شکستی سیاسی و نیزامیی کۆماری ئیسلامی لەسەر ئاستی ناوچەیی و تێکشکانی هێزەکانی بەناو “میحوەری موقاومەت”، بەرپرسان و فەرماندەکانی ڕژیمی لەئاستە جۆاوجۆرەکاندا تووشی بێهوایی و نیگەرانی کردووە. مەوعیزە و درۆودەلەسەی چەند جارەی خامنەیی و ڕێبەرانی دیکەی ڕژیم و سپا بۆ جێخستنی ئەو قسە بێبنەمایەی کە گۆیا “شکستمان نەخواردووە، میحوەری موقاومەت زیندوو و بەهێزە و بەهێزتر دەبێت”، نەیتوانیوە لە بەرزکردنەوەی ورەی ڕیزەکانیاندا کاریگەر بێت و خاترجەمیان کات. بەڵام ئەوە بەتەنیا بەرپرسان و کاربەدەستانی ڕژیم نین کە باوەڕیان بە مانەوەی ڕژیم لەدەستداوە، بەڵکوو بێتوانایی ڕژیمی ئیسلامی لە بواری بەرگریی نیزامی بەرامبەر بە هێرشە ئاسمانییەکانی ئیسرائیل و بێتوانایی لە بورای چارەسەکردنی قەیران و ئیدارەی کۆمەڵگا بووەتە لێدوانی زۆرێک لە خەڵکی ئێران و باس لە نزیکبوونی ڕووخانی ڕژیم دەکەن. لە وەها هەلومەرجێکدا فەرماندە باڵاکانی سپای پاسداران بە ئامانجی کۆنتڕۆڵ کردنی ئەم بارودۆخە و زاڵبوون بەسەر فەزای وەحشەت و نیگەرانی و نیشاندانی توانای نیزامی، دەستیان کردووە بە مانۆری نیزامی لە ئاستە جۆراوجۆرەکاندا تا بە خەیاڵی خۆیان توانا و هێزی نیزامیی دیفاع لە خۆیان بە ناوەوە و دەرەوەی ئێران نیشان بدەن.
بە وتەی پاسدار شادمانی فەرماندەی قەرارگای مانۆرەکانی بەناو “ئیقتدار”ی ڕژیم، ئەم مانۆرانە کە لە ڕۆژی یەکشەممە ١٦ی مانگی بەفرانبارەوە دەستیپێکردووە دوو مانگ دەخایەنێت. هەڵبەت ئەم مانۆڕانە کە ناویان ناوە “مانۆڕی پێشگرانەی پێغەمبەری مەزنی ١٩”، زیاتر بۆ نیشاندانی نۆژنکردنەوە و ساغکردنەوەی سیستەمی مووشەکییە کە لە هێرشی مانگەکانی ڕابردووی ئیسرائیلدا لەناوچووبوو و هاوکات پەیامێکیشە بۆ نەتانیاهۆ. لە بارودۆخێکدا کە هێزە نیابەتییەکانی “میحوەری موقاومەت”ی ڕژیم لە غەززە، لۆبنان، سووریە یەکجار لاواز بوون، ئیسرائیل، ئەمریکا و باقی هاوپەیمانانی لە هەوڵی ئەوەدان تا دەستی کۆماری ئیسلامی لە باقیی هێزەکانی سەر بە ڕژیم لەوانە حەشدی شەعبی لە عێراق و حوسییەکانی یەمەن لەڕێگەی چەککردنیانەوە، کورت بکەنەوە. ڕۆژی چوارشەممە ١٩ی مانگی بەفرانبار محەممەد شیاع سوودانی وێڕای بڵاوکردنەوەی پەیامێک سەبارەت بە پێویستیی چەککردنی ئەو دەستەیە