ئەمڕۆ دووشەممە ٤ی خاکەلێوەی ١٤٠٤، سەرچاوە پزیشکییەکانی غەززە، کوژرانی ٥١ فەلەستینیان لە ئەنجامی هێرشەکانی سپای ئیسرائیل بۆ سەر ناوچە جۆراوجۆرەکانی ئەم کەرتە پشتڕاست کردەوە.
سەرلەبەیانی ئەمڕۆ دووشەممە فڕۆکە جەنگییەکانی ئیسرائیل هێرشی ئاسمانییان کردووەتە سەر ماڵێک لە شەقامی مەنسوورە لە گەڕەکی شوجاعییە لە ڕۆژهەڵاتی کەرتی غەززە. هاوکات تۆپخانەکانی ئیسرائیل دەوروبەری وەزارەتی گەشەپێدانی کۆمەڵایەتی لە بەیت لاهیایان تۆپباران کردووە. هەروەها هێزەکانی ئیسرائیل لە ڕۆژهەڵاتی شاری غەززە بە هێرشی زەمینی و فڕۆکە هێرشیان کردە سەر غەززە و ژمارەیەک کەس کوژران و بریندار بوون. لە لایەکی دیکەوە، تۆپخانەکانی ئیسرائیل باکوور و کەمپی نوسەیرات لە ناوەڕاستی کەرتی غەززەیان تۆپباران کردووە.
لە باشووریش، فڕۆکە جەنگییەکانی ئیسرائیل لە ماوەی چەند کاتژمێرێکدا زیاتر لە 25 هێرشی ئاسمانییان کردە سەر ناوچەکانی خان یونس و کەمپی ئاوارەکان و بە هۆیەوە ژمارەیەک فەلەستینی کوژران و دەیان کەسی دیکەش بریندار بوون.