سەندیکای کرێکارانی شیرکەتی واحیدی ئۆتۆبووسڕانیی تاران و دەوروبەر پەسندکردنی حوکمی ئێعدامی نادادپەروەرانە بۆ پەخشان عەزیزی، ڕاوێژکاری کۆمەڵایەتی و چالاکی بواری مافی ژنان لەلایەن دیوانی باڵا و هەروەها دەرکردن و جێبەجێ کردنی حوکمەکانی دیکەی ئێعدام بۆ چالاکانی مەدەنی و کۆمەڵاتی و سیاسی، لێبڕاوانە مەحکووم دەکات. پەخشان عەزیزی بەهۆکاری چالاکیی مەدەنی و ئاشتیخوازانە، لەوانە یارمەتیدانی ژنان و منداڵانی ئاوارە لە سووریە و عێراق، بە تۆمەتی بێبنەمای “بەغی” لەلایەن دادگای ئینقلابەوە بە ئێعدام مەحکووم کراوە.
لە ڕاپۆرتی ڕێکخراوی لێبۆردنی نێونەتەوەییدا هاتووە کە پەخشان عەزیزی لە ساڵەکانی ٢٠١٤ هەتا ٢٠٢٢ چالاکیی مرۆڤدۆستانەی ئەنجام داوە. ئەو یارمەتیدەری ژنان و منداڵانێک بووە کە بەهۆی هێرشەکانی داعشەوە ئاوارە بوون و لە کەمپەکانی باکووری ڕۆژهەڵاتی سووریە و هەرێمی کوردستانی عێراق نیشتەجێ بوون. حوکمی زاڵمانەی ئێعدامی پەخشان عەزیزی لەم دواییەدا لەلایەن دیوانی باڵاوە پەسندکراوە کە نیشانەی درێژەی سەرکوتی سیستماتیک و پێشێلکردنی تەواوی دادپەروەری لە دەزگای قەزاییدایە.
موحاکمەی پەخشان عەزیزی کە وێڕای ئەشکەنجە، بێسەروشوێن کردن، ئیعترافی ئیجباری و پێشێلکردنی بەرینی مافی دادڕەسی ئەنجام دراوە، نموونەی ئاشکرای پەرەسەندنی سەرکوتی چالاکانی مەدەنی و داکۆکیکارانی مافی ئینسانە. ئەم حوکمانە بەشێک لەو سیاسەتە سەرکوتگەرانەیە کە بە ئامانجی پێکهێنانی ترس و تۆقاندن و سەرکوتکردنی ئازادیخوازی و دادخوازیی خەڵکی ستەمدیدە بەڕێوەدەچێت.
سەندیکای کرێکارانی شیرکەتی واحید خوازیاری ڕاگرتنی دەستبەجێی حوکمی ئێعدامی پەخشان عەزیزی، ئازادیی بێ شەرت و مەرجی ئەو و هەروەها هەڵوەشاندنەوەی حوکمی ئێعدامی بێهرووز ئێحسانی، مێهدی حسێنی، وریشە مورادی و چالاکانی سیاسی و مەدەنیی دیکەیە. بۆ جارێکی تر دژایەتی توندی خۆمان بەرامبەر بە سزای ئێعدام وەک سزایەکی نامرۆڤانە و ئامرازێکی سەرکوتگەرانە دووپات دەکەینەوە. بزووتنەوە کرێکارییەکان لە ئێران و لە سەرتاسەری جیهان دژی سزای ئێعدامن بە هەر شێواز و بیانوویەکەوە. ئێمە “سزای ئێعدام” بە پێشێلکردنی مافی ژیان، بە پێشێلکردنی دادپەروەریی کۆمەڵایەتی، بە پێشێلکردنی یەکسانی و مافی ژیانێکی شیاو دەزانین و هەڵوەشاندنەوەی ئەم سزایە بە هەنگاوێکی گرینگ دەزانین لەپێناوی دامەزراندنی کۆمەڵگایەکی ئینسانی تر و دادپەروەرانەتر.
لە هەموو کرێکاران و ڕێکخراوە کرێکارییەکان، لە ڕێکخراوەکانی مافی مرۆڤ و کۆمەڵگەی مەدەنیی نیونەتەوەیی داواکارین لە دژی ئەم حوکمە ناڕەوایانە و سەرکوتی سیستماتیک، هەڵوێستی جددی و کاریگەر بگرن.
نا بۆ ئێعدام
سەندیکای کرێکارانی شیرکەتی واحیدی ئۆتۆبووسڕانیی تاران و دەوروبەر
٢٤ی بەفرانباری ١٤٠٣ی هەتاوی