ڕۆژی پێنجشەممە ١٤ی مانگی پووشپەڕی ١٤٠٣ی هەتاوی لقی یەکی بێدادگای دژەئینقلابی ئیسلامی لە ڕەشت شەریفە محەممەدی چالاکی کرێکاریی دوای حەوت مانگ زیندان و ئەشکەنجەی جەستەیی و دەروونی بە تۆمەتی ئەندامیەتی لە “کۆمیتەی هاوئاهەنگی بۆ یارمەتیدان بە پێکهێنانی ڕێکخراوە کرێکارییەکان” و ئەندامیەتی لە کۆمەڵە موحاکمە و بە ئێعدام مەحکووم کرد. دوای ڕاگەیاندنی ئەم حوکمە شەپۆلێکی مەزن لە ڕاگەیاندنی هاوپشتی لەگەڵ شەریفە محەممەدی، لەگەڵ بنەماڵەکەی و بۆ مەحکووم کردنی ئەم حوکمە دژەئینسانییە کەوتووەتە ڕێ و هەروا بەردەوامە. لەم قۆناغەدا لە هاوئاهەنگییەکی کردەوەیی و شکۆمەندی سیاسیدا هەموو ناوەند و ڕێکخراوەکانی کرێکاران، موعەلیمان، خانەنشینان، ناوەندەکانی مافی مرۆڤ، زیندانیانی سیاسی، چالاکان و پێشڕەوانی بزووتنەوەی کرێکاری لە زیندان و دەرەوەی زیندان، دەیان یەکیەتی و ناوەندی کرێکاری لە وڵاتە جۆراوجۆرەکانی جیهان، ڕێکخراو و ناوەندەکانی داکۆکیکاری مافی منداڵان و ژنان و … لە دەرەوەی وڵات، حیزب و ڕێکخراوە چەپ و کۆمۆنیستەکان بە دەرکردنی بەیاننامە یان بە بەرپاکردنی ئاکسیۆن دژبەم حوکمە جەنایەتکارانەیە دەستیان دایە ناڕەزایەتی و خوازیاری ئازادیی بێ شەرت و مەرجی ئەم چالاکە کرێکارییە بوون. بەڵام ڕژیمی کۆماری ئیسلامی بە بێ بایەخدان بەم شەپۆلە مەزنە ناڕەزایەتییە لە ناوەوە و دەرەوەی وڵات و بە بێ بایەخدان بەو کەمپەینە سیاسییانەی کە لە تۆڕە کۆمەڵایەتییەکان دژبە حوکمی ئێعدامی شەریفە محەممەدی لەئارادایە، هێستا ئەم حوکمە دژەئینسانییەی هەڵنەوەشاندووەتەوە.
هەر لەم پەیوەندییەدا کۆمیتەی سەرتاسەریی هەڵوەشاندنەوەی ئێعدامی شەریفە محەممەدی لە نامەیەکی کراوەدا بۆ سەندیکا کرێکارییەکان لە سەرتاسەری جیهان، بۆ ناوەندەکانی بەرگریکاری مافی کرێکاران و بۆ ڕێکخراوەکانی داکۆکیکاری مافی ژنان، داوای لێکردوون هەوڵەکانیان بۆ ڕێگری لە حوکمی ئێعدامی شەریفە محەممەدی، ئەم کرێکارە ژنەی خەڵکی ئێران، پەرەپێبدەن. لێرەدا سەرەنجتان بۆ ئەم نامەیە ڕادەکێشین.
نامەی کراوە
بۆ: سەندیکا کرێکارییەکان لە سەرتاسەری جیهان
بۆ: ناوەندەکانی داکۆکیکاری مافی کرێکاران
بۆ: هەموو ڕێکخراوەکانی داکۆکیکاری مافی ژنان
بە هاوپشتیی جیهانی لە ئێعدامی شەریفە محەممەدی، کرێکاری ژن، ڕێگری بکەین!
لە ڕێکەوتی ٤ی جولایدا شەریفە محەممەدی بە ئێعدام مەحکووم کرا. تاوانی شەریفە ئەندامیەتی لە “کۆمیتەی هاوئاهەنگی بۆ یارمەتیدان بە پێکهێنانی ڕێکخراوە کرێکارییەکان”ە. کۆمیتەی هاوئاهەنگی ڕێکخراوێکی سەربەخۆ و ئاشکرایە کە لەلایەن چالاکانی سەربەخۆی کرێکارییەوە پێکهاتووە. شەریفە داکۆکیکاری مافی کرێکاران، زەحمەتکێشان و ژنانە.
