ڕۆژی چوارشەممە ١٨ی مانگی خەزەڵوەر لە چلەمین ڕۆژی کوشتاری جەنایەتکارانەی زاهیدان کە بەهۆیەوە زیاتر لە ٩٠ کەس گیانیان بەخت کرد و پتر لە ٣٠٠ کەس بریندار بوون، ناڕەزایەتیی بەرین بۆ پشتیوانی لە خەڵکی بەلووچستان بەڕێوەچوو. خوێندکارانی خەباتکار و شۆڕشگێڕ لە زۆرێک لە زانکۆکان نەتەنیا نەچوونەوە سەر کلاسەکانیان بەڵکوو لە زانکۆکان دەستیان دایە ناڕەزایەتی و خۆپیشاندان و وتنەوەی دروشم دژبە کۆماری ئیسلامی. لە شارەکانی سیستان و بەلووچستان، لە زۆربەی شارەکانی کوردستان و لە زۆرێک لە گەڕەکەکانی تاران و شارەکانی تر خەڵکی ناڕازی هاتنە سەر شەقام و دژبە دەسەڵاتی کۆماری ئیسلامی دەستیان دایە ناڕەزایەتی.
لەئێستادا نزیکەی دوو مانگ لە دەستپێکی ئاخێزی شۆڕشگێڕانەی “ژینا” تێپەڕیوە و ڕێژیم لەم ماوەیەدا بە هەموو توانایەوە دژبە جەماوەری ناڕازی دەستی داوەتە سەرکوت و جەنایەت تا بە خەیاڵی خۆی ئەم ئاخێزە شۆڕشگێڕانەیە کە ڕیشەی لە ٤٣ ساڵ دەسەڵاتی سەرکوت و دیکتاتۆریی کۆماری ئیسلامی دایە خامۆش بکات. عەلی بەهادۆری جەهرۆمی، وتەبێژی دەوڵەتی ڕەئیسیی قاتڵ زەرفییەتی جەنایەتی کۆماری ئیسلامیی بەڕوونی بەیان کرد و وتی: “بۆ دەوڵەت وەک ئاوی خواردنەوەو وا بوو کە لە ڕۆژانی یەکەمدا ئیجازەی بەکارهێنانی گولـلەی جەنگی بە هێزی ئینتزامی بدات و خەڵک جۆرێک بترسێن کە نەوێرن لە ماڵ بێنە دەر”. هەڵبەت ڕێژیم هەتا ئێستاشی گەلێک جەنایاتی ئەنجام داوە و لە زۆر شوێن گولـلەی جەنگییان دژبە خەڵکی خەباتکار و ناڕازی بەکار هێناوە و بەهۆیەوە ژمارەیەکی زۆر گیانیان بەخت کردووە و بریندار بوون.
لەو ماوەیەدا دەسەڵاتی داماوی کۆماری ئیسلامی بۆ دامرکاندنی ئاخێزی شۆڕشگێڕانەی جەماوەر دەستی داوەتە کوشتار و جەنایاتێک کە هەر کامیان بەتەنیا تاوانی شەڕ دێنە ئەژمار. بۆ نموونە هێرشی بەرنامە بۆ داڕێژراوی دەزگا ئەمنییەکانی ڕێژیم بۆسەر زیندانی ئێڤین لە شەوی ٢٣ی مانگی ڕەزبەر کە بەهۆیەوە لانیکەم هەشت کەس لە بەندکراوان گیانیان بەختکرد و ژمارەیەکی زۆریش بریندار بوون. حزووری خەڵکی خەباتکار بەتایبەت بنەماڵەی بەندکراوان لەو شەوەدا لە دەورووبەری زیندان لە کوشتاری بەرینی بەندکراوان ڕێگریی کرد. نموونەیەکی دیکەی پیلانگێڕیی دەزگا ئەمنییەکان بەئامانجی پەرەپێدانی کەشوهەوای ترس و وەحشەت، هێرشی چەکدارانە بۆسەر مەحوەتەی “شاچراغ”ی شیراز بوو لە ڕۆژی چواری خەزەڵوەردا کە بەهۆیەوە ١٣ ئینسانی بێدیفاع گیانیان بەخت کرد و زیاتر لە ٢٠ کەسیش برینداربوون. هەمان ڕۆژ ڕێژیم لە سێناریۆیەکدا ئەو هێرشەی بە “داعش” نیسبەت دا و ئیدیعاشی کرد کە داعش بەرپرسیاریەتیی ئەو هێرشەی گرتووەتە ئەستۆ. بەڵام خەڵکی وشیار و خەباتکار کە لەگەڵ ماهییەتی درۆزنانە و جەنایەتکارانەی ڕێژیم ئاشنان، دەستبەجێ پەردەیان لەسەر ئەم پیلانەی ڕێژیم لادا و بە دروشم وتیان خامنەیی قاتڵی شاچراغە. بەدوای ئەوەدا وەزارەتی ئیتلاعاتی کۆماری ئیسلامی لە سێناریۆیەکی ڕسوای دیکەدا ڕۆژی دووشەممە ١٦ی مانگی خەزەڵوەر ئیدیعای کرد کە: ”لە هێرشی چەکداری بۆسەر حەرەمی “شاچراغ” ٢٦ تیرۆریست دەستگیر کراون و مۆرەی سەرەکیی ئەم هێرشە کەسێکی خەڵکی کۆماری ئازەربایجان بووە”. کوشتاری خەڵک لە ڕۆژی هەینیی ڕابردوو ١٣ی خەزەڵوەر لەلایەن هێزە بەکرێگیراوەکانی کۆماری ئیسلامی لە خاش جەنایەتێکی دیکە بوو هاوشێوەی جەنایەتی زاهیدان. لەو ڕۆژەدا هێزەکانی ڕێژیم بەتەقەی ڕاستەوخۆی گوللـەی جەنگی بەرەو نوێژخوێنەکان، ١٦ ئینسانی دیکەیان کوشت و ژمارەیەکی زیاتریشیان بریندار کرد. توندوتیژیی بەرین و جەنایاتێک کە ڕێژیم لە کوردستان و بەلووچستان بە پاساوی چالاکیی چەکداری و بە ئامانجی درووستکردنی تەفرەقە و دوژمنایەتی لە نێوان خەڵکدا ئەنجامی داوە بە وشیاری و ئاگاهیی ڕێبەرانی کردەوەیی ئەم ناڕەزایەتییانە ڕسوا بووە.
