ئەرتەشی ئیسرائیل لە درێژەی شەپۆلی تازەی هێرشەکانی خۆی بۆسەر خەڵکی فەلەستین لە لێواری ڕۆژئاوا کە لە دوو حەوتوو لەمەوبەرەوە دەستیپێکردووە، ڕۆژی یەکشەممە دووی مانگی فێوریە لە هێرشێکی بەریندا ٢٠ بینای لە کەمپی جێنین لەڕێگەی چەندین تەقینەوەی هاوکاتەوە بەتەواوی وێران کرد. لە جەریانی ئەم هێرشەدا، نەخۆشخانەی دەوڵەتیی جێنینیش زیانێکی زۆری بەرکەوت و بەوتەی مودیری ئەم نەخۆشخانەیە، بەشێکی ئەم بینایە بەهۆی ئەم تەقینەوانە تێکڕووخاوە. لە ئاکامی هێرشەکانی ئەم دواییەی ئەرتەشی ئیسرائیل کە لەدوای ڕاگەیاندنی ئاگربەست لە غەززە دەستیپێکردووە هەتا ئێستا لانیکەم ٢٥ فەلەستینی گیانیان لەدەستداوە، دەیان کەس برینداربوون و زیاتر لە ١٠٠ کەس دەستگیر و ڕوانەی زیندان کراون. دەوڵەتی ڕەگەزپەرستی ئیسرائیل لەلایەکەوە بەپێی ئاگربەست لە غەززە، لە بەرامبەر ئازادکردنی بەدیلگیراوانی ئیسرائیلدا زیندانییانی فەلەستینی ئازاد دەکات، وە لەلایەکی دیکەوە بە هێرش بۆسەر لێواری ڕۆژئاوا کۆمەڵکوژی درێژەپێدەدات و زیندانەکانی دووبارە بە خەڵکی فەلەستین پڕ دەکاتەوە. ئەرتەشی ئیسرائیل ئامانجی ئەم هێرشە یان بەواتایەکی تر ئەم جەنایەتە جەنگییەی بەرەنگاربوونەوە لەگەڵ چەکدارە مەحەلییەکان و زەوتکردنی ئەنبارەکانی چەک ڕاگەیاندووە. ئەوەش لەکاتێکدایە کە هەتا ئێستا هیچ ڕاپۆرتێک سەبارەت بە دەستبەسەرداگرتنی ئەنبارەکانی چەک و تەقەمەنی بڵاونەکراوەتەوە.
تاوانەکانی شەڕی دەوڵەتی ئیسرائیل بەرامبەر بە خەڵکی فەلەستین لە لێواری ڕۆژئاوا لە کاتێکدا درێژەی هەیە کە تەنیا دوو حەوتوو لە ئاگربەستی غەززە تێپەڕیوە. لەماوەی ئەم ١٥ مانگ کۆمەڵکوژییەی ئەرتەشی ئیسرائیل لە غەززە دەیان هەزار بۆمبی دەستکردی ئەمریکا بەسەر خەڵکی غەززەدا تەقێندراوەتەوە. زیاتر لە ٤٦ هەزار کەس کوژراون و ١٠٠ هەزار کەس برینداربوون. ماڵ، نەخۆشخانە، خوێندنگە، ئەنباری دانەوێڵە، چاڵی ئاو و هەموو ژێرخانەکانی ئەم کەرتە وێران بووە و غەززە بووەتە شوێنێک کە چیتر بۆ ژیان نابێت.
