دەرکردنی حوکمی بەغی و ئێعدام بۆ شەریفە محەممەدی، چالاکی کرێکاری، هێرشی دەسەڵاتدارانە بۆسەر ژنان، خانەنشینان، کرێکاران و هەموو خەڵکی ناڕازیی ئێران. حکوومەتێک کە لە بەرامبەر خەبات و سەرەفرازیی شۆڕشی ژن ژیان ئازادی شکستی هێنا و هەموو یاسا ڕەنگاوڕەنگەکانی و لەشکرکێشیی هێزە نیزامییەکانی بۆسەر شەقام بەرەوڕووی شکست بووەوە، چارەی کار لە درێژەی سەرکوت و دەرکردنی ئەحکامی کۆنەپەرستانەدا دەبینێ. دەسەڵاتێک کە لە بەرامبەر ناڕەزایەتیی شەقامی خانەنشیان، کە دەنگی ناڕەزایەتییان دەنگی هەموو کۆمەڵگایە، زەبوون و بێتوانایە. حکوومەتێک کە لە بەرامبەر یەکگرتن و هێزی کرێکارانی مانگرتوو لە ناوەندەکانی نەوت و پێترۆشیمیدا داماوە، هیچ وڵامێکی پێنادرێتەوە. دەسەڵاتێک کە مەشرووعییەتەکەی لە بەرامبەر هێزی هاودڵی و یەکگرتوویی خەڵک لە گاڵتەجاڕی هەڵبژاردنەکانیدا کەوتووەتە مەترسییەوە. وەها حکوومەتێک بە سێناریۆسازی و دەرکردنی حوکمی ئێعدام بۆ ژنێک کە هەڵاواردن و نابەرابەریی بۆ قەبووڵ ناکرێ و لە مافی کرێکاران دیفاع دەکات، ناتوانێ بۆ خۆی فورسەت بکڕێ تا ژنان و کرێکاران و خەڵکی ناڕازی دژبە جەنایەت، کوشتار، هەژاری و هەڵاواردن ناچار بە پاشەکشە بکات.
کۆمەڵگای ئێران، بەتایبەت دوای دەستپێکی ناڕەزایەتییەکان بەشێوەی جۆراوجۆر نای بە گشت موناسباتی سەرکوتگەر وتووە و حازر بە تەحەمولی بارودۆخی نەکبەتباری ئێستا نییە. وەها کۆمەڵگایەک نایهەوێ شایەدی سەرکوتی هەرچی بەرینتری دەسەڵات دژبە ژنان و هەموو توێژەکانی کۆمەڵگا بێت. پەرەسەندنی بەردەوامی ئاماری ئێعدام و دەرکردنی حوکمی بەغی بە مانای ئەوەیە کە حکوومەت سیاسەتی خۆی دژبە شۆڕشی خەڵک درێژە دەدات.
خەڵک بەرلە شۆڕشی مەهسا و دواتری لەگەڵ هەموو جۆرە قەتڵ و ئەحکامی کۆنەپەرستانەی حکوومەتی دژایەتییان کردووە و بە هەڵمەتی نا بۆ ئێعدام تەنانەت لە ناو زیندان، هاواری دژایەتییان بەرامبەر بە ئێعدام لەژێر هەر ناوێکەوە بەرزتر کردووەتەوە. هەر ئێستا گیانی شەریفە محەممەدی کە حوکمی ئێعدامی بۆ دەرکراوە و گیانی وەریشە مورادی، پەخشان عەزیزی، نەسیم غوڵامی سیمیاری لەگەڵ حوکمی بەغی بەرەوڕوون، لەمەترسیدایە.
ئێمە ژنان، کرێکاران، خانەنشینان، خوێندکاران، موعەلیمان، دادخوازان و پەرستاران و توێژەکانی دیکە کە تەنیا چەکمان لە خەبات دژبە زوڵم و بێعەداڵەتیی زاڵ، یەکگرتوویی و یەکڕیزییە، تەشەکول و تەحەزوب بە مافی ئینسانەکانی سەدەی بیست و یەک دەزانین. ئێمە ئەحکامی ئێعدام و بەغی و هەرجۆرە حوکمێکی دیکە کە ببێتە هۆی مەرگ و کەمئەندامبوونی ئینسانەکان مەحکووم دەکەین و هەتا هەڵوەشاندنەوەی سەرجەم حوکمەکانی لەم شێوەیە ناسرەوین.
داوا لە هەموو خەڵکی ناڕازی دەکەین کە وێنە و ناوی شەریفە محەممەدی و دەیان زیندانیی دیکە کە تەنیا بەتاوانی مافخوازی گیانیان لە مەترسیدایە، لە ناڕەزایەتیی ڕۆژانەی خۆیاندا هاوار بکەن و بە هەر شێوەیەک کە دەتوانین بۆ ڕزگارکردنی گیانی هەموو ئەو ئینسانانەی لەژێر تیغی ئێعدامدان، تێبکۆشین.
نەسیم غوڵامی سیمیاری، حەمیدڕەزا سەهل ئابادی، ئیحسان ڕوازژیان، ئەمین سوخەنوەر، عەلی هەراتی موختاری، حسێن محەممەد حسێنی، حسێن ئەردەستانی، ئەمیر شاەوەلایەتی، وەحید بنی عامریان، پوویا قوبادی، مەحەممەد تەقەوی، موجتەبا تەقەوی، بابەک عەلیپوور، ئەبولحەسەن مونتەزێر، ئەسغەر دانشفەر بە بەغی تۆمەتبار کراون و هاوشێوەی شەریفە محەممەدی مەترسیی ئێعدامکرانیان لەسەرە.
زیندانیی سیاسی دەبێ ئازاد بکرێ
نا بۆ ئێعدام
وەستاوین هەتا کۆتایی
ژن ژیان ئازادی
واژۆکان:
ئەنجومەنی بەرق و فلزی کرماشان
شۆرای خانەنشینانی ئێران
شۆرای ڕێکخستنی ناڕەزایەتییەکانی کرێکارانی پەیمانیی نەوت
شۆرای ڕێکخستنی ناڕەزایەتییەکانی کرێکارانی غەیری ڕەسمیی نەوت (ئەرکانی سالس)
شۆرای هاوئاهەنگیی ناڕەزایەتیی پەرستاران
دەنگی ژنانی ئێران
ناوەندی دادخوازان