Komala

هەواڵدەریی “ئاپا” ڕۆژی سێشەممە ٢٩ی خاکەلێوە لە زاری وەزارەتی نێوخۆی کۆماری ئازەربایجانەوە ڕایگەیاند؛ کە ٢٠ کەسی خۆجێیی کە لەژێر ناوی چالاکیی ئایینی لەلایەن وەزارەتی ئیتلاعاتی ڕژیمی کۆماری ئیسلامیەوە بەکرێ گیرابوون و سیخوڕییان بۆ ئەو ڕژیمە دەکرد، دەستبەسەر کراون.

بەپێی ئەو ڕاپۆرتە، چەند مەلا کە لە حەوزەی عیلمییەی قوم دەرسیان دەخوێند دەستبەسەر کراون و ئەو کەسانە هەوڵی دەستێوەردان لە کاروباری نێوخۆیی و ڕووخانی دەوڵەتی “باكۆ”یان داوە، هەروەها بازرگانیی ماددە هۆشبەرەکانیان کردووە.

جێگەی ئاماژەیە کە پاش هێرشی چەکداری بۆ سەر باڵوێزخانەی کۆماری ئازەربایجان لە تاران و هەوڵدان بۆ تێرۆرکردنی فازڵ مستەفا، نوێنەری مەجلیسی کۆماری ئازەربایجان لە باکو لەلایەن ٤ کەسی سەر بە ڕژیمی ئیسلامیەوە، پێوەندییەکانی دوو وڵاتی ئازەربایجان و کۆماری ئیسلامی زیاتر تێک چوو.