لە درێژەی شەپۆلی دەستبەسەرکردن و ڕفاندنی هاووڵاتییانی کوردستان لەلایەن هێزە حکومەتییەکانەوە، سێ هاووڵاتی تەمەن ژێر ١٨ ساڵ بە ناوەکانی دانیال کەبوودوەند و حوسێن ئەحمەدی، خەڵکی بیجاڕ و موبین سەلیمی نژاد خەڵکی کامیاران ڕفێندراون.
سەرلە ئێوارەی ڕۆژی پێنجشەممە، ١٢ی خەزەڵوەر، دانیال کەبوودوەند، تەمەن ١٧ ساڵ و حوسێن ئەحمەدی، تەمەن ١٧ ساڵ و خەڵکی بیجاڕ لەلایەن هێزەکانی ڕژیمەوە ڕفێندراون.
هەروەها سەرلەئێوارەی ڕۆژی شەممە، ١٤ی خەزەڵوەر، موبین سەلیمی نژد، تەمەن ١۶ ساڵ و خەڵکی شاری کامیاران دەستبەسەر کراوە و بۆ شوێنێکی نادیار گوازراوەتەوە. بە وتەی شایەحاڵان، هێزە سەرکوتگەرەکان شەو موبین سەلیمی نژادیان کێشاوەتەوە دەرەوە و دەستبەسەریان کردووە و بردوویانە.
شایانی باسە کە تا ئێستا هیچ زانیارییەکی دروست لەسەر بارودۆخ و شوێنی ڕاگیرانی ئەو سێ هاووڵاتییە دەستبەسەرکراوە کە تەمەنیان ژێر ١٨ ساڵە، لە بەردەستدا نییە و هیچیان بە بنەماڵەکانیان ڕانەگەیاندووە.