لەسەر بانگەوازی ” شۆرای هاوئاهەنگیی ڕێکخراوی پیشەیی مامۆستایانی ئێران” ڕۆژی پێنجشەمە ٢٦ی جۆزەردانی ١٤٠١، مامۆستایانی لەسەرکار و خانەنشین، لە زۆرێک لە شارەکانی ئێران دووبارە هاتنە سەر شەقامەکان. ئەم بانگهێشتە لە چەند ڕۆژ لەمەوبەرەوە بەشێوەی عەلەنی بڵاوکرابۆوە و هێزە ئەمنییەکانی ڕژیم بۆ ڕێگری لەم کۆبوونەوانە زۆریان تەقەلا و هەوڵ دابوو. لە دوو ڕۆژ لەمەوبەرەوە سێ نوێنەری مامۆستایانی بەندکراو “جەعفەر ئیبراهیمی و محەممەد حەبیبی و ڕەسووڵ بۆداقی” کە تەسلیمی سێناریۆسازیی نەنگینی دەزگا ئەمنییەکان و سەدا و سیما نەببوون، بە ئامانجی خوڵقاندنی کەش و هەوای سەرکوت و داسەپاندنی گوشاری دەروونی و پچڕاندنی پەیوەندی لەگەڵ دەرەوە و لەگەڵ یەکتر، لە بەندی ٢٠٩ی زیندانی ئێڤینەوە بۆ بەندی ٢٤٠ و ژووری تاکەکەسیی هەمان زیندان ڕەوانە کران. لە هەموو شارەکان زۆرێک لە چالاکانی فەرهەنگییان بۆ ئیداراتی ئیتلاعات و ئیتلاعاتی سپای پاسداران بانگێشت کردن. بە هەڕەشە و ترساندن و وەرگرتنی بەڵێنی بەنووسراوە داوایان لێکردن کە لە کۆبوونەوەکانی ڕۆژی پێنجشەممەدا بەشداری نەکەن. لە هەموو شارەکان لەشکری هێزە بەکرێگیراو و سەرکوتگەرەکانیان لە ناوچە هەستیارەکانی شار جێگیرکرد تا بە زەبری چەک لە کۆبوونەوەی مامۆستایان ڕێگری بکەن.
بەم حاڵەشەوە مامۆستایانی خەباتکار و خانەنشینکراو ڕانەوەستان و لەو جێگەوە کە خاوەن ڕێکخراوی سەرانسەری و ڕێبەریی ڕادیکاڵ و جەمعیی خۆیان بوون، بە شەهامەت و بوێریی و پێداگرییەوە بەەرنگاری دوژمنانی مافەکانیان بوونەوە و هاتنە سەر شەقامەکان و لە کۆبوونەوەکاندا بەشدارییان کرد. بۆ جارێکی دیکە خواست و داخوازیی پیشەیی و سیاسیی ڕەوای خۆیان بە دەنگی ڕەساوە لە ڕێگەی درووشمەکانیانەوە بەگۆی خەڵک و دەسەڵات گەیاند و ناڕەزایەتی و ئیعترازی خۆیان لەئاست دژوارییەکانی ژیانیان دەربڕی. هەڵبەت وڵامی ئەوەڵ و ئاخری حکوومەتی ئیسلامیی سەرمایە، هەر وەک هەمیشە سەرکوت بوو. ڕژیمی ئیسلامی لە هەموو شارەکانەوە هێزە سەرکوتگەرەکانی خۆیان لە گیانی مامۆستایان بەردا و زیاتر لە ٥٠ کەسیان لێ دەستبەسەر کردن. سەرەڕای ئەمانە مامۆستایانی خەباتکار بە بڵاوکردنەوە و خوێندنەوەی “بڕیارنامەی کۆتایی کۆبوونەوە”، ڕژیمی داماو و وەرشکستەی کۆماری ئیسلامییان حاڵی کرد کە ناتوانن دەستبەرداری داخوازییەکانیان بن و درێژە بە ناڕەزایەتییەکانیان دەدەن.
بێگومان ڕووی ئەم بڕیارنامەیە مامۆستایان و خەڵکی وشیار و دایک و باوکی خوێندکاران بوون نەک سەرانی ڕژیمی درۆزنی ئیسلامی. ئەم بڕیارنامەیە بە درووست باس لە وادە و بەڵێنی درۆیینی سەرۆک کۆماری قاتڵ لەسەرەتای هاتنە سەر کاریدا دەکات کە وتبووی: “مەعیشەتی خەڵک بە دانوستانی ناوەکییەوە گرێ نادەین، گەشەی ئابووریی ٥ لەسەدیمان دەبێت، ساڵانە یەک ملیۆن پیشە پێک دێنین و یەک ملیۆن یەکەی نیشتەجێ بوون درووست دەکەین. ڕێژەی بێکاری دێنینە خوارێ، هەژاریی موتڵەق بەخێرایی ڕیشەکێش دەکەین” و هیتر. ئەوەش لەحاڵێکدایە کە بۆشایی چینایەتی و هەژاری سفرەی ئێمە مامۆستایان و باقیی جەماوەری کرێکار و زەحمەتکێشی کردووەتە ئامانج بەجۆرێک کە چینی مامناوەند بەخێرایی بەرەو ژێر هێڵی هەژاری دەڕوات. لە وەها باروودۆخێکدا کارمەند، کرێکار، مامۆستای لەسەرکار و خانەنشینکراو، توانای کڕینیان کەمتر و سفرەیان چکۆلەتر بووەتەوە. خەڵک لە هەژاری و لە هەڵاواردن وەگیان هاتوون. لە بەندێکی تر لە بڕیارنامەی مامۆستایاندا، لە مافی خوێندکاران لە بەهرەمەندبوونیان لە پەروەردەی بەخۆڕایی بەپێی بەندی ٣٠ی قانوونی ئەسایی کەزایی ڕژیم دیفاع دەکات و لە داخوازیی ١٤ ساڵەی خانەنشینکراوان و ڕیزبەندیی پیشەکان پشتیوانی دەکات. بڕیارنامەکە هەروەها ئاماژە بە سێناریۆی قیزەونی سەدا و سیما دەکات کە لە هەوڵێکی بێ ئاکامدا بەنیازە بیروڕای گشتی بەلاڕێدا بەرێت و سیمای مامۆستایان ناحەز بکات و ئەوان سەربە دەرەوە پێناسە بکات.
