دوای ئەوەیکە ڕۆژی پێنجشەممە ١٤ی مانگی پووشپەڕی ١٤٠٣ لقی یەکی بێدادگای دژەئینقلابی ئیسلامی لە ڕەشت شەریفە محەممەدی چالاکی کرێکاریی دوای حەوت مانگ زیندان و ئەشکەنجەی جەستەیی و دەروونی بە تۆمەتی ئەندامیەتی لە “کۆمیتەی هاوئاهەنگی بۆ یارمەتیدان بە پێکهێنانی ڕێکخراوە کرێکارییەکان” و ئەندامیەتی لە کۆمەڵە موحاکمە و بە ئێعدام مەحکووم کرد، شەپۆلێک لە هاوپشتیی بەرین و بەهێز لە ناوەوە و دەرەوەی وڵات لە ناڕەزایەتی دژبەم حوکمە دژەئینسانییە کەوتە ڕێ و هەروا درێژەی هەیە. لەم قۆناغەدا لە کردەوەیەکی هاوئاهەنگ و هەوڵێکی شکۆمەندی سیاسیدا هەموو ناوەند و ڕێکخراوە کرێکارییەکان، ڕێکخراوەکانی موعەلیمان، خانەنشینان، ناوەندەکانی داکۆکیکاری مافی مرۆڤ، زیندانیانی سیاسی، چالاکان و پێشڕەوانی بزووتنەوەی کرێکاری لە زیندان و دەرەوەی زیندان، ڕێکخراو و ناوەندەکانی بەرگریکاری مافی کرێکاران، منداڵان و ژنان و … لە ناوەوە و لە دەرەوەی وڵات بە دەرکردنی بەیاننامە یان بە بەڕێوەبردنی کۆبوونەوە دژبەم حوکمە جەنایەتکارانەیە دەستیان دایە ناڕەزایەتی و خوازیاری ئازادیی بێ شەرت و مەرجی ئەم چالاکە کرێکارییە بوون. هەتا ئێستا لە ئاکامی ئەم هەڵمەتە مەزنە ناڕەزایەتییەدا، شەریفە محەممەدی کە بە تاوانی دیفاع لە مافی کرێکاران بە زیندان و ئەشکەنجە و ئێعدام مەحکووم کراوە بووەتە سیمایەکی ناسراو و خۆشەویستی کرێکاران و زەحمەتکێشان و هەموو ئینسانێکی ئازادیخواز و بەرابەری تەڵەب لە سەرتاسەری ئێران و لە هەمان کاتدا مۆری شەرمەزاری و ڕسوایییەکی دیکە لە ناوچاوانی ڕژیمی تاوانکاری کۆماری ئیسلامی دراوە.
ئێستا بۆ هەموو ناوەند و چالاکانی کرێکاری ڕوون بووەتەوە کە دەرکردنی ئەم حوکمە جەنایەتکارانەیە دژبە شەریفە محەممەدی بەر لەوەیکە حوکمێکی یاسایی لەدژی ئەم چالاکە کرێکارییە بێت، حوکمێکی سیاسییە و هەموو چالاکانی بزووتنەوەی کرێکاریی کردووەتە ئامانج. فشاری سەکوت و گرتن و ئەشکەنجەی چالاکانی کرێکاری، دەرکردنی حوکمی ئێعدام بۆیان، و یان مەحکووم کردنیان بە مەرگی شێنەیی لە پشت میلەکانی زیندان لە نیزامی کۆماری ئیسلامیدا دیاردەیەکی تازە نییە و بەدرێژایی تەمەنی ئەم ڕژیمە لەئارادا بووە. بەڵام پەرەپێدانی ئەمجۆرە فشارانە بۆسەر چالاکانی بزووتنەوەی کرێکاری لە بارودۆخی سیاسیی ئێستادا، لە بنەڕەتدا هێرشێکی بەرگرانەیە کە هۆکاری دیاریکراوی هەیە. یەکێک لەم هۆکارانە دەتوانێ دانوستانی ئەتۆمیی پشتی پەردەی ڕژیم لەگەڵ ئەمریکا بۆ لابردنی بەشێک لە گەمارۆکان بێت. ڕژیم لە کە لەژێر فشارەکانی ئەمریکادا ئیقتداری کەوتووەتە ژێر پرسیارەوە نیگەرانی ئەوەیە کە مەبادا کرێکاران و ئەو خەڵکەی کە کارد گەیشتووەتە سەر ئێسقانیان، هاوسەنگیی تازەی هێز بکەنە زەمینەیەک بۆ پەرەپێدانی ناڕەزایەتی و خەباتی خۆیان. لەلایەکی دیکەوە لەژێر گوشاری بزووتنەوەی شۆڕشگێڕانەی ژینادا قەیرانی حکوومەت و ناکۆکییەکانی نێوان باندەکانی حکوومەت پەرەی سەندووە، بەجۆرێک کە لە شانۆی هەڵبژاردنەکانی ئەم دواییەدا سەرەڕای دەخاڵەتی ڕاستەوخۆی فەرماندەکانی سپای پاسداران، باڵی ئوسوولگەرا نەیتوانی لەسەر ناساندنی کاندیدێک یەکدەنگ بێت و لەئاکامدا پزیشکیان لە سندووقی دەنگدان سەری هێنایە دەر. لەم بارودۆخەدا سەرانی ڕژیم نیگەرانی ئەوەن کە مەبادا دانانی ئیسلاح تەڵەبێکی ملکەچی ویلایەت لەسەر کورسی سەرۆک کۆماری، لەلایەن خەڵکەوە بە پاشەکشە لە قەلەم بدرێت و لەم پاشەکشەیە وەک سەکۆیەک بۆ هێرش بۆسەر گشت دەسەڵاتی سیاسی کەڵکی لێوەرگرن. لەلایەکی دیکەوە کۆماری ئیسلامی دەزانێ کە بەرینایی بێوێنەی تەوەرۆم و گرانی و هەژاری و فەلاکەتی ئابووریی ئێستا، کە بنەماڵە کرێکارییەکان و بەشمەینەتانی کۆمەڵگای وەگیان هێناوە، بەشێوەی حەتمی مانگرتن و ناڕەزایەتیی کرێکاری و جەماوەری بەدوای خۆیدا دێنێت.
