نادیاربوونی چارەنووسی شاهۆ سووری بەدوای دەستبەسەر کرانی لە لایەن هێزە ئەمنییەکانی ڕژیم لە مەریوان
چوارشەممە ۰۸-۱۲-۱۴۰۳ | 26-02-2025
سەرەڕای تێپەڕبوونی ٢٥ ڕۆژ بەسەر دەستبەسەركرانی “شاهۆ سووری” تەمەن ٣٠ ساڵ و خەڵكی شاری مەریوان لە لایەن هێزەکانی ئیدارەی ئیتلاعاتی ڕژیم، زانیارییەک لەسەر چارەنووسی ناوبراو لەبەر دەستدا نییە و بەدواداچوونی بنەماڵەكەی بۆ ئاگاداربوون لە بارودۆخی ئەم هاووڵاتییە بێ ئاكام ماوەتەوە و ناوەندە ئەمنییەكان خۆیان لە هەرجۆرە وڵامدانەوەیەک دەپارێزن.
بە گوێرەی سەرچاوەیەكی نزیک لە بنەماڵەی سووری، شاهۆ ڕۆژی یەكشەممە ١٤ی ڕێبەندان، لە لایەن هێزەكانی ئیدارەی ئیتلاعات دەستبەسەر و بۆ دەستبەسەرگەی ئەو ناوەندە ئەمنییە لە سنە گواستراوەتەوە. تا كاتی داڕشتنی ئەم ڕاپۆرتە، زانیارییەک لەسەر هۆكاری دەستبەسەركران و تۆمەتە سەپێندراوەكان لە دژی ناوبراو لەبەر دەستدا نییە