ڕۆژی یەکشەممە ۳ی خاکەلێوەی ١٤٠٤، “کاروان دافعی” تەمەن ۲۵ ساڵ و خەڵکی شاری مەریوان، لە لایەن هێزەکانی ئیدارەی ئیتلاعات لە یەکێک لە شەقامەکانی ئەو شارەدا دەستبەسەر کرا و بۆ شوێنێکی نادیار گواسترایەوە.
بەوتەی سەرچاوەیەکی ئاگادار، دەستبەسەر کرانی ئەو هاووڵاتییە لە پەیوەندی لەگەڵ ڕێوڕەسمەکانی نەورۆز بووە و بەدواداچوونەکانی بنەماڵەکەی بەمەبەستی ئاگاداربوونەوە لە چارەنووس و شوێنی ڕاگرتنی کاروان دافعی تا ئێستا بێ ئاکام ماوەتەوە. هەروەها ڕۆژی شەممە ٢ی خاکەلێوە، ئەسعەد باباکەرەمی، تەمەن ٣٤ ساڵ و خەڵکی گوندی “گاوەڕە” سەر بە شاری سنە دوای بانگکرانی بۆ ئیدارەی ئیتلاعاتی ئەمشارە دەستبەسەر کراوە. لە لایەکی دیکەوە، ڕۆژی هەینی ١ی خاکەلێوە، سەیفوڵڵا خان غەفاری باشبلاغ، تەمەن ٧٨ ساڵ و خەڵکی شاری سەقز لە لایەن ئیدارەی ئیتلاعاتی ئەم شارە دەستبەسەر کرا. شایانی باسە، سەیفوڵڵا خان لە پەیوەندی بەشداریکردنی لە ڕێوڕەسمەکانی نەورۆز دەستبەسەر و دواتر بۆ زیندانی ناوەندیی سەقز گواستراوەتەوە. ناوبراو بە “تێکدانی ئاسایشی گشتی” تاوانبار کراوە.