دەستبەسەرکرانی هاولاتیەکی بەساڵاچووی خەلکی بۆکان
هەینی ۱۰-۰۴-۱۴۰۱ | 01-07-2022
هاووڵاتییەکی تەمەن ٦٩ ساڵی خەڵکی گوندی قەرەگۆل سەر بە شاری بۆکان و دانیشتووی مەهاباد بە ناوی سولەیمان سالک ڕۆژی سێشەممە ٧ی پووشپەڕ لەلایەن هێزەکانی ئیتلاعاتی رژیمەوە دەستبەسەر و بۆ شوێنێکی نادیار گوازراوەتەوە.
بەگوێرەی ڕاپۆرتەکان، سولەیمان سالک لە خاڵێکی پشکنینی جادەی نێوان مەهاباد و پیرانشار و بە بێ هیچ هۆکارێک لەلایەن هێزەکانی ئیتلاعاتی سپای پاسدارانەوە دەستبەسەر کراوە. هەتا کاتی ئامادە کردنی ئەم هەواڵە، زانیارییەکی ورد لە سەر هۆکاری دەستبەسەرکرانی سولەیمان سالک و ئەو تۆمەتانەی کە خراونەتە پاڵ ناوبراو لەبەر دەستدا نییە.
سەرەڕای تێپەڕینی چوار ڕۆژ لە دەستبەسەر کردنی سولەیمان سالک و سەرباری بەدواداچوونی بەردەوامی بنەماڵەکەی، چارەنووس و شوێنی ڕاگیرانی ناوبراو نادیارە.