بەپێی ڕاپۆرتەکان، سەرەڕای تێپەربوونی ١٣ ڕۆژ بەسەر دەستبەسەرکرانی دوو چالاکی بواری مافەکانی ژنان بە ناوەکانی “لەیلا پاشایی” تەمەن ۴۵ ساڵ خەڵکی سەقز و دانیشتووی سنە، و “باران ساعدی” تەمەن ۴۵ ساڵ و خەڵکی شاری سنە، لە سەرەکیترین مافەکانی خۆیان وەکوو مافی دەستڕاگەیشتن بە پارێزەر بێبەش کراون و لە حەفتەی ڕابردووەوە لە مافی پەیوەندیگرتن لەگەڵ بنەماڵەکانیان بێبەش کراون و لە ژووری تاکەکەسیی ناوەندی چاکسازی و پەروەردەی سنە ڕاگیراون.
بەوتەی سەرچاوەیەکی ئاگادار، ئەو دوو چالاکەی بواری مافەکانی ژنان بەمەبەستی وەرگرتنی دانپێدانانی زۆرەملێ لە بەرامبەر کامێرادا لەژێر گوشار داندراون. ئەو دوو چالاکە مەدەنییە ڕۆژی دووشەممە ۲۰ی ڕەشەممەی ١٤٠٣، لەگەڵ سۆهەیلا موتاعی و سۆما محەممەدڕەزایی، دوو چالاکی دیکەی مافی ژنان، لە شارەکانی سنە و دێهگولان لە پەیوەندی لەگەڵ بەشداری کردن و ئامادەبوون لە ڕێوڕەسمی تایبەتی ڕۆژی جیهانی ژنان لە سنە، لە لایەن هێزەکانی ئیدارەی ئیتلاعاتەوە دەستبەسەر کرابوون و بۆ دەستبەسەرگەی ئیتلاعاتی ئەو شارە گواسترابوونەوە. جێگای ئاماژەیە، سۆهەیلا موتاعی لەئاکامدا ڕۆژی دووشەممە ۲۷ی ڕەشەممە و سۆما محەممەدڕەزایی ڕۆژی چوارشەممە ۲۹ی ڕەشەممە، بەدانانی بارمتە و بەشێوەی کاتی تا کاتی کۆتاییهاتنی پرۆسەی دادگاییکردنەکەیان لە زیندانی ناوەندیی سنە ئازاد کرابوون.