بەپێی ڕاپۆرتەکان، کاتژمێر ۱ی بەرەبەیانیی ڕۆژی چوارشەممە ۲۹ی ڕەشەممە، هێزەکانی ئیدارەی ئیتلاعاتی ورمێ هەڵیانکوتاوەتە سەر ماڵی بنەماڵەی عیسمەت ئەحمەدی و دوو کچی مێرمنداڵی ناوبراو بەناوەکانی “ئەوین ئەحمەدی” تەمەن ۱۶ ساڵ و “ساریا ئەحمەدی” تەمەن ۱۷ ساڵیان بە بەکارھێنانی توندوتیژییەوە دەستبەسەر کردووە.
سەرچاوەیەکی نزیک لە بنەماڵەی ئەحمەدی وێڕای پشتڕاستکردنەوەی ئەو هەواڵە ڕاگەیاندووە: ۱۶ کەس لە هێزەکانی ئیدارەی ئیتلاعات هێرشیان کردووەتە سەر ماڵی بنەماڵەی ئەحمەدی و وێڕای دەستبەسەرکردنی ئەو دوو کچە مێرمنداڵە، عیسمەت ئەحمەدی بە سەختی لە لایەن ئەو هێزانەوە لێی دراوە و لە هۆش چووە. شایانی باسە، بەیانی هەمان ڕۆژ “ڕۆژبین ئەفسوون” هاووڵاتیی تەمەن ۲۲ ساڵ و پورزای ساریا و ئەوین لە لایەن هێزەکانی ئیدارەی ئیتلاعاتەوە دەستبەسەر کراوە. جێگای ئاماژەیە، ساریا و ئەوین ئەحمەدی پاش ۱۷ کاتژمێر دەستبەسەربوون، دوانیوەڕۆی هەمان ڕۆژ، دوای وەرگرتنی بەڵێننامە و واژۆ لە باوکیان ئازاد کراون، بەڵام زانیارییەک لەسەر چارەنووس و شوێنی ڕاگرتنی ڕۆژبین ئەفسوون لەبەر دەستدا نییە.