ئەحمەد شەرع سەرۆک کۆماری خۆسەپێنی سووریە، لەپێناوی سەقامگیرکردنی دەسەڵاتەکەی خۆی، شەوی ٩ی مانگی خاکەلێوە لە ڕێوڕەسمێکدا لە کۆشکی “شەعب” کابینەی دەوڵەتی کاتیی خۆی پێکهاتوو لە ٢٣ وەزارەت و سێ ناوەندی حکوومەتی لەوانە (لیژنەکانی فڕۆکەوانی، فتوا و کۆمیتەی وەبەرهێنان)ی ناساند و وەزیران و بەرپرسانی ئەوانیشی دیاری کرد. ئەحمەد شەرع ئەم ژمارەیە لەم کەسانەی بە وەزیرانی کابینەی دەوڵەتی “گۆڕانکاری و بنیاتنان” ناوبرد. لە کابینەکەی ئەحمەد شەرعدا پۆستی سەرۆک وەزیران لابردراوە و بەرپرسایەتیی ئیجرایی دەوڵەتیشی خۆی گرتووەتە ئەستۆ. یەکێک لەو بڕیارانەی کە ئەحمەد شەرع بۆ سەقامگیرکردن و بەهێزکردنی پێگەی خۆی دەریکردووە، دانانی ماوەی درێژخایەنی پێنج ساڵەیە بۆ حکوومەتی “کاتی و ئینتقالی”، کە خۆی و نزیکەکانی سەرۆکایەتی دەکەن. ئەو هەروەها بەرپرسانی وەزارەتخانە سەرەکییەکانیشی لە ناو دەست و پەیوەندەکانی هەیئەتی تەحریری شامدا هەڵبژاردووە. بۆ نموونە ئەسعەد شەیبانی وەک وەزیری دەرەوە و مورهەف ئەبو قەسرە وەک وەزیری بەرگری و ئەنەس خەتاب وەک وەزیری ناوخۆ و محمد یاسر بێرنیەی وەک وەزیری دارایی دەستنیشان کرد.
ئەحمەد شەرع بۆ ڕەواڵەت پارێزی و بۆ نیشاندانی بەشداریی کەمینە نەتەوەیی و ئایینییەکان لە دەوڵەتەکەیدا، “هەند قەبوات”ی هەم وەک نوێنەری ژنان و هەم وەک نوێنەری مەسیحییەکان بۆ پۆستی وەزیری کاروباری کۆمەڵایەتی و کار دیاریکرد و لە دروز و عەلەوی و کوردەکانیش هەر کام نوێنەرێکی لەژێرناوی وەزیر بۆ وەزارەتخانەیەکی ئیجرایی دیاریکرد. ئەو بە خەیاڵی خۆی ئەم کردەوە فریوکارانەیەی وەک بەشدرایی گرووپ و پێکهاتە جۆراوجۆرەکانی سووریە لە کاری دەوڵەتدا بە بیروڕای گشتی قالب کردووە. هەڵبەت حکوومەتە عەرەبییەکان و تورکیە و ئەمریکا و هاوپەیمانانی ئوروپاییش لەپێناوی ئامانج و بەرژەوەندییەکانی خۆیاندا ئەم پێکهاتەیان قەبووڵ و پەسند کردووە. ئەوان کە خۆیان لە سێناریۆی هێنانە سەر کاری ئەحمەد شەرعدا بەشداربوون، لە ماوەی سێ مانگی ڕابردوودا جاروبارە بەڕەواڵەت لەسەر بەشداریی کەمینە نەتەوەیی و ئایینییەکان لە دەوڵەتی نوێی سووریەدا تەئکیدیان کردووە. بەڵام لەڕاستیدا نە ئەحمەد شەرعی خۆسەپێن کە گشت دەسەڵاتی لە سووریە زەوت کردووە و نە دەستنیشاندەکانی کە لە هەڵبژاردنێکی ئازاد و دیموکراتیکدا لە لایەن خەڵکەوە هەڵنەبژێردراون، ناتوانن نوێنەری خەڵکی سووریە بن و لەلایەن ئەوانەوە بەڕسمی بناسرێن.
