Komala

ڕێکخراوی منداڵپارێزی نەتەوە یەکگرتووەکان (یونیسێف) لە ڕاپۆرتێکدا ئاماژەی بەوە کردووە، لە سەرەتای ساڵی ٢٠٢٤ەوە تاوەکوو ئێستا، گرووپە چەکدارەکانی سوودان دەستدرێژییان کردووەتە سەر  ٢٢١ منداڵ کە دوو لەسەر سێیان کچ بوون. 
یونیسێف باسی لەوەش کردووە، لەو ٢٢١ منداڵە، ١٦یان تەمەنیان خوارووی پێنج ساڵ و چواریشیان خوار یەک ساڵ بوون. ئەوەشی خستووەتە ڕوو، ئەم حاڵەتانەی دەستدرێژی بۆ سەر منداڵان پێشێلکردنی یاسای نێودەوڵەتین و دەکرێت بە تاوانی جەنگ هەژمار بکرێن.
بە گوێرەی ڕاپۆرتەکەی یونیسێف، بەشێکی کەسوکاری ئەو منداڵە سوودانییانەی دەستدرێژییان کراوەتە سەر، لەبەر چەند هۆیەک، ئامادە نین هیچ زانیارییەک لەسەر حاڵەتەکان ئاشکرا بکەن، لەوانەش: ترس لە گرووپە چەکدارەکان، پێشێلکردنی تایبەتمەندییەکانیان یان تۆمەتبارکردنیان بە هاوکاریی گرووپە چەکدارەکان.