نزیکەی دوو هەفتە دوای ئەوەی شۆفیری بارهەڵگرە کەنەدییەکان خۆپیشاندانێکیان دژی ڕێوشوێنەکانی کۆرۆنا لە ئۆتاوا دەستپێکرد، خۆپیشاندەرانی فەرەنساش چوونە پاڵ بزووتنەوەی ناڕەزایەتی ناسراو بە “کاروانی ئازادی”. سەرەرای ڕاگەیاندنی دژایەتی پۆلیسی پاریس لەگەڵ بزوتنەوەی ناڕەزایەتی، چاوەڕوان دەکرێت هەینی ١١ی فێوریە(٢٢ی ڕێبەندان) ” کاروانی ئازادی”ی خۆپیشاندەرانی فەرەنسا بگاتە پایتەختی ئەم وڵاتە.
بەپێی ڕاپۆرتی هەواڵنێریی فەڕەنسا، هەزاران هاووڵاتی فەرەنسی دژی سنووردارکردنی کۆرۆنا بەتایبەتی پاسپۆرتی کوتانی کۆرۆناڤیروس لە تۆڕەکۆمەڵایەتییەکاندا ڕایانگەیاندووە کە گردبوونەوەیەکی ناڕەزایەتی نوێیان دەست پێکردووە کە لە خۆپیشاندانی شۆفیر بارهەڵگرە کەنەدەییەکان ئیلهامیان وەرگرتووە.
ناڕازیانی فەڕەنسی وتوویانە کە بەنیازن دوای گەیشتنیان بە پایتەختی فەڕەنسا گەورەڕێگا سەرەکیەکانی پاریس بۆ ماوەی ٢ ڕۆژ، واتە ١٢ و ١٣ی فێوریە بلۆک بکەن و ڕۆژی دووشەممە ١٤ی فێوریە بەرەو برووکسێل، بارەگای یەکیەتیی ئەورووپا بەڕێ بکەون.
هەواڵنێریی فەڕەنسا ئاماژەی بەوەش کردووە کە کەشوهەوای ناڕەزایەتییەکانی ناسراو بە “کاروانی ئازادی” وەبیرهێنەرەوەی خۆپیشاندانی “جلیقە زەردەکان”ە.