لەم پەیوەندییەدا سەرانی ڕژیم کە لە دەورونەخشی پێشڕەوانی بزووتنەوەی کرێکاری لە قۆناغی ئێستادا بەباشی ئاگادارن، دەیانهەوێ بەم فشارانە هۆشدار بە چالاکانی بزووتنەوەی کرێکاری بدەن کە “مەبادا هەڵە بکەن” و بیر لە پەرەپێدانی خەباتی کرێکاری بکەنەوە. پەرەپێدانی فشار لەدژی هەڵسووڕاوانی کرێکاری لە ئەسڵدا هێرشێکی بەرگرانەیە بۆ بەرەنگاربوونەوە لەگەڵ مەترسیی پەرەستاندنی ناڕەزایەتیی کرێکاری و جەماوەری. واقعیەت ئەوەیە کە داسەپاندنی فشار لەلایەن کۆماری ئیسلامی بۆسەر ڕێبەرانی کرێکاری و بایەخنەدان بە فشاری ناوخۆیی و نێونەتەوەیی بۆ ئازادکرانیان، سیاسەتێکی ئاگاهانەیە کە لە باڵاترین ئاستەکانی ڕژیمدا بڕیاری لەسەر دراوە. کەوابوو بێگومان دەوڵەتی پزیشکیان و ڕێفۆرمخوازانی حکوومەتیش بە ئەندازەی باڵی سپای پاسدران و ئوسوولگەراکان لە بەرنامەڕێژی بۆ زیاتر کردنی فشار بۆسەر چالاکانی کرێکاری و چالاکانی بزووتنەوە کۆمەڵایەتییەکانی دیکە، بەتوندی هەڵسووکەوت دەکەن. هەموو باڵەکانی حکوومەت بەباشی لەوە گەیشتوون کە لە جەرگەی قەیرانی ئابووری و درێژەی کێشمەکێش و ناکۆکیی باڵەکانی حکوومەتدا، چ مەترسییەک و لەلایەن کامە بەشی کۆمەڵگاوە هەڕەشە لە چینی سەرمایەدار و ڕژیمی پشتیوانی دەکات.
بۆ بەرەنگاربوونەوە لەگەڵ هێرشی بەرنامە بۆ داڕێژراوی ڕژیم ڕێگایەک بێجگەلە پەرەپێدانی خەبات بۆ ئازادکردنی کرێکارانی بەندکراو و ئازادیی سەرجەم زیندانیانی سیاسی بوونی نییە. چالاکانی کرێکاری بە ئەزموون بۆیان دەرکەوتووە کە هەرجۆرە بێدەنگبوون و بێجووڵەیی بەرامبەر بەم هێرشانە، سەرانی ڕژیم لە درێژەدانی جیددیتر دەکات. پێویستە کەمپەینی دیفاع لە ئازادیی بێ شەرت و مەرجی شەریفە محەممەدی بکەینە کەمپەینی دیفاع لە ئازادیی ڕەزا شەهابی، حسێن سەعیدی، داود ڕەزەوی و هەموو کرێکاران و موعەلیمانی بەندکراو و زیندانیانی سیاسی. پێویستە بەر دەرگای زیندانەکان بکەینە شوێنی پشتیوانیکردن لە ناڕەزایەتیی بنەماڵە کرێکارییەکان و بنەماڵەی زیندانیانی سیاسی لەپێناوی ئازادکرانی ئەم ئازیزانەدا. لە دەرەوەی وڵات، حیزب و ڕێکخراوە چەپ و کۆمۆنیستەکان و ناوەندەکانی بەرگریکاری بزووتنەوەی کرێکاری و خەباتی ئازادیخوازانە لە ئێران نابێ هیچ دەرفەتێک بۆ بەرپاکردنی هەڵمەتی سیاسی و تەبلیغی بۆ پشتیوانی لە کرێکارانی بەندکراو و بەندکراوانی سیاسی و لەقاودانی جەنایەتەکانی ڕژیم لەدەست بدەن.