لەم پەیوەندییەدا پارت و لایەنە کوردەکانی سووریە ڕایانگەیاندووە کە ئەگەرچی بۆ بەشداری کردن لە مەڕاسمی ڕاگەیاندنی کابینەی نوێی دەوڵەتدا بانگهێشت کرابوون، بەڵام بەهۆی ئەوەیکە لە پڕۆسەی پێکهێنانی دەوڵەتدا دەخاڵەت نەدراون، لەم مەڕاسمەدا بەشدارییان نەکردووە. ئەوان ڕایانگەیاندووە کە نە تەنیا محەممەد عەبدولڕەحمان تورکو کە لە حکوومەتی بەشار ئەسەدیشدا بەرپرس بووە و لەلایەن ئەحمەد شەرعەوە وەک نوێنەری کوردەکان بۆ وەزارەتی پەروردە دیاری کراوە بەڕەسمی ناناسن، بەڵکوو لە ڕوانگەی ئەوانەوە حکوومەتی ئەحمەد شەرعیش ڕەسمییەتی نییە و بڕیار و فەرمانەکانی جێبەجێ ناکەن. چونکە لەگەڵ حکوومەتی بەشار ئەسەد جیاوازییەکی زۆری نییە و خەڵکی کوردستانی سووریە نوێنەرایەتی ناکات.
دەسەڵاتی خۆسەری ڕۆژاوا ڕۆژی یەکشەممە ١٠ی مانگی خاکەلێوە بە بڵاوکردنەوەی بەیاننامەیەک وێڕای دژایەتی لەگەڵ قورخکردنی دەسەڵات لە دەستی گرووپێک و پەراوێزخستنی پێکهاتە کۆمەڵایەتییەکانی دیکە ڕایگەیاند: ” دووبارەکردنەوەی هەڵەکانی ڕابردوو نابێتە هۆی بنیاتنانی سووریەی نوێ و قەیرانەکانی ئێستا قووڵتر دەکاتەوە. پێویستە لە پێکهاتەی حکوومەتی نوێی سووریەدا، سیاسەتی دوورخستنەوە و پەراوێزخستنی بەشەکانی دیکەی کۆمەڵگا لەلایەن حکوومەتی نوێوە کۆتایی پێبێت و دەست بکرێ بە بنیاتنانی سووریەیەکی دیموکراتیک، هاوبەش و غەیری موتەمەرکز کە مافی هەموو تاکەکانی سووریە مسۆگەر بکات.” هەروەها لە بەیاننامەکەی دەسەڵاتی خۆسەری کوردستانی سووریەدا هاتووە: ” ئێمە پابەندین بە داواکارییە بنەڕەتییەکانی گەلی سووریە، کە ئەوان لە ڕاپەڕینە جەماوەرییەکانیاندا گەڵاڵەیان کرد، کە بریتین لە دامەزراندنی سووریەیەکی دیموکرات، لامەرکەزی، بە بەشداریی هەموو چین و توێژەکان و دادپەروەری لە هەموو بوارەکاندا.”.
