بەپێی ڕاپۆرتەکان، لەم دواییانەدا ڕاوین موتاعی، کارناسی باڵای کیمیا و مامۆستای قوتابخانەکانی دێهگولان بە ۲۳ ساڵ پێشینەی مامۆستاییەوە، لە لایەن دادگای پێداچوونەوەی وەزارەتی پەروەردە و بارهێنانی تاران، حوکمی دوورخستنەوە لە کاری بەسەردا سەپێندرا. ئەو حوکمە ڕۆژی ۲۶ی ڕەشەممەی ١٤٠٣ بەو هاووڵاتییە ڕاگەیێندراوە.
بەوتەی سەرچاوەیەکی ئاگادار، ڕاوین موتاعی بە “پڕۆپاگەندەی دژ بە حکومەت” لە ڕێگای چالاکی لە تۆڕە کۆمەڵایەتییەکان، “بێڕێزی بە حکومەت”، “بێڕێزی بە ئەندامانی سپای پاسداران”، “بێڕێزی بە ئیسلام” و “پڕۆپاگەندە بە قازانجی گرووپە دژبەرەکانی حکومەت” تۆمەتبار کراوە. جێگای ئاماژەیە،ئەو هاووڵاتییە مانگی پووشپەڕی ساڵی ڕابردوو لە لایەن دەستەی ڕاگەیشتن بە سەرپێچییە ئیدارییەکان، حوکمی یەک ساڵ دوورخرانەوە لە کاری بەسەردا سەپێندرا کە پاش ناڕەزایەتیی بەو حوکمە لە لایەن دادگای پێداچوونەوەی وەزارەتی پەروەردە و بارهێنانی تاران، حوکمی دەرکران لە کاری بەسەردا سەپێندرا.