“ئەمجەد ساڵحزادە” تەمەن ٣٨ ساڵ و خەڵکی شاری سەقز، نزیکەی دوو مانگە دەستبەسەر کراوە و چارەنووسی نادیارە.
ناوبراو دوای دەستبەسەرکرانی بە مەبەستی لێپرسینەوە بۆ گرتنگەی شارامفەری ئیتلاعاتی سپای پاسداران لە سنە ڕاگوێزرابوو و تاوەکوو ئێستا لەو ناوەندە ڕاگیراوە. بە وتەی سەرچاوەیەکی ئاگادار، ئەم هاووڵاتییە لە ماوەی دەستبەسەرکرانیدا، لە دەستپێڕاگەیشتن بە پارێزەر و چاوپێکەوتن لەگەڵ بنەماڵەکەی بێبەری کراوە. شایانی باسە، ئەمجەد ساڵح زادە بۆ وەرگرتنی دانپێدانانی زۆرەملێ لەژێر ئەشکەنجە و گوشاری هێزە ئەمنییەکاندایە. جێگای ئاماژەیە، ڕۆژی سێشەممە ٢ی ڕێبەندانی ١٤٠٣، هێزە ئەمنییەکان بە بەکارهێنانی توندوتیژی ئەم هاووڵاتییەیان لە شوێنی کارەکەی خۆی دەستبەسەر کردبوو. هەتا کاتی بڵاوبوونەوەی ئەم هەواڵە، سەبارەت بە هۆکاری دەستبەسەرکران و تۆمەتە وەپاڵدراوەکان دژی ئەم هاووڵاتییە زانیارییەک لەبەر دەستدا نییە.