لەم کوشتارانەدا و لە جەرەیانی ڕووبەڕووبوونەوەی ناڕازییان لەگەڵ هێزە سەرکوتگەرەکانی کۆماری ئیسلامی هەتا ئێستا زیاتر لە ٣٢٠ کەس لە ژنان و پیاوانی خەباتکار چ لەسەر شەقامەکان و بەتەقەی ڕاستەوخۆی هێزە سەرکوتگەرەکان و چ لەژێر ئەشکەنجەی وەحشیانە لە شەقام و لەناو سیاچاڵەکانی حکوومەتی ئیسلامیدا گیانیان بەخت کردووە و لانیکەم ٥٠ کەسیش لەم ژمارەیە منداڵ بوون و کۆماری ئیسلامی بەدرووست لەلایەن خەڵکەوە پێی دەوترێ “دەسەڵاتی منداڵکوژ”. بەڵام سەرەڕای هەموو توندوتیژییەکی وەحشیانە کە ڕێژیمی ئیسلامی لە شەقام و لە زیندانەکان بەئامانجی زاڵکردنی فەزای ترس و تۆقاندن ئەنجامی داوە، سەرەڕای هەڕەشە و هوشداری ڕێبەران و بەرپرسانی کۆماری ئیسلامی لە خامنەییەوە تا ڕەئیسیی قاتڵ، پاسدار ئەحمەد وەحیدی وەزیری ناوخۆی ڕێژیم، سەلامی فەرماندەی سپای پاسداران و باقیی بەرپرسانی ڕێژیم، مانگرتن و ناڕەزایەتیی جەماوەری خەڵک خامۆش نەبووە و ناشبێت. لەماوەی ڕۆژانی ڕابردوودا مەجلیسی کۆنەپەرستیش بەهۆی ترس لە ڕووخانی ئەم ڕێژیمە دز و گەندەڵە وێڕای ڕەخنەگرتن لە هێزە نیزامییەکان بەخاتری هەڵسوکەوتی “نەرم”یان لەگەڵ ناڕازییان، پێشنیاری بە دەزگای قەزایی کرد کە هەرچی زووتر و زیاتر دەستبەسەرکراوانی ئەم دوایانە ئێعدام بکەن تا بەڵکوو لە خامۆشکردنی ئەم ناڕەزایەتییانەدا یارمەتیدەر بێت.
واقعییەت ئەوەیە کە ڕێژیمی داڕماو و داماوی کۆماری ئیسلامی کە لەگەڵ قەیرانی سیاسی و ئابووری و کۆمەڵایەتیی بەرین بەرەوڕووە، توانای وڵامدانەوەی بە خواستی لاوان و جەماوەری کرێکار و زەحمەتکێش نییە. حاکمانی گەندەڵ و دز، لە فەرماندە باڵاکانی سپای پاسدارانەوە کە زیاتر لە ٧٠ لەسەدی ئابووریی وڵاتیان لە ئیختیار دایە و ملیاردها دۆلار لە بەرهەمی ڕەنج و کاری کرێکاران و خەڵکی زەحمەتکێشیان تاڵان کردووە تا ڕووحانییەتی دەسەڵاتدار کە لەم گەندەڵی و دزییەدا بەشدارن، بێجگەلە سەرکوت و کوشتار ڕێگاچارەیەکی دیکەیان بۆ خەڵک نییە. ئەوان بۆ پاراستن و درێژەی دەسەڵاتێک کە وەها ئیمکاناتێکی بۆ پێکهێناون، بە هەموو توانایانەوە دیفاعی لێ دەکەن و دەست بۆ هەر تاوانێک دەبەن. بەڵام لە بەرامبەر ئەم توێژە چەوسێنەر و مفتەخۆرەدا، دەیان ملیۆن کرێکار و زەحمەتکێشی بێبەش، ژنان و پیاوانی لاوی بێکار ڕاوەستاون کە بۆ دیفاع لە ژیان و ڕزگاری لە هەژاری و برسییەتی و نەبوونی ئازادی دەسیان داوەتە خەبات. بۆ ئەوانیش درێژەی ژیان لە وەها بارودۆخێکی فەلاکەتباردا مەحاڵە. ئەوان بە درووشمی “نە نانمان هەیە و نە ماڵ، حیجاب بووەتە بەهانە”، واقعییەتی کێشە و گرفتەکانی ژیانی خۆیان بەیان دەکەن. لەم ڕووەوە بۆ ئەوانیش هیچ ڕێگایەک بێجگەلە درێژەی خەبات تا بە سەرکەوتن گەیاندنی ئەم ئاخێزە شۆڕشگێڕانەیە و ڕووخاندنی دەسەڵاتی تاوانکاری ئیسلامی بوونی نییە.
تەلەڤیزیۆنی کۆمەڵە و حیزبی کۆمۆنیستی ئێران