لە ماوەی مانگی ڕابردوودا لانیکەم حوکمی ئێعدامی ٨٨ بەندکراو لە زیندانەکانی کۆماری ئیسلامیی جێبەجێ کراوە. ئەو ئامارە بەراورد بە مانگی بەفرانباری پارەکە، لانیکەم ٧٨ حاڵەت واتا ٧٨٠٪ بەرز بووەتەوە.
بەپێی ئەم ڕاپۆرتە، لانیکەم حوکمی ئێعدامی ٣ ژن لە زیندانەکانی خوڕەمئاوا، ساری و شیراز جێبەجێ کراوە کە هەر سێکیان پێشتر بە تۆمەتی “کوشتنی بە ئەنقەست” حوکمی ئێعدامیان بەسەردا سەپێندرابوو. جێگای ئاماژەیە، لەو مانگەدا هیچ حاڵەتێکی جێبەجێکردنی حوکمی ئێعدامی منداڵانی ژێر ١٨ ساڵ تۆمار نەکراوە.
شایانی باسە، لە سەرجەم ئەو ٨٨ بەندکراوەی کە لە مانگی ڕێبەنداندا ئێعدام کراون ، تەنیا ٦ حاڵەت لە سەرچاوە فەرمییەکانی ئێران و ماڵپەڕە پەیوەندیدارەکان بە دەزگای دادوەرییەوە بڵاو کراوەتەوە. هەروەها حوکمی ئێعدامی ٤ بەندکراو بەشێوەی نهێنی و بێ ئاگاداریی بنەماڵە و دەستڕاگەیشتن بە مافی دوایین چاوپێکەوتن لەگەڵ بنەماڵەکەیاندا جێبەجێ کراوە و بەندکراوێکی خەڵکی “ئێسفەراین”یش لە شوێنی گشتی و لەبەر چاوی خەڵک ئێعدام کراوە.