هێرشی بەرینی ئەرتەشی ئیسرائیل بۆسەر لێواری ڕۆژئاوا و شاری جێنین نیشانی دەدات کە ئاگربەست لە غەززە تەنیا وەستانێکی کاتییە بۆ خاوکردنەوەی ماشێنی جینۆسایدی دەوڵەتی ئیسرائیل. هەتا کاتێک دەوڵەتێکی ڕەگەزپەرست لە ئیسرائیل دەسەڵاتدار بێت و لەلایەن ئەمریکا ئەوپەڕی پشتیوانیی لێبکرێت، هیچ کۆتاییەک بۆ کۆمەڵکوژیی خەڵکی فەلەستین تەسەور ناکرێت. ئەگەر ئەم ئاگربەستە ئامانجی کۆتایی هێنان بە جینۆساید، وەدیهێنانی مافی نەتەوەی فەلەستین بۆ پێکهێنانی دەوڵەت و بەرقەرارکردنی ئاشتی بایە دەبوو دەستبەجێ نەتانیاهۆ و کابینە جەنگییەکەی و بایدنی بە تاوانی شەڕ و کوشتار دەستگیر و ڕەوانەی زیندان کردبایە. دەبوو حوکمی دیوانی باڵای نێونەتەوەیی بۆ دەستبەسەرکردنی نەتانیاهۆ بەتاوانی جینۆساید جێبەجێ کرابایە. دەوڵەتی ئیسرائیل بە بێ یارمەتیی دارایی و چەکی دەوڵەتی ئەمریکا نەیدەتوانی ئەم حەمامی خوێنە لە جەحەنەمی غەززەدا بخاتە ڕێ. دەوڵەتی بایدن هەر لە سەرەتاوە لەئاست تاوانی شەڕی دەوڵەتی ئیسرائیل لە غەززە و لێواری ڕۆژئاوا ڕەزامەندیی نیشاندا و دوای ئەوەیکە نەتانیاهۆ بە هێرش بۆسەر لۆبنان قۆناغی دووهەمی شەڕی بۆ گۆڕینی نەزمی ناوچەکە ڕاگەیاند، ئەمجارە بۆ بەرەوپێش بردنی ئامانجە ئیمپریالیستییەکانی لە ڕۆژهەڵاتی ناوەڕاست بوو بە جێبەجێکاری بەشێک لەم ستراتێژە جەنگییە.
پازدە مانگ شەڕ و کۆمەڵکوژی لە غەززە لە هەمان کاتدا کە ئەوپەڕی دووڕوویی نەزمی نێونەتەوەیی دیموکراسیی لیبڕاڵ و داکۆکیکارانی مافی مرۆڤی ئاشکرا کرد، بنبەست و شکستی ڕێکخراوی حەماس و باقیی ڕەوتە ئیسلامییەکانی وەک مۆدێلێک لە دەسەڵات و ستراتێژی سیاسی و بنەمای تاکتیکیی ئەوانی لە بەرامبەر داگیرکاری و سیاسەتی ئاپارتایدی ڕەگەزیی دەوڵەتی ئیسرائیلدا نیشاندا. حەماس و باقیی گرووپە ئیسلامییەکان بە ستراتێژی و تاکتیک و توندڕەوییەکانیان، لەوانە بە هێرشی تیرۆریستیی حەوتی ئۆکتۆبر و جەنایاتێک کە ئەنجامیاندا، بەکردەوە خزمەتیان کرد بە پەرەسەندن و بەهێزبوونی ڕەوتە ڕاست و فاشیستەکان لە ئیسرائیل و نەسلکوژیی ئەوان لە غەززە. حەماس و بزووتنەوەی فەتح بەشێک لە چارەسەری مەسەلەی فەلەستین نین، بەڵکوو خۆیان بەشێکن لە کێشەکە. شکڵ گرتنی بزووتنەوەی ئازادیخوازی لە فەلەستین لە گرەوی ئەوەدایە کە لەڕێگەی خەبات لەدژی داگیرکاریی دەوڵەتی ئیسرائیل و لەپێناوی ڕەزگاریی ڕاستەقینە، کرێکاران و زەحمەتکێشانی فەلەستین لەژێر نفووزی ئەم ڕەوتە کۆنەپەرستانە دەرکێشرێن.
لەئێستادا ئەگەرچی نەتەوەی فەلەستین لە نێوان ناوچەکانی ژێر کۆنتڕۆڵی ئیسرائیل، غەززە، لێواری ڕۆژئاوا، کەمپی ئاوارەکان لە ئۆردۆن و شوێنەکانی دیکەدا لەت لەت بووە، بەڵام هیوای پێکهێنانی دەوڵەتی سەربەخۆ و هیوای ڕزگاریی ڕاستەقینە هێشتا زیندووە. تەنیا درێژەی بزووتنەوەی جیهانی لەدژی جینۆسایدی حکوومەتی ئیسرائیل و بۆ دیفاع لە ئازادیی فەلەستین دەتوانێ هاوسەنگیی هێز بە قازانجی خەبات و خۆڕاگریی ئەم نەتەوە ستەمدیدەیە بگۆڕێت و ئاسۆیەکی هیوابەخش بەڕووی خەڵکی ئەم ناوچەیەدا بکاتەوە.