بەپێی ڕاپۆرتەکان لە ماوەی یەک حەوتووی ڕابردوودا کۆڵبەرێک کوژراوە و ١٠ کۆڵبەری دیکەش بەهۆی تەقەی ڕاستەوخۆی هێزەکانی ڕژیم لە سنووری پارێزگاکانی ڕۆژاوای ئێران لەوانە کوردستان، ئازەربایجانی غەربی و کرماشان بریندار بوون. ئێوارەی ڕۆژی سێشەممە ٩ی سەرماوەز لە سنووری نەوسوودی سەربە شارستانی پاوە لە پارێزگای کرماشان، ژمارەیەکی دیکە لە کۆڵبەران کرانە ئامانجی تەقەی هێزە چەکدارەکانی کۆماری ئیسلامی و لەئاکامدا دوو کۆڵبەر بەناوەکانی محەممەد نەوسوودی و ئەمیر وەیسی بریندار بوون. لە ناوچەی سنووریی هەنگەژاڵەی سەربە شارستانی بانە کۆڵبەرێک بەناوی فەرەیدوون محەممەدیی ٣٣ ساڵ تەمەن، و گرووپێکی دیکە لە کۆڵبەران لە لایەن هێزەکانی پازگای “زەڵێ” لە ناوچەی سنووریی “چۆمان”ی سەربە شارستانی بانە تەقەیان لێکرا و بەهۆیەوە لاوێکی ١٩ ساڵ تەمەن بەناوی عادڵ عەلیپوور کوژرا و کۆڵبەرێکی دیکە بەناوی یاسین ئەمین پوور بریندار بوو. بە پێی ئامارەکان لە مانگی خەزەڵوەری ئەمساڵدا ٦ کۆڵبەر لە ناچەی سنوورییەکانی پارێزگاکانی ڕۆژئاوای ئێران گیانیان لەدەست داوە. لەو نێوەدا ٣ کەس بەهۆی وەرگەڕانی ماشێن لە مەسیری ڕێگای کۆڵبەری، ٢ کەس بەهۆی تەقەی هێزەکانی سەر سنوور گیانیان لەدەست دا و منداڵێکی کۆڵبەر بەناوی سرووش ڕەحمانی پاش ئەوەیکە هێزە ئینتزامییەکانی سەر سنوور دەستیان بەسەر بارەکەی داگرت، خۆی کوشت و کەسێکی دیکەش بەهۆی تەقینەوەی مین بریندار بوو. لە ئاکامی سیاسەتی کۆڵبەرکوژیی ڕژیم، هەموو حەفتەیەک هەواڵی کوژرانی کۆڵبەرانی بێدیفاع لە ناوچە سنوورییەکان، بنەماڵەی قوربانییان و خەڵکی ئەم ناوچانە نوقمی غەم و پەژارە دەکات. لە لایەکی دیکەشەوە ڕەشبگیری، ئەشکەنجەی کۆڵبەران و تەنانەت شاردنەوەی تەرمەکانیان، بووەتە ڕەواڵی کاری هەمیشەیی ئەم دەسەڵاتە.
