بەپێی ڕاپۆرتەکان، ڕۆژی پێنجشەممە ١٦ی ڕەشەممە، “سیمین چایجی”، شاعیر و نووسەر، “سورەیا خدری” و “بەهار زەنگی بەند”، هەر سێ لە چالاکانی مەدەنی و مافی ژنان و خەڵکی شاری سنە، لە لایەن دادستانی ئەمشارە، بانگ کراون و بەڵێننامەیان سەبارەت بە بەڕێوەبردن و بەشداری کردن لە ڕێوڕەسمی ڕۆژی هەینی، بە بۆنەی ٨ی مارس ڕۆژی جیهانیی ژنان، لێوەرگرتوون.
جێگای ئاماژەیە، سورەیا خدری لە ڕەوتی بزووتنەوەی “ژن ژیان ئازادی” لە ڕێکەوتی ٢٩ی خەرمانانی ١٤٠١، لە لایەن هێزە ئەمنییەکانەوە لە ماڵەکەی خۆی دەستبەسەر کرابوو. ناوبراو هەروەها لە ڕێکەوەتی ٢٢ی خەرمانانی ١٣٩٧یش بۆ ماوەیەک دەستبەسەر کرابوو. هەروەها بەهار زەنگی بەند هەر لە هەمان ڕۆژی سێشەممە ٢٩ی خەرمانانی ١٤٠١ لە لایەن هێزە ئەمنییەکانەوە دەستبەسەر و دوای بیست ڕۆژ بە دانانی بارمتە ئازاد کرابوو. هەروەها سیمین چایچی لە ڕەوتی بزووتنەوەی ژن، ژیان، ئازادی بۆ ماوەیەک دەستبەسەر کرابوو و پێشتر بە تۆمەتی چالاکیە مەدەنییەکانی خۆی و بە مەبەستی پێشگرتن لە بەشداریکردن و بەڕێوەبردنی ڕێوڕەسمەکانی ڕۆژی هەشتی مارس و نەورۆز لە لایەن ناوەندە ئەمنییەکانەوە بانگ کرابوو.