ڕۆژی شەممە ٣١ی مانگی خەرمانان عەلی خامنەیی لە ٣٨مین کۆنفڕانسی کۆنەپەرستانەی “وەحدەتی ئیسلامی”دا کە ئەمساڵ لەژێرناوی “هاوکاریی ئیسلامی بۆ دەستەبەرکردنی بایەخی هاوبەش بە پێداگری لەسەر مەسەلەی فەلەستین” بەڕێوەچوو، سوخەنڕانییەکی کرد. ئەو دوای سەفسەتەی ئاخوندی، دەستیکرد بە دووپاتکردنەوەی قسەوباسێکی شەڕخوازانە و وتی: ”غودەی سەرەتانیی ڕژیمی سەهیۆنیستی، بەهێز و توانای ئیسلام لە قەلبی کۆمەڵگای ئیسلامی دەردەهێندرێ”. ئەم دروشمە بێ بنەمایە کە دەیان ساڵە لەلایەن ئەو و بەرپرسانی دیکەی کۆماری ئیسلامی و گرووپە نیابەتییەکانەوە دووپات دەکرێتەوە لە کاتکێدایە کە لەماوەی یەک ساڵی ڕابردوودا ڕژیمی جەنایەتکاری ئیسرائیل بە کەڵک وەرگرتن لە هەموو ئیمکاناتی تێکنۆلۆژیی شەڕی خۆی و بە هاوکاریی ئەمریکا و دەسەڵاتەکانی دیکەی ڕۆژاوا خەڵکی فەلەستینی کۆمەڵکوژ کردووە و هەموو ژێرخانەکانی غەززەی لەناوبردووە. بەڵام کۆماری ئیسلامی هەتا ئێستا بەکردەوە بۆ ئەم خەڵکە ستەملێکراوە هیچ بەرەنگاربوونەوەیەکی نیزامیی بۆ ڕێگری لەم کوشتارە بەرامبەر دەوڵەتی ئیسرائیل ئەنجام نەداوە. لەم ماوەیەدا ئیسرائیل ژمارەیەکی زۆری لە فەرماندە و بەرپرسانی کۆماری ئیسلامی لە سووریە و لۆبنان و تەنانەت لە ناوەوەی ئێران تیرۆر کردووە بەڵام خامنەیی وەڕووی خۆی نەهێناوە. حکوومەتی ئیسرائیل ئیسماعیل هەنییە ڕێبەری حەماسی لە قەلبی تاران بە شێوەیەکی شەرمەزارکەر تیرۆر کرد، بەڵام عەلی خامنەیی و فەرماندەکانی سپای پاسدارانی ئیسلامی، لەژێر فشاری ئەمریکادا تەنیا ئەوەندەیان بۆ کرا کە هەراهوریایەکی تەبلیغاتی بخەنە ڕێ و بڵێن کە تۆڵە لە ئیسرائیل دەکەینەوە. حکوومەتی ئیسرائیل، ڕژیمی ئیسلامیی لە دێمەشق بۆمباران کرد و ژمارەیەکی زۆر لە فەرماندەکانی سپا و بەرپرسانی ڕژیمی ئیسلامیی ڕاستەوخۆ کوشت، بەڵام کۆماری ئیسلامی بە ڕێکەوتن لەگەڵ دەوڵەتی بایدن، هێرشێکی مووشەکیی بێ ئەسەری بۆسەر ئیسرائیل ئەنجامدا.
