بە پێی ڕاپۆرتەکان، ڕۆژی شەممە ١١ی ڕەشەممە، سەعدوڵڵا ئایینی چالاكی مەدەنی و خەڵکی شاری ئیلام، لە ئەنجامی هێرشی هێزە ئەمنییەكان بۆ سەر ماڵەكەی بە بەكارهێنانی توندوتیژی دەستبەسەر و بە مەبەستی جێبەجێكرانی حوکمی بەندکرانەکەی بۆ زیندانی ناوەندیی ئەمشارە گواسترایەوە.
ئەم هاووڵاتییە لە مانگی بەفرانباری پارەکە لە لایەن لقی یەكی دادگای شۆڕشی ئیلامەوە، حوکمی ١٢ ساڵ و یەک ڕۆژ بەندكرانی بەسەردا سەپێندرابوو كە ئەم حوکمە لە لایەن دادگای پێداچوونەوە پشتڕاست كرایەوە. جێگای ئاماژەیە، چەند كاتژمێرێك دوای خۆپیشاندانی خەڵك لە ئێوارەی سێشەممە ٢٥ی ڕێبەندانی ١٤٠١ لە دێهلوڕان، فەرشاد ئایینی، سەعدوڵڵا ئایینی، عەزیم یادگاری و سەفورا مەلەكی لە لایەن هێزە ئەمنییەكانی ئەم شارە دەستبەسەر كرابوون. سەعدوڵڵا ئایینی لەگەڵ عەزیم یادگاری، حسێن باپیروەند و فەرشاد ئایینی بە نیشانەی ناڕەزایەتی دەربڕین بە بارودۆخیان و درێژكردنەوەی ماوەی دەستبەسەر کرانیان بۆ دوو مانگ لە زیندانی ناوەندیی ئیلام، مانیان لە خواردن گرتبوو.