Komala

بەپێی هەواڵی گەیشتوو، ڕۆژی چوارشەممە ١٥ی ڕەشەممە، ڕێوڕەسمێکی شکۆدار بە بۆنەی ٨ی مارس، ڕۆژی جیهانی ژن بە ئامادەبوونی کۆمەڵێک لە ژنان وپیاوانی ئازادیخواز و یەکسانی خواز لە شاری بانە بەڕێوەچوو.
ڕێوەڕەسمەکە بە سروودی ئەنترناسیۆناڵ سروودی هاوپشتی جیهانی چینی کرێکار دەستی پێکرد و لە درێژەدا بۆڕێزگرتن لە یادی گیانبەختکردووانی ڕێگای ئازادی و سۆسیالێزم، یەک دەقیقە بێدەنگی ڕاگیڕا. دواتر یەکێک لە بەشداربووان کورتە باسێکی لەسەر مێژووی ئەم ڕۆژە و دەستکەوتەکانی بزووتنەوەی ژنان لە ئاستی جیهان و ئێران کرد.
لەدرێژەدا لە نێوان بەشداربوواندا سەبارەت بە خاڵە لاواز و بەهێزەکانی بزووتنەوەی ڕزگاری ژنان و هەروەها تەوەرە جۆراوجۆرەکانی کۆمەڵگا قسە وباس کرا. ڕێوڕەسمەکە دوای چەند کاتژمێر، لە نێو شایی و خۆشی بەشداربوواندا کۆتایی پێ هات.