بێ عەمەلیی کۆمار ئیسلامی تەنیا پەیوەندی بە غەززە و حەماسەوە نییە. لە ماوەی یەک مانگی ڕابردوودا حکوومەتی تاوانکاری ئیسرائیل ناوەندی قورسایی شەڕی لە غەززەوە بەرەو لۆبنان و حیزبوڵڵا بردووە. لەماوەی هەفتەی ڕابردوودا ئیسرائیل بە هێرشی تیرۆریستیی تەقاندنەوەی “پەیجەرەکان” و بێ سیمەکانی گرووپی تیرۆریستیی حیزبوڵڵا، بە هێرشی ئاسمانی بۆسەر کۆبوونەوەی فەرماندەکانی ئەم گرووپە لە ناوچەی زاحیەی باشووری بەیرووت کە تێیدا ئیبڕاهیم عەقیل فەرماندەی باڵا و ٢٠ فەرماندەی هێزی “ڕزوان”ی حیزبوڵڵان کوژران، وەها زەربەیەکی لەم گرووپە دەستسازەی کۆماری ئیسلامی داوە کە پێکهاتەی ڕێبەری و ژێرخانی پەیوەندی نێوان ڕێبەران و ئەندامانی ئەم حیزبەی پچڕاندووە. لە درێژەی شەڕ و جینۆساید لە غەززە، ئیسرائیل لەئێستادا هەوڵ دەدات شەڕ لەگەڵ حیزبوڵڵا بکاتە شەڕێکی گشتگیر. ڕۆژی دووشەممە ٣ی مانگی ڕەزبەر ئەرتەشی ڕەگەزپەرست و فاشیستی ئیسرائیل لە عەمەلیاتێکی ئاسمانیدا بۆسەر باشووری لۆبنان و بەیرووت، هێرشی کردە سەر ١٣٠٠ ئامانجی دیاریکراو کە بەهۆیەوە ٤٩٢ کەس لەوانە ٣٥ منداڵ کوژران و زیاتر لە هەزار و ٦٤٥ کەسیش برینداربوون. ڕۆژی دووشەممە و سێشەممە سەدان هەزار کەس لە دانیشتووانی باشووری لۆبنان لەدوای هەڕەشەی دەوڵەتی ئیسرائیل مەجبوور بوون ماڵ و شوێنی ژیانیان جێبهێڵین و بەرەو شارەکانی باکوور و ناوەندی لۆبنان ئاوارە بن. لە وەها بارودۆخێکی قەیراناویدا، کۆماری ئیسلامی کە ساڵەهایە دروشمی نابوودیی ئیسرائیل دەڵێتەوە و هێرش بۆسەر حیزبوڵڵا بە هێڵی سوور و بە هێرش بۆسەر خۆی پێناسە دەکات، خۆی بە بەڕێوەبردنی کۆنفڕانسی کۆنەپەرستانەی وەحدەتی ئیسلامییەوە مەشغووڵ کردووە و لە بەرامبەر جەنایاتی ئیسرائیل لە لۆبنان تەنانەت هەڵوێستێکی لاوازتر لە شەڕی غەززەی گرتووەتە بەر. فەرماندەکانی سپای پاسداران و مەقاماتی حکوومەتی ئیسلامی وەها هەڵوێستێکی لاواز و زەبوونانە، “سیاسەتی حەکیمانەی ڕێبەر” بۆ خۆبەدوورگرتن لە شەڕ لەگەڵ ئیسرائیل وەسف دەکەن.
ڕاپۆرتە بڵاوکراوەکان سەبارەت هێرشەکانی ئیسرائیل بۆسەر کۆماری ئیسلامی، حیزبوڵڵای دەستسازی ئەم ڕژیمە و گرووپی حەماس نیشانی دەدەن کە ئیسرائیل بەهۆکاری گەندەڵییەک کە ڕیشەی لە هەموو ئۆرگانەکانی حکوومەتی ئیسلامیدا داکوتاوە، توانیویەتی لەڕێگەی بەکرێگرتنی کەسانێک لەئاستی باڵای دەزگا ئەمنییەکان و سپای پاسداران، بەرنامەکانی خۆی بەڕێوەبەرێت. لە وەها بارودۆخێکدا عەلی خامنەیی لە وتارەکەی لەم کۆنفڕانسە کۆنەپەرستانەیەدا، گلەیی لە نەبوونی یەکگرتوویی لە نێوان وڵاتانی مسوڵمان و نەبوونی “ئۆمەتی ئیسلامی” دەکات. ناوبراو داخی بۆ ئەوە دەربڕی کە بۆچی دوو ملیارد مسوڵمان ناتوانێ لە بەرامبەر