سەندیکای کرێکارانی شیرکەتی واحیدی ئۆتۆبووسڕانیی تاران و دەوروبەر خوازیاری ئازادیی بێ شەرت و مەرجی هەموو چالاکانی کرێکاری، موعەلیمی، خوێندکاری و مەدەنیی زیندانیکراو لە سەرتاسەری ئێرانە. هەروەها سەندیکا بەشێوەی دیاریکراو خوازیاری ئازادیی دەستبەجێی دوو ئەندامی بەندکراوی خۆی، ئیبڕاهیم مەدەدی و داود ڕەزەوی و هەروەها چالاکانی کرێکاری و پشتیوانانی بەندکراوی سەندیکا، ڕەیحانە ئەنساری‌نەژاد و ئانیشا ئەسەدووڵڵاهییە.
ئیبڕاهیم مەدەدی ئەندامی سابت قەدەم و جێگری هەیئەتی مودیرەی سەندیکا، لە ٢١ی گەلاوێژی ١٤٠٣وە بۆ تێپەڕاندنی یەک ساڵ زیندانی ناعادڵانەی پەیوەندیدار بە ساڵی ١٣٩٤، لە بەندی ٨ی زیندانی ئێڤیندا ڕاگیراوە. ناوبراو پێشتریش جارێک سێ ساڵ و نیو و جارێکی تر نزیک بە چوار مانگ زیندانی کرابوو. هەروەها زۆر جاریش دەستبەسەرکرانی کورتماوە و درێژماوەی تەجروبە کردبوو و بەر لە خانەنشینیی زۆرەملی، چەندین ساڵ بوو لەسەر کار دەرکرابوو و گەلێک هەزینەی قورسی داوە. ئیبراهیم مەدەدی تەمەنی نزیکەی حەفتا ساڵە و تووشی چەندین نەخۆشی بووە و باری تەندروستی باش نییە.
داود ڕەزەوی، ئەندامی هەیئەتی مودیرەی سەندیکا و لە چالاکانی پایداری سەندیکا کە لە ساڵی ١٣٨٣ەوە بەردەوام چالاکیی هەبووە، ٥ی مانگی ڕەزبەری ١٤٠١ دەستبەسەرکرا و بەشێوەی ناعادڵانە بە پێنج ساڵ زیندان مەحکووم کرا. ناوبراو لەئێستادا لە بەندی ٤ی زیندانی ئێڤیندا زیندانی کراوە. داود ڕەزەوی پێشتریش زۆر جار دەستبەسەر کرابوو و جارێک بە پێنج ساڵ حوکمی تەعلیقی مەحکووم کرابوو. داود ڕەزەوی چەندین نەخۆشیی جۆراوجۆری هەیە و درێژەی بەندکرانی بووەتە هۆی خراپتر بوونی نەخۆشییەکانی. بەڵام سەرەڕای ئەم بارۆدۆخە تەنانەت یەک ڕۆژیش پشووی پێنەدراوە.
ڕەیحانە ئەنساری‌نەژاد، چالاکی کرێکاری و لە پشتیوانانی سەندیکا، ٢٢ی مانگی گوڵانی ١٤٠١ دەستبەسەر و بە چوار ساڵی زیندانی نادادپەروەرانە مەحکووم کرا. ناوبراو لە ئێستادا لە بەندی ژنانی زیندانی ئێڤیندا زیندانی کراوە. ڕەیحانە کە پێشتریش دەسبەسەرکرابوو، سەرپەرستی تاقانە کچەکەی بوو و لەئێستا بەرەوڕووی بارودۆخێکی سەخت بووەتەوە. ئەو لە مانگەکانی ڕابردوودا تەنانەت لە چاوپێکەوتن لەگەڵ کچەکەشی بێبەری کراوە.
ئانیشا ئەسەدوڵڵاهی، موعەلیم، وەرگێڕی سەندیکا و لە پشتیوانانی چینی کرێکار، لە ١٩ی مانگی گوڵانی ساڵی ١٤٠١دا دەستبەسەرکرا و لە دیوانی باڵای وڵاتدا بە سێ ساڵ و حەوت مانگ زیندانی نادادپەروەرانە مەحکووم کرا. ئەویش لە بەندی ژنانی زیندانی ئێڤیندا زیندانی کراوە. ئانیشا پێشتر لە بۆنەکانی وەک ڕۆژی جیهانیی کرێکاری ساڵی ١٣٩٨یشدا دەستبەسەرکرابوو. بەرپرسانی زیندان چەندین مانگ لە چاوپێکەوتنی حزووریی ناوبراو ڕێگریان کردبوو.
سەندیکای کرێکارانی شیرکەتی واحید تەئکید دەکات کە درێژەی زیندانی کردنی ئەندامانی سەندیکا و دەستبەسەرکردنی کرێکاران و چالاکانی کرێکاری هیچ پاساوێکی یاسایی و ئینسانیی نییە. پێویستە دەستبەجێ هەموو چالاکانی کرێکاری زیندانیکراو ئازاد بکرێن و پەروەندەی درۆینە و ئەزیەت و ئازاردانیان کۆتایی پێبێت!
سەندیکای کرێکارانی شیرکەتی واحیدی ئۆتۆبووسڕانیی تاران و دەوروبەر
٢٠ی بەفرانباری ١٤٠٣ی هەتاوی