ئەگەرچی لایەنەکانی پەیوەندیداری ڕژیم لە چەند ساڵی ڕابردوودا وایان نیشان داوە کە لە خەمی وشکبوونی دەریاچەی ورمێ دان بەڵام ڕاپۆرتەکان دەریان خستووە کە ئەو دەریاچەیە لەپێناو دەرهێنانی مادەی گرانبەهای “لیتیۆم” وشک کراوە.
ڕاپۆرتە بڵاوکراوەکان هەروەها باس لەوە دەکەن کە بوونی مادەی گرانبەهای “لیتیۆم” بووەتە پاساو بۆ ئەوەی هەوڵی جیدی بۆ ڕێگری لە وشکبوونی ئەو دەریاچەیە نەدرێت و لە پێناو سوودی ماددیدا وشک بکرێ.
وشکبوونی دەریاچەی ورمێ، دەریاچەی خوێ لە قوم، بەختگان، هاموون و جازمووریان لە ئێران لە دەیەی حەفتاوە دەستی پێکردووە و زۆرێک لەسەر ئەو باوەڕەن کە لایەنە پەیوەندیدارەکانی ڕێژیم بە ئەنقەست لەو بارەوە کەمتەرخەمییان نیشان داوە.
“لیتیۆم” کانزایەکە بە ڕەنگی زیو و سپی و حاڵەتی نەرم بە ژمارەی ئەتۆمی “سێ”ـیە و لە دۆخی هەوای ستاندارددا سووکترین کانزای ڕەقهەڵاتوویە. هەر کیلۆ لەو کانزایە لە ئێستادا لە بازاڕە جیهانییەکان ١٦٠ دۆلاره.