شەریفە محەممەدی لە ٥ی دێسامبری ٢٠٢٣یەوە دەستبەسەرکراوە و لە زینداندا بەسەر دەبات. لەم ماوەیەدا لەژێر توندترین ئەشکەنجە و ئەزیەت و ئازاری جەستەیی و دەروونی و بازجوویی بەردەوامدا بووە. ڕژیمی کۆماری ئیسلامی بارودۆخێکی یەکجار غەیرە ئینسانی، لە زیندانی چەندین مانگە لە ژووری تاکەکەسی، تا بێبەریکردن لە چاوپێکەوتن لەگەڵ بنەماڵە و بەتایبەت منداڵە کەم تەمەنەکەی و ڕێگریی درێژماوە لە پەیوەندیی تەلەفونی لەگەڵ کەسوکاری بەسەردا سەپاندووە. شەریفە هەڵسووڕاوی سەربەخۆی کرێکاران و ژنانە کە بۆ مافی پێشێلکراویان و بۆ پێکهێنانی ڕێکخراوی جەماوەریی کرێکاریی سەربەخۆ لە دەوڵەت، خەباتی کردووە. دیفاع لە شەریفە، دیفاع لە بزووتنەوەی داخوازیی چینی کرێکار و بزووتنەوەی ژنانە کە هاوکات لەگەڵ دەرکردنی حوکمی دژەئینسانیی ئێعدام بۆ ناوبراو، هێرشیان کردووەتە سەر ئەم بزووتنەوە کۆمەڵایەتییانە و ژمارەیەک لە چالاکانیان ڕەوانەی زیندان کردووە. لە بەرامبەردا سەندیکاکان، ڕێکخراوە سەربەخۆ کرێکارییەکان، چالاکانی کرێکاران، ژنان، و چالاکانی کۆمەڵایەتی و مەدەنی لە ناوەوە و لە دەرەوەی زیندان دژبەم حوکمە جەلادانەیە ئیعتڕازیان کردووە، بنەماڵەی شەریفە و خۆشەویستانیان کەمپەینی حمایەتییان خستووەتە ڕێ، هەڵمەتی سەرتاسەری پێکهاتووە و چالاکانە دژبە حوکمی ئێعدامی شەریفە محەممەدی ناڕەزایەتی دەردەبڕن.
داکۆکیکارانی هەڵوەشاندنەوەی حوکمی ئێعدامی شەریفە، لە هەموو ئێوە کرێکاران و تێکۆشەرانی ژنان و هەموو سەندیکاکان، لە یەکیەتییە کرێکارییەکان و ناوەندە نێونەتەوەییەکان، لە ڕێکخراوەکانی بەرگریکاری مافی ژنان داواکارین بە هەر شێوەیەک کە دەتوانن دژبە حوکمی ئێعدامی شەریفە و هێرشی چینی دەسەڵاتدار لە ئێران بۆسەر مافی ڕێکخستن و بەڕێکخراوبوون ناڕەزایەتی دەربڕن، خوازیاری ئازادیی دەستبەجێ و بێ شەرت و مەرجی ئەم چالاکە کرێکارییە و هەموو کرێکارانی زیندانی و سەرجەم زیندانیانی سیاسی بن. تەنیا بە ناڕەزایەتی دژبەم حوکمە و بە هەڵوەشاندنەوەی ئێعدام لەڕێگەی هاوپشتیی جیهانیی کرێکارییەوەیە کە دەتوانین گیانی شەریفە و دەیان هەڵسووڕاوی کرێکاران، ژنان و دەیان چالاکی کۆمەڵایەتی دیکە ڕزگار بکەین.
زەربەلێدان لە یەکمان، زەربەلێدان لە هەموومان و لە گشت چینەکەمانە.
هاوپشتیی کرێکاری سنوور ناناسێت.
جولای ٢٠٢٤
لەگەڵ ڕێز و حورمەت
کۆمیتەی سەرتاسەریی هەڵوەشاندنەوەی ئێعدامی شەریفە محەممەدی