بەپێی ڕاپۆرتەکان، داواکاریی پێڕاگەیشتن بە دۆسییەی پەرهام پەروەری لە دەستبەسەر کراوانی بزووتنەوەی ژن، ژیان، ئازادی، لەلایەن دیوانی باڵای وڵاتەوە قەبووڵ کراوە.
مازیار تاتایی پارێزەری پەرهام پەروەری بە ڕاگەیاندنی ئەم هەواڵە لە لاپەڕەی ئێکسی خۆیدا نووسیویەتی: “سێیەمین داواکاریی پێڕاگەیشتن بە دۆسییەی پێشکەشکراو بۆ پەرهام پەروەری لەلایەن لقی پێڕاگەیشتن لە دیوانی باڵای وڵاتەوە قەبووڵ کراوە.” ناوبراو وتیشی: “بە هەڵوەشانەوەی سزای دەرکراو، هیوادارم لە لقی هاوتەریبیش بە مەبەستی نەبوونی لایەنە یاساییەکانی سزای موحاربە، بڕیاری بێتاوانبوون بۆ ناوبراو دەر بکرێت.” ڕۆژی پێنجشەممە ١٠ی خەزەڵوەری ١٤٠٣، پەرهام پەروەری، لە زیندانی ئێرانشارەوە بۆ زیندانی زاهێدان ڕاگوێزرابوو. جێگای ئاماژەیە، ئەم بەندکراوە سیاسییە لە زیندانی ناوەندیی ئێرانشار، بە پێچەوانەی یاسای جیاکردنەوەی سزاکان، لە بەندی تۆمەتباران بە تاوانەکانی ماددەی هۆشبەر و کوشتن ڕاگیرابوو.