گەڵاڵەی کۆنەپەرستانە و سەرکوتگەرانەی “عیفاف و حیجاب” بە پشتیوانیی بەرپرسانی باڵای ڕژیم و بە پەسەندکردنی کۆتایی مەجلیسی شۆرای ئیسلامی و شۆرای نیگەهبان بوو بە یاسا. ئەم یاسایە کە لە ٧٤ ماددە و پێنج بەشدا کۆکراوەتەوە، ئاشکراترین هێرشە بۆسەر مافی ژنان لەبواری هەڵبژاردنی جلوبەرگ و نموونەیەکی بەرچاوی هەڵاواردنی ڕەگەزییە. ئەم یاسایە لەسەر بنەمای کۆنەپەرستی، چەقبەستوویی فکری و دەروونی، وە ئەخلاقی پرتووکاوی نیزامی پیاوسالاری داڕێژراوە. ئەم یاسایە چەکێکی دیکەیە بۆ پێشێلکردنی مافی نێوەی کۆمەڵگا واتە ژنان. لە هەمان کاتیشدا هێرشێکی بێشەرمانەیە بۆسەر ئازادی و مافی دیموکراتیکی هەموو خەڵک کە کەوتووەتە دەستووری دەسەڵات و مەجلیس و ناوەندەکانی سەرکوتەوە.
ئامانج لە داڕشتنی وەها یاسایەکی کۆنەپەرستانە و دژی ژن، چاوەدێری و کۆنتڕۆڵکردنی هەرچی زیاتری جلوبەرگ و شێوازی ژیانی هاووڵاتییانە. پەرەپێدانی چالاکیی دەزگاکانی جێبەجێکار، فەرهەنگی و کۆمەڵایەتیی ڕژیمە. فەرماندان بە ناوەند و بەکرێگیراوەکانی حکوومەتە بۆ ئەوەی زەبروزەنگ بەئامانجی سەرکوتی هەرجۆرە دەنگێکی ئازادیخوازانە پەرەپێبدەن. ئەوەی ئەم یاسایە لە یاساکانی تری هاوشێوە جیا دەکاتەوە، بە یاساییکردنی سەرکوتی ژنان و توندوتیژیی دەوڵەتە لە دژیان. ئەم یاسایە سزای قورسی بۆ ئەو ڕەفتارانە لەبەرچاوگرتووە کە دەسەڵاتداران پێی دەڵێن: “لابردنی حیجاب”، “بەدپۆشین و پەرەپێدانی لە کۆمەڵگادا”. ئەم سزایانە بریتین لە جەریمەی قورس، زیندانیکردن، سنووردارکردنی کار، دوورخستنەوە لە چالاکییە کۆمەڵایەتییەکان و تەنانەت قەدەغەکردنی چوونەدەر لە وڵات. ئەم یاسایە نەتەنیا شوێنە گشتییەکان، بەڵکوو فەزای مەجازی و شوێنە خسووسییەکانیش دەخاتە ژێر چاوەدێرییەوە کە پێشێلکردنی ئاشکرای ماف و ئازادیی تاکەکەسییە.
بەڵام ڕوویەکی دیکەی ئەم یاسا کۆنەپەرستانە و ئازادیکوژە، هۆشداری دوورئەندیشانی خودی بە دەسەڵات و بەرپرسانە کە ٤٥ ساڵ هێرش بۆسەر مافی ژنان و سەرکوت نەیتوانیوە ژنان و کچان لە خەباتی ڕەوایان پاشگەز بکات. ژنانی تێکۆشەری ئێران بوێرانە و پێشڕەو، سەرەڕای هەموو هەڵکشان و داکشانەکان، ئاڵای بزووتنەوەی بەرابەریخوازی و پێشکەوتنخوازیی ژن، ژیان ئازادییان شەکاوە ڕاگرتووە. زەینییەتی نەخۆشی داڕێژەرانی ئەم یاسا بێشەرمانە و دژەژنە، لە هەموو بڕگەکانیدا خۆی نیشان دەدات. ئازادیی پۆششی ژنان کە مافی ڕەوایانە، بە پیلانگێریی نەیارانی نیزام لە دەرەوەی وڵات یان دەسەڵاتە دەرەکییەکان دادەندرێت.