لە هێزەکانی حەشدی شەعبی کە فەرمان لە کۆماری ئیسلامی وەردەگرن، چووە تاران و لەگەڵ خامنەیی و پزیشکیان دیدار و گفتوگۆی کرد. ناوبراو هۆشداری ئەوەی بە خامنەیی دا کە ئەگەر ئەم هێزانە چەکدار بمێننەوە ئەگەری ئەوە هەیە کە ئەمریکا و ئیسرائیل هێرش بکەنە سەر عێراق و ئێران. بەڵام عەلی خامنەیی سەبارەت بەم بابەتە خۆی لە گێلی دا و لە وڵام بە سوودانیدا وتی: “حەشدی شەعبی یەکێک لە هێماکانی دەسەڵات لە عێراقە و دەبێ بپارێزرێ و بەهێز بکرێت. پێویستە داگیرکارییەکانی ئەمریکا لە عێراق بەجیددی بەریان پێ بگیرێت”. پێداگریی خامنەیی لەسەر پێویستیی پاراستن و بەهێزکردنی گرووپە تیرۆریستەکانی حەشدی شەعبیی سەر بە ڕژم لە کاتکێدایە کە ڕۆژنانەی واڵستریت جۆرناڵ هەر لە ڕۆژی چوارشەممەدا باسی لە بەرنامەی دەوڵەتی ترامپ بۆ توندکردنەوەی سزاکان وێڕای بژاردەی نیزامیی لەدژی کۆماری ئیسلامی کرد.
بەڵام ئامانجی سەرەکیی کۆماری ئیسلامی لە وەڕێخستنی مانۆڕی نیزامیی پێشگرانە، بەرەنگاربوونەوە لەگەڵ “مەترسی”ی سەرهەڵدانی ڕاپەڕین و ئاخێزی سەرتاسەری بەهۆی پەرەسەندنی مانگرتن و ناڕەزایەتیی کرێکاران و باقیی توێژە هەژارەکانی کۆمەڵگایە کە ڕۆژانە لە ناوەوە لەئارادایە و گەشە دەستێنێت. سپای پاسداران بە ئامانجی پێکهێنانی کەشوهەوای نیزامی و ئەمنیەتی لە ناو شارەکان بەتایبەت لە تاران، مانۆڕی بەسیجییەکانی لەناو شاری تاران بە مانۆڕە نیزامییەکانی زیاد کردووە. فەرماندەی سپای تاران دانی بەوە دانا کە ئامانجی ئەم مانۆڕە نیزامییە کە بە ئیدعای ئەو بە بەشداریی ١١٠ هەزار بەسیجی بەڕێوەدەچێت، ئامادە کردنی هێزەکانی کۆماری ئیسلامی بۆ بەرەنگاربوونەوە لەگەڵ هەرجۆرە هەڕەشەیەکی ئینسانی بۆسەر پایتەختە. وەها مانۆڕێک بە بەشداریی ئەم ژمارەیە لە بەسیجیی مفتەخۆر، بۆ بەرەنگاربوونەوە لەگەڵ هێرشی مووشەک، دۆرن یان فڕۆکەی جەنگیی دەسەڵاتەکانی دەرەوە نییە. بەڵکوو تەنیا خۆئامادەکردنە بۆ سەرکوت و بۆ ڕووبەڕووبوونەوە لەگەڵ ناڕەزایەتی و مانگرتنی ناوخۆیی یان بە قەولی وتەبێژی سپای پاسدارن بۆ بەرەنگاربوونەوە لەگەڵ هەڕەشەی ئینسانییە. سەرانی ڕژیم دەزانن کە لەگەڵ خراپتر بوونی بارودۆخی ئابووری و کۆمەڵایەتی و بژێوی خەڵک، کۆمەڵگای ئێران گەیشتووەتە ئاستی تەقینەوەیە.