له باروودۆخێكدا كه قه‌یرانی كۆرۆنا له ئێران ڕۆژانه سه‌دان كه‌س ده‌كاته قوربانی، كرێكاری كۆڵبه‌ر بۆ وه‌ده‌ست هێنانی بژێوی خۆی و بنه‌ماڵه‌كه‌ی، سه‌ره‌ڕای مه‌ترسیی تووش بوون به كۆرۆنا، ده‌بێ مه‌ترسیی به‌ربوونه‌وه له به‌رزایی، كه‌وتنه ژێر ئاوی ڕووبار، سه‌رمابردوویی به‌هۆی به‌فر و به‌سته‌ڵه‌ك، پێ دانان له‌سه‌ر مینه به‌جێماوه‌كانی شه‌ڕی ئێران و عێراق و سه‌رئه‌نجام مه‌رگ به‌هۆی ته‌قه‌ی ڕاسته‌وخۆی هێزه به‌كرێگیراوه‌كانی سه‌رمایه، به‌گیان قه‌بووڵ بكات. ئه‌و كۆڵبه‌رانه‌ی وا بۆ په‌یدا كردنی تیكه‌یه‌ك نان ڕێگای مه‌رگ ده‌گرنه به‌ر و ڕوو ده‌كه‌نه كاری گواستنه‌وه‌ی كاڵا له‌سه‌ر سنووره‌كان، له ڕاستیدا، هێزی كاری بازرگانان و ده‌ڵاڵانێكن كه له شار و ئاواییه سنووریه‌كاندا جێگیرن. ئه‌وان له خاڵێكی سنوورییه‌وه كاڵاكان ڕه‌وانه ده‌كه‌ن و له خاڵێكی تره كاڵاكانیان به‌ده‌ست ده‌گات، به بێ ئه‌وه‌یكه هیچ مه‌ترسیه‌ك هه‌ڕه‌شه‌یان لێبكات، گیرفانیان پڕ ده‌كه‌ن و حه‌قده‌ستێكی زۆر كه‌میش ده‌ده‌نه كۆڵبه‌ره‌كان. له ماوه‌ی ساڵانی ڕابردوودا ڕكوودی به‌رچاوی ئابووریی ئێران و به‌ربه‌سته ماڵییه‌كانی كۆماری ئیسلامی بوونه‌‌ته هۆی گه‌شه‌ی بازرگانیی كاڵای “قاچاخ” له ناوچه سنووریه‌كانی كوردستان. له ماوه‌ی هه‌موو ئه‌م ساڵانه‌دا، پێ به پێی به‌رزبوونه‌وه‌ی ئاستی بێكاری له شاره‌كانی كوردستان، ژماره‌یه‌كی زیاتر له كرێكارانی بێكار ڕوویان كردووه‌ته كۆڵبه‌ری و به هه‌ر ڕاده‌یه‌كیش ژماره‌ی كۆڵبه‌ران زیادیان كردووه، ئاستی حه‌قده‌سته‌كانیان هاتووه‌ته خوارتر. كۆڵبه‌ران ئه‌گه‌ر له ڕابردوودا بۆ هه‌ڵگرتنی هه‌ر كیلۆیه‌ك بار، بڕی ١٧ تا ١٨ هه‌زار تمه‌نیان وه‌رده‌گرت، له ئێستادا ناچارن به ١٠ تا ١٢ هه‌زار تمه‌ن بۆ هه‌ر كیلۆیه‌ك، كۆڵه‌كه‌یان له دەربازگەی مه‌رگ، تێپه‌ڕێنن. ئه‌وان بۆ ده‌رهێنانی نان ناچارن كۆڵبه‌ری بكه‌ن و هه‌ر ئه‌و جه‌بری نانه‌شه وایان لێده‌كات كه مه‌ترسیی و دژوارییه‌كان، به گیان قه‌بووڵ بكه‌ن. به‌ڵام ئه‌گه‌ر چوونه‌سه‌ره‌وه‌ی ژماره‌ی كۆڵبه‌ران ده‌بێته هۆی هاتنه‌خواره‌وه‌ی له ڕاده‌به‌ده‌ری حه‌قده‌سته‌كانیان، له به‌رامبه‌ردا، كه‌سب و كاری به‌شێك له بورژوا ـــ بازرگانه‌كانی كورد، پڕ ڕه‌ونه‌قتر ده‌كات. ئه‌وان بۆ وه‌ده‌ست هێنانی قازانجی زیاتر، كایه به گیان و ژیانی كۆڵبه‌ران ده‌كه‌ن.
