خۆپیشاندانی هەزاران کەسی لە ئاڕژانتین دژی کوژرانی دوو ژن لەم وڵاتە
دوشەممە ۰۷-۰۷-۱۴۰۴ | 29-09-2025
ڕۆژی یەکشەممە ٦ی ڕەزبەری ١٤٠٤، بە هەزاران کەس لە شاری بۆینێس ئایرێس پایتەختی ئاڕژانتین، دژی کوژرانی دوو ژن هاتنە سەر شەقامەکان و خۆپیشاندانیان ئەنجام دا.
بەپێی ڕاپۆرتی پۆلیسی ئاڕژانتین، قوربانیان لە ڕێکەوتی ٢٨ی خەرمانانی ١٤٠٤، بە بیانووی چوون بۆ میوانییەک، لە لایەن باندێکی مافیاییەوە دزراون و بە سەختی ئەشکەنجە دراون. جێگای ئاماژەیە، تەرمی ئەم دوو ژنە پێنج ڕۆژ دواتر لە دەورووبەری باشووری بۆینێس ئایرێس دۆزراوەتەوە. بەپێی ئامارە فەرمییەکان، لە ئاڕژانتین هەر ٣٦ کاتژمێر ژنێک دەبێتە قوربانی توندووتیژی پیاوان. ئامارێک کە دەرخەری سیستماتیکی ژنکوژی لەم وڵاتەیە.