ئاشکرایە کە ئامانج لە بەڕێوەبردنی وەها مانۆڕێک ئامادەکردنی هێزەکانی ڕژیم بۆ بەرەنگاربوونەوە و سەرکوتی مانگرتن و ناڕەزایەتیی ڕوو لە گەشەی جەماوەری خەڵکە. چونکە ڕژیمی داماو و گەندەڵی کۆماری ئیسلامی بۆ ڕاگرتنی دەسەڵاتە نگریسەکەی، ڕێگا و ئامرازێکی بێجگەلە سەرکوتی خەڵک لە ئیختیاردا نییە. کێشەی سەرەکیی ڕژیم ئەوەیە لە دەروەی وڵات ستراتێژی نیزامییە پڕ هەزینەکەی کە پێی دەڵێ “شەڕی پێشگرانە” شکستی خواردووە. وە لە ناوەوەش سیاسەتە ئابوورییەکانی تووشی ئیفلاس و وەرشکستەیی بووە و بەهۆیەوە گرانی و هەژاری و بێکارییەکی بێوێنە کۆمەڵگای داگرتووە و ژیان و گوزەرانی جەماوەری کرێکار و زەحمەتکێشی سەخت و تاقەت پڕووکێن کردووە. حکوومەتی ئیسلامی کە لە وەدیهێنانی پێداویستییەکانی خەڵکی زەحمەتکێشدا بێتوانایە ڕۆژانە بەرەنگاری مانگرتن و ناڕەزایەتیی کرێکاران و توێژەکانی دیکەی کۆمەڵگا دەبێتەوە. زۆرێک لە خەڵک بارودۆخی ئێستای ڕژیم بە هاوشێوەی بارودۆخی بەر لە ڕاپەڕینی ساڵی ٥٧ی هەتاوی هەڵدەسەنگێنن و لەو باوەڕەدان کە ئاڵوگۆڕی گەورەی کۆمەڵایەتی بەڕێوەیە و کۆماری ئیسلامی لە ڕووخانی نزیکە. پێویستە بوترێ کە خامنەیی و ڕێبەریی سپای پاسدارانیش سەرەڕای درۆودەلەسە و خۆهەڵکێشانی بەردەوامیان لەم بابەتە ئاگادارن و بێتوانایی و داماویی دەسەڵاتەکەیان لەم بارودۆخەدا بووەتە نیگەرانی و کابووسی هەمیشەیییان.
بەڵام لە هەلومەرجێکدا کە ڕژیمی سەرمایەداریی ئیسلامی بەئاشکرا هێزە سەرکوتگەرەکانی بۆ بەرەنگاربوونەوە لەگەڵ مانگرتن و ناڕەزایەتیی جەماوەری کرێکار و زەحمەتکێش ئامادە دەکات، پێویستە ئەوانیش خۆیان بۆ تێکشکاندن و ڕووخاندنی دەسەڵاتی سەرکوتگەری ئیسلامی ئامادە بکەن. چەکی دەستی جەماوەری کرێکار و زەحمەتکێش، مانگرتنی سەرتاسەری و ڕێکخراوی کرێکاران لە ناوەندە سەرەکییەکانی سەنعەت و خزمەتگوزاری، وێڕای ئیعتڕاز و مانگرتنی سیاسی و جەماوەریی توێژە هەژارەکانی کۆمەڵگایە. ئەم چەکە بەهێزە دەتوانێ ستراتێژی سەرکوتی ڕژیم تووشی شکست بکات. لە وەها بارودۆخێکدا و لە جەرگەی درێژەی مانگرتنی کرێکاری و خەباتی جەماوەریدا، ئەرکی خێرای ڕێبەران و چالاکانی چەپ و کۆمۆنیست و پێشڕەو، هەوڵی ڕێکخراو و بەردەوام بۆ پێکهێنانی ناوەند و ڕێکخراوە چینایەتی و جەماوەرییەکان لەوانە شۆرا، سەندیکا لە ناوەندە کرێکارییەکان، پێکهێنانی ئەنجومەن و شۆراکانی ژنان و ناوەندە جەماوەرییەکان لە گەڕەکەکان بەتایبەت لە پەراوێزی شارەکانە. واتە ئەو هەنگاو و چالاکییانەی لە خزمەت ڕووخاندنی شۆڕشگێڕانەی کۆماری ئیسلامیدان.