نزیکەی دوو مانگ و نیو لە دەستپێکی ئاخێزی شۆڕشگێڕانەی ئێستا تێدەپەڕێت. لەم ماوەیەدا چوار گۆشەی ئێران مەیدانی ناڕەزایەتی و ڕووبەڕووبوونەوەی خەڵک دژبە پەلاماری هێزی سەرکوتگەر بووە. ئەزموونی ئەم قۆناغە بۆ جارێکی دیکە نیشانی دا کە لە بەرامبەر دوژمنێکی دڕندە و خوێنڕێژدا ڕاوەستاوین کە حازرە بۆ پاراستنی نیزامەکەی و بۆ پاراستنی بەرژەوەندی چینایەتیی سەرمایەدار دەست بۆ هەموو تاوانێک بەرێت. ڕێژیمێک کە تەنانەت لە کوشتنی منداڵانیش دەست ناپارێزێت. ڕێژیمێک کە فەرمانی تەقە بۆ هاووڵاتییانێک دەردەکات کە تەنیا چەکیان هاواری ناڕەزایەتییانە. دەسەڵاتێک کە بریندارەکان لە نەخۆشخانە دێنێتە دەر و ڕەوانەی ئەشکەنجەخانەکانیان دەکات. ڕێژیمێک کە سنوورەکانی سەرکوتی ڕووتینی پشت سەر ناوە و دەستی داوەتە کوشتنی ناڕازییان.
سەرانی ڕێژیم لایان وانەبوو کە بە کوشتی ژینا جەرەقەی بزووتنەوەیەک لێدەدرێ کە زیاتر لە دوو مانگە سەرتاسەری کۆمەڵگەی داگرتووە و بە کەمتر لە ڕووخاندنی کۆماری ئیسلامی ڕازی نابێت. بزووتنەوەیەکی شۆڕشگێڕانە کە زەنگی مەرگی ڕێژیمی لێداوە. ڕێژیم بۆ پاراستن و مانەوەی دەسەڵاتەکەی لە ئەنجامدانی هیچ جەنایەتێک دەریغ ناکات. لەلایەکی دیکەوە جەماوەری ڕاپەڕیوی خەڵک حازر نین ملکەچی شەپۆلی سەرکوتی ڕێژیم بن. کرێکاران، ژنان، مامۆستایان، خانەنشینکراوان، لاوان، خوێندکاران، نووسەران و هونەرمەندان زیاتر لە دوو مانگە حەماسەیەکی لەبیرنەکراویان خوڵقاندووە. کۆمەڵگە نەتەنیا بەخاتری شور و شەوقی لاوان و بەخاتری خۆڕاگریی بوێرانەی ژنان هەست بە شانازی دەکات، بەڵکوو دەبینێت کە لە خوێنی هەژارانی گیان بەختکردووی خەزەڵوەری ٩٨ەوە، ئاخێزێک سەریهەڵداوە کە سەرنجی گشت جیهانی بەرەو خۆی ڕاکێشاوە. بەڵام سەرەڕای هەموو ئەمانە نابێ فەرامۆشی بکەین کە تا نەبەردی نیهایی زۆر سەنگەرمان ماوە فەتحی کەین. بۆ چوونە ناو نەبەردی نیهایی و سەرکەوتن بەسەر دوژمن پێویستە مەلزووماتەکەی فەراهەم بکەین. لە جەرەیانی ئەم نەبەردە دوورودرێژەی کە لەبەرمانە پێویستە هەموو هێز و داهێنانی خۆمان بەکار بێنین تا ئەرتەشی ملیۆنیی جەماوەری خەڵکی ناڕازی لە وەزعی مەوجود، بێنینە مەیدانی خەباتەوە. هەر هەنگاوێک پێشڕەویی ئێمە لە هێنانە مەیدانی جەماوەر بۆ پەیوەست بوون بە ئاخێزی شۆڕشگێڕانە، هاوسەنگیی هێز بە زیانی دوژمن دەگۆڕێت.