له‌ژێر ده‌سه‌ڵاتی ڕژیمی كۆماری ئیسلامیدا، كۆڵبه‌ری و هه‌نگاو هه‌ڵگرتن له جاده‌كانی مه‌رگ بۆ وه‌ده‌ست هێنانی نان، “پیشە” به ئه‌ژمار دێت. ئه‌م باروودۆخه سه‌خت و دژواره‌ی كه ڕژیم به‌سه‌ر كرێكاران و جه‌ماوه‌ری زه‌حمه‌تكێشی سه‌ر سنووره‌كانی دا سه‌پاندووه ته‌نیا گۆشه‌یه‌كه له دواهاتی سیاسه‌تی شووێنیستیی كۆماری ئیسلامی دژبه خه‌ڵكی كوردستان. ڕژیمی ئیسلامی بە نیگای ئەمنییەتی و میلیتاریزەکردنی سنوورەکان و درووستکردنی ژمارەیەکی زۆر بورجی دیدەبانی بۆ کوشتنی کۆڵبەران، کوردستانی کردووەتە قەتڵگای ئەم ئینسانە شەریف و زەحمەتکێشانە. ژێنێڕاڵەکانی سپای پاسداران لەحاڵێکدا بە بیانووی پاراستنی ئەمنییەت، کۆڵبەران دەدەنە بەر گولـله کە لە دڵی پایتەختدا زانا ئەتۆمییەکانیان یەک لە دوای یەک تیرۆر دەکرێن، بەڵگەی نهێنییە ئەتۆمییەکانیان دەدزرێت و ناوەندە ئەتۆمییەکانیان دەبنە ئامانجی هێرشی درۆنەکان. هه‌ر ئه‌م سیاسه‌ت و پێداگرییه‌ی ڕژیمی كۆماری ئیسلامی بۆ درێژه دانی ئه‌م باروودۆخه، به‌ستێنه‌كانی درێژه‌ی بزووتنه‌وه‌ی شۆڕشگێڕانه‌ی كوردستانی خوڵقاندووه. ئه‌م بزووتنه‌وه ڕادیكاڵه‌ی كه تێیدا كرێكاران و زه‌حمه‌تكێشان و كۆڵبه‌رانی كوردستان، هێزی بزوێنه‌ری سه‌ره‌كین، بزووتنه‌وه‌یه‌كه كه بێبه‌شی و بێ مافی به چاره‌نووسی حه‌تمیی خه‌ڵكی سته‌ملێكراوی كوردستان نازانێت و عه‌زمی جه‌زم كردووه كه كۆتایی به هه‌موو به‌دبه‌ختی و نه‌هامه‌تییه‌كان بێنێت. بێگومان، كرێكاران و خه‌ڵكی زه‌حمه‌تكێشی كوردستان له‌و خه‌باته شۆڕشگێڕانه و مافخوازانه‌یه‌‌دا به ته‌نیا نین و كرێكارانی حەت ته‌په، كرێكارانی سه‌نعه‌تی نه‌وت و پێترۆشیمی، سونگونی وەرزەقان و بزووتنەوەی موعەلیمان و جه‌ماوه‌ری كرێكار و زه‌حمه‌تكێشی باقیی شوێنه‌كانی ئێران، كه ئه‌وانیش له ده‌سه‌ڵاتی ڕژیمی ئیسلامی وه‌گیان هاتوون و له خه‌بات بۆ دابین كردنی ژیان و بژێوی خۆیان، هیچ شتێكیان بۆ له‌ده‌ست دان نییه، له ڕیزی چینایه‌تیی كۆڵبه‌ران دان. هه‌ڵسووڕاوان و پێشڕه‌وانی بزووتنه‌وه‌ی كرێكاریی ئێران پێویسته، ئاشنا كردنی هرچی زیاتری كرێكاران و بیروڕای گشتی له‌گه‌ڵ باروودۆخی مه‌ترسیداری كۆڵبه‌ران و ژان و ئازاره‌كانیان و خه‌باتی مافخوازانه‌ی كۆڵبه‌ران، به ئه‌ركی خۆیان بزانن و پێویسته دژبه كوشتاری كۆڵبه‌ران و له پێناو دیفاغ له مافی ئینسانیی هاوچینه‌كانیان، له هیچ هه‌ڵ و تێكۆشانێك ده‌ریغ نه‌كه‌ن.
لە باروودۆخێکدا کە کوشتاری کۆڵبەران درێژەی هەیە، چالاکان و پێشڕەوانی بزووتنەوەی کرێکاری و مرۆڤە خەباتکارەکان لە کوردستان کە لە ماوەی ساڵانی ڕابردوودا لە جەرگەی خەبات دژبە ملهوڕی و زۆرداریی ڕژیم پێکەوە پەیوەند دراون، پێویستە بۆ وەڕێخستنی هەڵمەتی سیاسی و تەبلیغی و پێکهێنانی بزووتنەوەی ناڕەزایەتی دژبە بێکاری و دژبە کوشتنی کۆڵبەران دەست بخەنە ناو دەستی یەک ترەوە.