجۆرەکانی زۆرێک لە شارەکان، دەستپێشخەری ڕێکخستنی ناڕەزایەتی و بەرەنگاربوونەوە لەگەڵ هێزی سەرکوتگەرن. زانکۆ و مەدرەسەکان بوونەتە شوێنی مانگرتن و بەرپاکردنی کۆبوونەوەی ناڕەزایەتی و بەرەنگاربوونەوە لەگەڵ سەرکوتگەرانی حکوومەتی ئیسلامی. مامۆستایان چەندین مانگرتنی سەرانسەرییان سازمان داوە. ڕێوڕەسمەکانی یادکردنەوەی گیان بەختکردووان بوونەتە مەیدانی دەربڕینی تووڕەیی و ناڕەزایەتیی شۆڕشگێڕانەی جەماوەر. مانگرتن و کۆبوونەوەی کرێکاران لە هێندێک لە سەنایعی نەوت و پێترۆشیمی، حەوت تەپە و چەند ڕشتەی تر بۆ هاوپشتی لەگەڵ ئەم ئاخێزە شۆڕشگێڕانەیە مژدەبەخشی هاتنە مەیدانی چینی کرێکارە. هاتنە مەیدانی چینی کرێکار بە چەکی بەهێزی مانگرتنەوە دەتوانێ درێژە و پێشڕەویی ئەم ئاخێزە شۆڕشگێڕانەیە زەمانەت بکات. گومان لەوەدا نییە کە ڕێبەران و هەڵسووڕاوانی بزووتنەوەی کرێکاری کە لەماوەی ساڵانی ڕابردوودا گەلێک مانگرتنی شکۆمەندیان سازمان داوە، لە زەروورەتی سیاسی و چینایەتیی هاتنە مەیدانی چینی کرێکار ئاگادارن. بەڵام نیگەرانی لە سەرکوتی بەرین، هەژاری و فەلاکەتی بێوێنە و نیگەرانی لە کاریگەرییەکانی مانگرتن لەسەر ژیانی بنەماڵە کرێکارییەکان، نەبوونی ڕێکخراوی جەماوەری و چینایەتیی کرێکاران، ئەو بەربەستانەن کە چالاکان و ڕێبەرانی کرێکاری بۆ سازماندانی مانگرتن و هێنانەمەیدانی بزووتنەوەی کرێکاری لەگەڵی بەرەوڕوون. پێویستە بە هەر شکڵێک کە دەتوانین بۆ نەمانی ئەم نیگەرانی و بەربەستانە، یارمەتیی هەڵسووڕاوان و ڕێبەرانی بزووتنەوەی کرێکاری بدەین. بە هاتنە مەیدانی یەکپارچەی چینی کرێکار، بە ڕێکخستنی ئەم چینە و بە گرتنە دەستی ڕۆڵی ڕێبەری، دروشمی “بژی شۆڕش، بژی حکوومەتی شۆرایی، بژی سۆسیالیزم” هێزی کۆمەڵایەتیی وەدیهاتنی خۆی پەیدا دەکات.
تەلەڤیزیۆنی کۆمەڵە و حیزبی کۆمۆنیستی ئێران