بێگومان چووینەتە پڕۆسەیەکی شۆڕشگێڕانەوە کە پێویستە قەواعید و یاساکانی چالاکی لەم قۆناغەدا بناسین. پێویستە بزانین کە چۆن لە شوێنی کار و ژیاندا خۆمان سازمان بدەین. پێویستە بزانین چۆن لە جەرگەی پێشڕەوییەکانی بزووتنەوەی کرێکاریدا، شۆراکانی کرێکاران لە کارخانە و ناوەندەکانی بەرهەمهێناندا پێک بێنین. چۆن بۆ مانگرتنی سیاسی گشتی و سەرانسەری ئامادەکاری بکەین. پێویستە بزانین کە چۆن تاکتیکەکانی ڕێژیم پووچەڵ بکەینەوە. دەبێ فێر بین کە چۆن بە کەمترین هەزینەوە، بەهێزترین زەربە لە هێزەکانی دوژمن بدەین. ئەوە ڕاستە کە پێشڕەویی شۆڕش بە ئیرادە، بە بوێری، بە وشیاری و بە پێداگربوونی ئێمەوە گرێی خواردووە، بەڵام بە هەمووی ئەمانەشەوە ئەگەر جەماوەری خەڵک لەئاستی ملیۆنیدا هاودەنگی و پشتیوانیی خۆیان لە شەقام و کارخانەکان ماددییەت نەبەخشن، پێشڕەوی شۆڕش بەرەوڕووی هەزینەی قورس دەبێتەوە. کاتێک دەڕوانینە ئەم ئاخێزەی ئێستا و کاتێک لەگەڵ ئاخێزەکانی مانگی بەفرانباری ٩٦ و خەزەڵوەری ٩٨ بەراوردی دەکەین، دەبینین کە چ هەنگاوگەلێکی بەرزمان هەڵگرتووە. ئێستا ئیتر پێکهێنانی شۆرا و کۆمیتەی گەڕەکەکان بووەتە مەشغەڵەی لاوان و ژنان و پیاوانی بوێر کە لەماوەی زیاتر لە دوو مانگی ڕابردوودا ئەرکی ڕێکخستن و هیدایەتی ناڕەزایەتییەکانی شەقام و بەرەنگاربوونەوە لەگەڵ هێزە سەرکوتگەرەکانی ڕێژیمیان وەئەستۆ بووە. ئەوان لە جەرگەی بەرەنگاربوونەوە لەگەڵ سەرکوتگەرانی ڕێژیم، تۆڕەکانی پێکەوە پەیوەنددراوی لاوانی شۆڕشگێڕیان پەرەپێداوە و هەنگاوە سەرەتاییەکانی پێکهێنانی کۆمیتە و شۆرای گەڕەکانیان هەڵگرتووە. ئەوان فێربوون کە چۆن بە تاکتیکی گونجاو پاشەکشە بە هێزە سەرکوتگەرەکان بکەن. ئەوان لە ئەزموونی خەباتکارانەی خۆیاندا داخوازی و دروشمەکانی خۆیان کامڵتر کردووە. هونەری خۆڕاگری و بەرەنگاربوونەوە و هونەری شۆڕشگێڕانەیان خوڵقاندووە.
لە ساڵوەگەڕی ئاخێزی خەزەڵوەری ٩٨ خەباتکارانی شەقام بە درێژەدانی ڕەزمی خۆیان نیشانیان دا کە بە دروشمی خۆیان واتە “سوێند بە خوێنی یاران، ڕاوەستاوین تا کۆتایی” هەروا وەفادار ماون و شەقام جێ ناهێڵن. ئەمانە دیمەنەکانی بزووتنەوەی شۆڕشگێڕانەن کە جێگەی شانازین. بەدوای ئەوەدا مامۆستایان بە بانگەواز بۆ مانگرتنی گشتیی دوو ڕۆژە لە ناڕەزایەتی دژبە تاوانی ڕێژیم و کوژرانی خوێندکاران، قووڵترین هاوپشتیی خۆیان لەگەڵ بنەماڵەی گیان بەختکردووان و ئەم بزووتنەوە شۆڕشگێڕانەیە ڕاگەیاند.