ئەحمەد شەرع بە پێشینەی ئەلقاعیدە و داعشییەوە، دوو هەفتە لەمەوبەر لە هەوڵێکی دیکەدا دەستووری گۆترەی حکوومەتەکەی خۆی کە بەبێ بەشداریی ڕای گشتیی خەڵک داڕێژرابوو، پەسند و واژۆ کرد. سەرچاوەی سەرەکی ئەم دەستوورە بەناو کاتییە، شەریعەت و فیقهی ئیسلامییە. لەو دەستوورە کۆنەپەرستانەیەدا جەخت لەسەر ئەوە کراوە کە سەرۆک کۆمار پیاو و موسڵمان بێت و دەسەڵاتی فراوانی لە هەموو بوارەکاندا بۆ ئەو بەڕەسمی ناسیوە. بێگومان وەها حکوومەتێک بە وەها دەستوور و یاسایەکی بنەڕەتییەوە، ناتوانێت نوێنەرایەتی ئیرادەی خەڵکی سووریە بکات. وەها دەسەڵاتێک نە سەقامگیر دەبێت و نە ئاسایش و ئەمنیەت بۆ خەڵک دێنێت. بەڵکوو سووریە زیاتر بەرەو شەڕی ناوخۆیی و دەستتێوەردانی دەسەڵاتەکانی دەرەوە دەبات. هەمووان بینییان کە ئەم حکوومەتە کۆنەپەرستە ئیسلامییە لە مانگی ڕەشەممەی ڕابردوودا لە هێرشێکی وەحشیانە بۆسەر کەمینەی شیعەی عەلەویدا لە ناوچەی کەناری باکووری ڕۆژاوای سووریە بە بیانووی بوونی پاشماوەکانی حکوومەتی ئەسەد، دەستی کرد بە کوشتار و جەنایەت و لەماوەی سێ ڕۆژدا زیاتر لە هەزار کەس لە منداڵ و خەڵکی مەدەنیی قەتڵوعام کرد. بێگومان وەها حکوومەتێک کە بۆ تەکمیلکردنی پڕۆژەی ڕۆژهەڵاتی ناوەڕاست و بە ئامانجی کورتکردنەوەی دەستی کۆماری ئیسلامی لە سووریە، بە پشتیوانیی ئەمریکا، تورکیە، ئیسرائیل و دەسەڵاتەکانی ڕۆژاوا و دەوڵەتە عەرەبییەکان هاتە سەر کار، ناتوانێ بەرژوەند و قازانج و مافی هاوڵاتییانی سووری دابین بکات.
هەڵبەت خودی ئەحمەد شەرعیش لە ڕێوڕەسمی سوێندخواردنی ئەندامانی کابینەکەیدا، دانی بەوە دانا کە کێشە و ئاستەنگی گەورە لەسەر ڕێگایەتی و جەختی لەسەر هاودەنگی و یەکڕیزیی خەڵک کرد. بەڵام بەدڵنیاییەوە حکوومەتەکەی بە وەها سرووشت و کردارێکەوە، یەکڕیزی و تەبایی خەڵک نابینێت. لەبەر ئەوەی ناتوانێ داخوازییەکانی جەماوەری کرێکار و زەحمەتکێشی سووریە کە ٩٠%یان لەژێر هێڵی هەژاریدا ژیانێکی پڕ لە نەهامەتی بەسەر دەبەن، وەدی بێنێت. قەیرانەکانی ئێستا قووڵتر دەبنەوە و زۆر ناخایەنێت کە بۆ جارێکی تر لەگەڵ بزووتنەوە گەورە کۆمەڵایەتییەکان بەرەوڕوو دەبێتەوە. ئەم حکوومەتە ناتوانێ بەسەر قەیرانە قووڵە سیاسی، ئابووری، کۆمەڵایەتی و فەرهەنگییەکانی سووریەدا زاڵ بێت. ئیدیعاکانی ئەحمەد شەرع بۆ کردنەوەی ئاسۆی نوێ لە بوارەکانی پەروەردە، پیشەسازی و زانستدا و جەختکردنەوەی لەسەر بووژاندنەوەی پیشەسازی و چاکسازیی دارایی و ڕێگریکردن لە گەندەڵی و ڕاکێشانی وەبەرهێنان و هیتر، جگە لە دروشمی بێ بنەما و بەڵێنی جێبەجێنەکراو هیچی تر نابێت.
وتەی ڕۆژ: تەلەڤیزیۆنی حیزبی کۆمۆنیستی ئێران و کۆمەڵە
www.facebook.com/Peshrawcpiran