بەپێی ڕاپۆرتەکان، ڕۆژی هەینی ١ی خاکەلێوەی ١٤٠٤، “ئۆزگور ئۆزەل”، سەرۆکی پارتی گەلی کۆماریی تورکییە “جەهەپە”، لە ڕاگەیەندراوێکدا، داوای لە هاووڵاتییانی تورکییە کرد، دژی دەستگیرکردنی ئەکرەم ئیمامئۆغڵو، سەرۆکی گەورەشارەوانیی ئیستانبۆل، لە گەشت شار و شارۆچکەکان بڕژێنە سەر شەقامەکان و خۆپێشاندان بکەن.
بە پێی هەواڵی ئاژانسی فرانس پرێس، لەئێستادا لانیکەم ١٠ هەزار هاووڵاتیی ئامادەکارییان بۆ ئەنجامدانی خۆپێشاندان کردووە و بەرەو بەردەم باڵەخانەی شارەوانیی ئیستانبوڵ بەڕێوەن. ئەمەش لە کاتێکدایە، ڕۆژی پێنجشەممە ٣٠ی ڕەشەممە، هاووڵاتییان لە هەردوو پارێزگای ئەنکارا و ئیستانبۆل ڕژانە سەر شەقامەکان و خۆپێشاندانی بەرفراوانیان کرد، بەڵام هێزەکانی پۆلیسی تورکییە لە ڕێگەی بەکارهێنانی گازی فرمێسکڕێژ، بڵاوەیان بە خۆپێشاندەران کرد. جێگای ئاماژەیە، ڕۆژی چوارشەممە ٢٩ی ڕەشەممە، هێزێکی ئەمنیی تورکییە هەڵیانکوتابووە سەر ماڵی ئەکرەم ئیمامئۆغڵو، سەرۆکی گەورەشارەوانیی ئیستانبۆل و دەستگیریان کردبوو.