مامۆستایان لە کۆتایی بڕیارنامەکەدا خواستی گرینگ و میحوەریی خویان بۆ جارێکی دیکە لە چوار بەنددا ڕادەگەیەنن و هۆشداریان بە ڕژیم داوە کە خواستەکانیان وەدی بێنێت و “ڕیشەی خۆی بنکۆڵ نەکات”.
ئەم چوار بەندە لەخۆگری داخوازیی سیاسی، ئابووری و کۆمەڵایەتیی مامۆستایان، خوێندکاران و کۆمەڵگە لەپێوەند لەگەڵ بابەتی پەروەردە و بارهێنانە کە بریتین لە:
١ – بەستنی پەروەندەی چالاکانی پیشەیی و ئازادیی هەرچی زووتری مامۆستایانی بەندکراو
٢ – بەکردەوەدەرهێنانی کامڵی ڕیزبەندیی مامۆستایان و هاوسانسازیی مافەکانی مامۆستایانی خانەنشینکراو
٣ – بەکردەوە دەرهێنانی ئەسڵی ٣٠ی قانوونی ئەساسی کە دەوڵەت ئەرکدار بە دابینکردنی ئیمکاناتی پێویست بۆ پەروەردەی بەخۆڕایی هەموو خەڵک تا کۆتایی قۆناغی مامناوەند دەکات.
٤ – هەڵوەشانەوەی پەروەردەی پووڵی و ڕێگری لە کاڵایی کردنی پەروەردە
مامۆستایان لە کۆمەڵگەدا خاوەن ڕێز و خۆشەویستیی کۆمەڵایەتین. لەلایەن خوێندکاران و بنەماڵەکانیان پشتیوانییان لێ دەکرێت. لەلایەن کرێکاران و خوێندکاران و باقیی توێژە هەژارەکانی کۆمەڵگەوە حیمایەتیان لێ دەکرێت. بێگومان هەڵسووکەوتی سەرکوتگەرانەی ڕژیم و زیندان و ئەشکەنجە ناتوانێ بزووتنەوەی مامۆستایان خامۆش بکات و هەروەک لەم بڕیارنامەیەدا هاتووە، “ڕێکخراوی مامۆستایان لە ماوەی دوو دەیە چالاکیی خۆیدا توانیویەتی هەزاران مامۆستای دادخواز و چالاک بێنێتە ناو مەیدانی مافخوازی، کەوابوو بە زیندانی کردنی ژمارەیەک چالاکی خۆشناو، ڕژیم ناتوانێ ئەم حەرەکەتە ناکارامە بکات.”
بزووتنەوەی یەکگرتوو، سازماندراو و ڕێکخراوی مامۆستایانی خەباتکار و زەحمەتکێشی ئێران وەک بەشێک لە چینی کرێکار ساڵەهایە لە باروودۆخێکی دژواردا چالاکیی خۆی درێژە پێ دەدات. ساڵەهایە مامۆستایان بە حقووق و حەقدەستی چەند بەرابەر ژێر هێڵی هەژاری، بە کار و بەرپرسایەتیی گرینگی پەروەردەکردنی نەسلەکانی دۆینێ و ئەمڕۆ مەشغووڵن. ساڵەهایە بۆ دابینکردنی هەزینەی گیانی بنەماڵەکانیان مەجبوون دوای ئەنجامدانی ئەرکی ڕۆژانەی مامۆستایی بە جەستەیەکی ماندوو و ئەعسابێکی نائارامەوە کاری دووهەم و سێهەم بکەن. بەڵام سەرەڕای هەمووی ئەوانە، حاسڵی ئەو هەمووە ماندوویەتییە، ساڵەهایە بەشی دابینکردنی هەزینەی سەبەدی بژێوی بنەماڵەکان ناکات. ئەوەش لە حاڵێکدایە کە لە حاکمییەتی کۆماری ئیسلامیدا سەدان هەزار ئاخوندی زەرووسفەت لە دەیان هەزار ناوەندی خورافە و دواکەوتووییدا بەبێ ئەوەیکە مەشغووڵییەتیان قازانجێکی بۆ کۆمەڵگە هەبێت، بە هەزینەی سەروەت و سامانی خەڵک لە ڕەفاه و ئاسایشدا بەسەر دەبەن. سەدان هەزار کەسیان بە هەزینەی خەڵکی کرێکار و زەحمەتکێش لە ناوەندە نیزامییە ئەمنییەتییەکاندا بۆ سەرکوتی کرێکاران و توێژە هەژارەکانی کۆمەڵگە و بۆ پاراستنی ئەم نیزامەی سەدەکانی ناوەڕاستی سەرمایە، بەکار هێناوە. لەم نیزامە پێچەوانەیەی دیکتاتۆریی سەرمایەدا جێگای کرێکاران و مامۆستایان و خانەنشینکراوان زیندانە و جێگای دزان و گەندەڵان پۆستەکانی حکوومەتە.
https://alternative-shorai.tv