پەسەندکرانی گەڵاڵەی حیجاب و عیفاف بە ئامانجی بەیاساکردنی وەحشیانەترین شەڕی سەرتاسەریی ڕێکخراوی دەسەڵات و ئۆرگانەکانی سەرکوت بەرانبەر بە ژنانە بۆ داسەپاندنی حیجاب بە قمیەتی ئێعدام و زیندان و جەریمەی نەغدی قورس. هەروەها ڕێگری کردن لە هەرجۆرە پشتوانییەکی کۆمەڵایەتیی پیاوان و تاکەکانی کۆمەڵگایە لە ئازادیی جلوبەرگی ژنان لەڕێگەی سزای جۆراوجۆرەوە. ئامانجێکی دیکەی پەسندکرانی ئەم یاسایە پێداگریکردن لەسەر ئەو بابەتەیە کە سەرەڕای هەر حەرەکەتێکی ناڕەزایەتی و بزووتنەوەی گشتیی ژنان لەپێناو مافی ئازادی و بەرابەری، ئاراستەی توندوتیژانە و دژەژنی دەسەڵاتی سەرمایەداری – ئیسلامی لەئاست ئازادیی جلوبەرگی ژنان، ناگۆڕێت.
کۆماری ئیسلامی لەڕێگەی سەرکوتی توندوتیژانە و بەیاساییکردنی هێرش بۆسەر ژنان هەوڵ دەدات خەڵکی زەحمەتکێش بەتایبەت ژنانی هوشیار و جەسوور و مافخواز تەسلیم و ملکەچ بکات. بەڵام مێژووی پڕ لە شانازی و ماندوویی نەناسانەی بزووتنەوەی ژنان سەرەڕای شێوازە جۆراوجۆرەکانی سەرکوت بەرانبەر ئازادی و بەرابەری، بواری جۆراوجۆری بۆ بەدەستهێنانی ئازادی و مافی ژیانی خۆی هەڵبژاردووە و هەرگیز تەسلیمی یاسایەک نابێت کە سەرەتاییترین مافی ژنانی بردووەتە ژێر پرسیارەوە. لەم خەباتەدا ژنانی ئازادیخواز لە پشتیوانی سەرجەم چین و توێژە زەحمەتکێشەکانی کۆمەڵگا بەهرەمەندن. هاوپشتیی چینایەتی و ئینسانی دەخوازێت کە هەموو بزووتنەوە کۆمەڵایەتییەکان بەتایبەت بزووتنەوەی کرێکاران، موعەلیمان، ڕووناکبیران، خوێندکاران، خانەنشینان و پەرستاران بۆ پشیتوانی لە مافەکانی ژنان لە ڕێزێکی یەکگرتوودا لەگەڵ یەک بن.
ڕێکخراوە سەربەخۆکانی واژۆکاری ئەم بەیاننامەیە لەپێناوی ئەم ئامانجە هاوبەشەدا، دژایەتی خۆیان لەگەڵ یاسای دژەژنی “عیفاف و حیجاب” دەردەبڕن و لە خەباتی ژنان بۆ دەستەبەرکردنی مافەکانی خۆیان کە بەشێکی گرینگ و چارەنووسسازە لە مافە بنەڕەتییەکانی جەماوەری خەڵک، پشتیوانی دەکەن.
سەندیکای کرێکارانی نەیشەکەری حەوت تەپە
گرووپی یەکیەتیی خانەنشینەکان
کۆمیتەی هاوئاهەنگی بۆ یارمەتیدان بە پێکهێنانی ڕێکخراوە کرێکارییەکان
کرێکارانی خانەنشینی خووزستان
٢٦ی سەرماوەزی ١٤٠٣ی هەتاوی