لەماوەی دوو هەفتەی ڕابردوودا ڕێژیم بە ناردنی هێزی تایبەتی سپای پاسداران و بەکارهێنانی هەموو جۆرە چەکێک، حکوومەت نیزامییەکی ڕانەگەیەندراوی بەرقەرار کردووە و شارەکانی کوردستانی کردووەتە مەیدانی شەڕێکی بەتەواو مانا. جەماوەری تووڕەی خەڵکی خەباتکاری مەهاباد و جوانڕۆ بە دەستی بەتاڵەوە لە بەرامبەر هێرشی دڕندانەی کۆماری ئیسلامیدا سەنگەربەندییان کرد و لەخۆیان بەرگرییان کرد. لە ماوەی ئەم دوو هەفتەیەدا زیاتر لە ٥٠ کەس بە تەقەی ڕاستەوخۆی هێزە بەکرێگیراوەکانی ڕێژیم کوژراون و سەدان کەس برینداربوون و سەدانی تریش دەستگیر و ڕەوانەی زیندان کراون. بەڵام هێرشی نیزامیی ڕێژیمی دڕندە و پڕچەک، نەتەنیا لە مەهاباد و جوانڕۆ، بەڵکوو لە هەموو شارەکانی کوردستان لەگەڵ خۆڕاگریی بوێرانەی ژنان و پیاوانی ئازادیخواز و خەباتکار ڕووبەڕوو بووەتەوە. هەڵسووڕاوان و ڕێبەران و ڕێکخەرانی ناڕەزایەتییەکان لە ناوخۆ، بۆ پووچەڵکردنەوەی پیلانگێڕی و تەفرەقەنانەوەی حکوومەتی ئیسلامی لەناو خەڵک بە وشیاری و وریاییەوە ڕۆڵیان بینیوە و هاوپشتیی خەباتکارانەی بزووتنەوەی شۆڕشگێڕانەی کوردستان لەگەڵ بزووتنەوەی سەرانسەرییان نیشان داوە. چونکە دەزانن ڕەمزی سەرکەوتنی بزووتنەوەی کوردستان لە بەهێزکردن و درێژەی هاوپشتی لەگەڵ بزووتنەوەی سەرانسەری لە ئێراندایە.
ئێستا لازم و زەروورییە کە خەڵک لە سەرانسەری ئێران دژبە میلیتاریزم، کوشتار و زاڵکردنی فەزای جەنگی بەسەر کوردستان لەئاستی بەریندا بڕژێنە سەر شەقام. بە مانگرتنی کرێکاران لە بەشە جۆراوجۆرەکانی بەرهەمهێنان و خزمەتگوزاری، مانگرتن و ناڕەزایەتی لە زانکۆ و مەدرەسە و بازاڕ و ئیدارات، هاوپشتیی خۆیان لەگەڵ کوردستان بە ڕێژیمی هاری ئیسلامی نیشان بدەن. بەمجۆرە دەکرێ وەها هاوسەنگییەکی هێز بەسەر ڕێژیمدا بسەپێت کە ڕێژیمی ئیسلامی نەتەنیا لە کوردستان و یان سیستان و بەلوچستان، بەڵکوو لە هیچ شوێنێکی تری ئێران نەتوانێ دەست بۆ کوشتار بەرێت و نەبەردی پێشوەخت بەسەر بەرەی هێزی شۆڕشگێڕدا بسەپێت.
تەلەڤیزیۆنی کۆمەڵە و حیزبی کۆمۆنیستی ئێران