دوژمنانی ئیسلامدا ببێتە “ئۆمەتی ئیسلامی”. عەلی خامنەیی سەبارەت بەو نوسخەیە لە “ئۆمەت” کە خۆی مەبەستیەتی وتی: ”ئەگەر بۆ ماوەی دە ساڵ چاپەمەنییەکانی جیهانی ئیسلام لەبارەی یەکگرتوویی ئیسلامیدا بنووسن، شاعیران شێعر بڵێن و زانایانی دینی حوکم دەربکەن، بێگومان ئەم بارودۆخە بەگشتی دەگۆڕدرێ و میللەتەکان وەخەبەر دێن”. پێویستە بوترێ کە حکوومەتی ئیسلامی لەماوەی ٤٥ ساڵی ڕابردوودا بە هەموو ئیمکاناتییەوە هەوڵی داوە، نووسیویەتی، شێعری وتووە و زانا دینییەکانی حوکمی کۆنەپەرستانە و دژەئینسانییان دەرکردووە. بەڵام ئەم دەسەڵاتە نە تەنیا نەیتوانیوە “ئۆمەتی ئیسلامی”ی دڵخوازی خامنەیی پێکبێنێ بەڵکوو زیاتر لە ڕابردوو کەوتووەتە بەر تووڕەیی و بێزاریی کرێکاران، ڕووناکبیران، ژنان، لاوان و توێژەکانی دیکەی کۆمەڵگاوە. خامنەیی بۆ جارێکی تر سەبارەت بە پێکهاتنی ئۆمەتی ئیسلامی دەوڵەتە ئیسلامییەکانی بەوە خەتابار کرد کە “پاڵنەرێکی بەهێزیان نییە.” ئەو داوای لە دەسەڵاتدارانی حکوومەتی ئیسلامی کرد کە ئەنگیزە دروست بکەن و هاندەر بن.
ئەوەش لە کاتێکدایە کە کۆماری ئیسلامی لەماوەی چوار دەیەی ڕابردوودا لەگەڵ ئەمریکای (دوژمنی ئیسلام) لە پەیوەندیدا بووە و یارمەتیی پیلان و بەرنامەکانی ئەمریکا لە ئەفغانستان، عێراق و ناوچەی ڕۆژهەڵاتی ناوەڕاستی داوە. لەماوەی یەک ساڵی ڕابردووشدا ڕژیمی ئیسلامی بە ئامۆژکاریی ئەمریکا خۆی لە ئەنجامدانی کاردەنەوەی نیزامی بەرامبەر بە هێرشەکانی ئیسرائیل بۆسەر کۆماری ئیسلامی و دەست و پەیوەندەکانی بەدوور گرتووە. لەلایەکی دیکەوە سیاسەتی شەڕخوازیی ناوچەیی کۆماری ئیسلامی یارمەتیدەری فاشیستترین و ڕاستترین ڕەوتەکانی ئیسرائیل لە بەدەسەڵات گەیشتن و ئەنجامدانی کۆمەڵکوژی و تاوان دژبە خەڵکی فەلەستین بووە.
ئامانجی کۆماری ئیسلامی لە بەڕێوەبردنی کۆنفڕانسی هەشت ڕۆژە بە بەشداریی دوو هەزار و ٥٠٠ کەس و گرووپی ئیسلامی، داپۆشین و پاساوکردنی لاوازی و بێتوانیی خۆیەتی لە بەرامبەر ئیسرائیلدا. ئەم ڕژیمە دیکتاتۆری و دژەئینسانە لە بارودۆخێکدا وەها کۆنفڕانسێکی پڕ هەزینە بەڕێوە دەبات کە ڕۆژانە لەگەڵ مانگرتن و ناڕەزایەتیی کرێکاران، خانەنشینان، پەرستاران، مامۆستایان و خوێندکاران و توێژەکانی دیکەی کۆمەڵگا بۆ وەدیهاتنی داخوازییەکانیان ڕووبەڕوویە. لە بارودۆخێکدا هەزینەی بەرینی بەڕێوەبردنی کۆنفڕانسی کۆنەپەرستانەی “وەحدەتی ئیسلامی” بەسەر ژیانیاندا دەسەپێنێ کە داخوازیی ڕەوایان بە سەرکوت و زیندان و ئەشکەنجە و ئێعدام وڵام دەداتەوە. عەزمی پۆڵایینی جەماوەری کرێکار و زەحمەتکێشی ئێران بۆ درێژەی خەبات بۆ ڕووخاندنی شۆڕشگێڕانەی ئەم ڕژیمە تاوانکارە، وڵامێکە کە بە کۆماری ئیسلامییان داوەتەوە.