پەرستارانی ئێران لەماوەی ڕۆژانی ڕابردوودا لە ناڕەزایەتی بە بارودۆخی بژێو و کارەکانیان مانگرتن و ناڕەزایەتییان بەڕێوەبردووە. ئەم ناڕەزایەتییانە کە لە شیرازەوە دەستیپێکرد و سەرتاسەری ئێرانی گرتەوە، نیشانەی ئەوەیە کە ئەم توێژە زەحمەتکێشە لە هەڵاواردن وەگیانهاتوون و ئیرادەیان کردووە کە مافی خۆیان لەڕێگەی حەرەکەتێکی بەکۆمەڵەوە لە دەسەڵات بستێنن.
ئەوان لەئاست وەدینەهاتنی داخوازیی و بەڵێنە جێبەجێنەکراوەکان ناڕازین و خوازیاری ئەمنیەتی پیشەن. پەرستارەکان لە ئیزافەکاریی ئیجباری کە بووەتە هۆی هیلاکبوون و گۆشەگیربوونیان، وەگیانهاتوون. ئەوان خوازیاری گۆڕینی شێوازی دامەزراندنیانن. ناسەقامگیریی پیشە و بێگاری داسەپاو، زیانی زۆری پێگەیاندوون. سەرچاوەی ئەم کێشانە و قەیرانی سیستمی تەندروستی و دەرمان، سیاسەتی سەرەکی دەەسەڵات لە بواری ئابووریدایە، کە لەسەر بنەمای کاڵایی کردنی بەرینی بوارە کۆمەڵایەتییەکان بەتایبەت بواری تەندروستی و پەروەردەیە. شێوازێکی یەکجار قازانجپەرستانە کە بەشوێن هێزی کاری هەرزانەوەیە.
لەم شێوازەدا، لەجیاتی وڵامدانەوە بە داخوازیی توێژە جۆراوجۆرەکان، دەسەڵات هەوڵ دەدات بە مشتی ئاسنین، ناڕەزایەتیی لەدژی بارودۆخی ئێستا لەناو بەرێت و سەرکوتی بکات. هەر لەم ڕاستایەدا شایەدی ئەوەین کە ناوەندە سەرکوتگەرەکان لە هەوڵی ئەوەدان بەشێوازی جۆراوجۆر پەرستاران لە درێژەدانی ناڕەزایەتی و کۆبوونەوە و مانگرتن پاشگەز بکەن. بۆ نموونە حەراسەتی نەخۆشخانەکان بە هاوئاهەنگی لەگەڵ دامەزراوە ئەمنییەکان دەستیان کردووە بە پەروەندەسازی. لە هەندێک نەخۆشخانەدا پەکخستنی پرۆسەی کاری نەخۆشخانە دەخەنە ئەستۆی پەرستاران و بە هەڕەشەکردن و ترساندن هەوڵ دەدەن لە بەدواداچوونی داواکارییەکانیان پاشگەزیان بکەن.
بە چاوگێڕانێک بەسەر داخوازییەکان، شێوازی ناڕەزایەتی و ڕیشەی کێشەکانی ناو سیستمی تەندروستی، دەتوانین هاوشێوەبوونیان لەگەڵ سیستمی پەروەردە ببینین. نەدرانی حەقدەستی سەرووی هێڵی هەژاری تەنیا تایبەت بە پەرستارەکان نییە. بەڵکوو کرێکاران و موعەلیمان و خانەنشینانیش خوازیاری حەقدەستی عادڵانەن. داخوازیی ئەمنیەتی پیشە و هەوڵدان بۆ گۆڕینی شێوازی دامەزراندن، ئەمڕۆ لە نەخۆشخانەکانەوە هەتا کارخانەکانی پێترۆشیمی لەئارادایە. پەرستارانیش هەر ئەو داخوازییانەیان هەیە کە موعەلیمانی خەرید خەدەمات و کرێکارانی پڕۆژەکانی نەوت و گاز هەیانە. کەڵک وەرگرتن لە ئامرازی کۆبوونەوە و مانگرتن مافێکە کە کرێکار و موعەلیم و پەرستار هاواری دەکەن و هەمووی ئەمانەش نیشانەی ئەوەیە کە زەحمەتکێشان و کرێکاران لە بوارە جۆراوجۆرەکاندا لەگەڵ ئەم کێشانە ڕووبەڕوون و داخوازیی هاوبەشیان لەبواری بەرهەمهێنان و خزمەتگوزاریدا هەیە. بە واتایەکی تر ئەمڕۆ پەرستاران، موعەلیمان، خانەشینان و هەموو کرێکاران و زەحمەتکێشان لەگەڵ یەک هاوچارەنووسن. لەم ڕووەوە شۆرای هاوئاهەنگیی ڕێکخراوە سینفییەکانی موعەلیمانی ئێران لە داخوازیی پەرستاران و ناڕەزایەتییەکانیان پشتیوانی دەکات و هەرجۆرە هەڵسووکەوتێکی ئەمنیەتی و ئینتزامی لەگەڵ پەرستاران مەحکووم دەکات.
ئێمە لە شۆرای هاوئاهەنگیدا باوەڕی قووڵمان بەوەیە کە مەسیری ئاڵوگۆڕی بنەڕەتی کە بتوانێ مافی زۆرینەی کۆمەڵگا دابین بکات لە گرەوی ڕێکخستنی سەربەخۆدایە. هیوادارین پەرستارانی ئازیز بە یەکگرتوویی و حەرەکەتی بەکۆمەڵ بتوانن داخوازییەکانیان دەستەبەر بکەن و بە پێکهێنان و پەرەپێدانی ڕێکخراوەی سەربەخۆ، چالاکتر لە ڕابردوو بن. ئەوەیکە ئێمە پەروەردەکارانی ئێران لەگەڵ ئێوە پەرستاران هاوڕێ دەکات، ژانی هابەشە، کە هیچ تەگبیرێک بۆ چارەسەرکردنی لەلایەن بەرپرسانی ئەم وڵاتەوە نابیندرێ.
ئێمە کە هاودەردین، بە هاوڕێی خۆتانمان بزانن.
شۆرای هاوئاهەنگیی ڕێکخراوە سینفییەکانی موعەلیمانی ئێران
٣٠ی گەلاوێژی ١٤٠٣ی هەتاوی