دوو منداڵ بە ناوەکانی “شاکار عومەرزادە” تەمەن ١٠ ساڵ و “بڕیار محەمەدیانی” تەمەن ١٤ ساڵ و هەروەها ٩ هاووڵاتی دیکە بە ناوەکانی “ئارام ئاڵی، کەماڵ قازانی، ڕەحیم قادری، کامران غەزاڵی، عوسمان عومەرنەژاد، شێرزاد شێخی، بێهزاد مەسڵەحەت، بێهروز هەمزەپوور و محەممەد حسێن پوور” لە پەیوەند لەگەڵ بەڕێوەبردنی ڕێوڕەسمی نەورۆز لە شاری سەردەشت، دەستبەسەر کراون.
بەپێی ئەم ڕاپۆرتە، ئەم ١١ هاووڵاتییە ڕۆژی چوارشەممە ٢٩ی ڕەشەممە، لە گوندی دۆڵەگەرم سەر بە شاری سەردەشت لەلایەن ئیدارەی ئیتلاعات دەستبەسەرکراون. شایانی باسە، ئەم هاووڵاتییانە دوو رۆژە دواتر لە یەکەم ڕۆژی خاکەلێوە بە دانانی بارمتە بە شێوەی کاتی و تا کۆتایی دانیشتنی دادگاه لە زیندان ئازاد کراون. هەروەها هاووڵاتییەکی ژن بە ناوی “عەزیزه حسێن پوور” یەکێک لە دایکانی دادخوازی کوردستان، کە ئاگری نەورۆزی لە ڕێوڕەسمی تایبەتی نەورۆزدا هەڵکردبوو، لە لایەن ئیدارەی ئیتلاعات بانگ کراوە و لێپرسینەوەی لەگەڵدا کراوە.