کرێکاران و خەڵکی تێکۆشەر و ئازادیخواز!
لە سەروبەندی ٢٥ی خەرمانان، دووهەمین ساڵوەگەڕی قەتڵی حکوومەتیی ژینا ئەمنیی بەدەستی ڕژیمی تاوانکاری کۆماری ئیسلامیداین. لە مانگی خەرمانانی ساڵی ١٤٠١ی هەتاوی ئاگری تووڕەیی و ناڕەزایەتیی جەماوەری کوردستان دژبەم تاوان و قەتڵە حکوومەتییە بەخێرایی سەرتاسەری ئێرانی داگرت. لەماوەی دوو ساڵی ڕابردوودا کرێکاران و زەحمەتکێشان و خەڵکی خەباتکاری کوردستان هاوهەنگاو و هاوشان لەگەڵ ژنان و پیاوانی ئازادیخواز و یەکسانیخواز، جەماوەری وەگیانهاتوو لە ڕژیمی کۆماری ئیسلامی لە سەرانسەری ئێران سەرەڕای هەڵکشان و داکشانەکانی بزووتنەوەی شۆڕشگێڕانەی ژینا لە خەبات دژبە جەنایات و سەرکوتگەرییەکانی ئەم ڕژیمە لە هیچ فیداکاری و تێکۆشانێک دەریغیان نەکرد. خەڵکی تێکۆشەری کوردستان لە کردەوەیەکی سیاسیی شکۆمەند و هاوئاهەنگ لەگەڵ خەڵکی سەرتاسەری ئێران لە ١١ی مانگی ڕەشەممەی ساڵی ڕابردووەوە هەتا ئێستا سێ جار مۆری ناڕەوابوون و نامەشرووعبوونیان لە نێوچاوانی کۆماری ئیسلامی داوە و نیشانیاندا کە بزووتنەوەی شۆڕشگێڕانەی ژینا بۆ ڕووخاندنی ئەم ڕژیمە و بۆ کۆتایی هێنان بە هەژاری و نەهامەتیی ئابووری، هەڵاواردنی ڕەگەزی و نەتەوەیی و جۆرەکانی تری بێ مافیی سیاسی و کۆمەڵایەتی هەروا درێژەی هەیە.
لە سەروبەندی دووهەمین ساڵڕۆژی قەتڵی حکوومەتیی ژینا و سەرهەڵدانی بزووتنەوەی شۆڕشگێڕانەی سەرتاسەریدا، هەوڵی بەرین لەلایەن لاوانی شۆڕشگێڕی گەڕەکەکانی شارە جۆراوجۆرەکان، ڕێکخراوە خوێندکارییەکان و ناوەند و هەڵسووڕاوانی بوارە جۆراوجۆرەکانی چالاکیی کۆمەڵایەتی لە شارەکانی کوردستان و سەرتاسەری ئێران بۆ ڕێزلێنان لەم ڕۆژە لەئارادایە.
شۆرای هاوکاریی هێزە چەپ و کۆمۆنیستەکان هاوهەنگاو لەگەڵ ئەم تێکۆشانە گشتییانە بۆ نموونە هەوڵ و تێکۆشانی خەڵکی کرێکار و زەحمەتکێش و خەباتکاری کوردستان، پشتیوانیی خۆی لە بانگەوازی مانگرتنی گشتی لە ڕۆژی یەکشەممە ٢٥ی خەرمانان دەردەبڕێت. ڕۆژی ٢٥ی خەرمانان بکەنە ڕەمزی یەکگرتوویی و هاوپشتی و بیکەنە هێمای عەزم و ئیرادەی پۆڵایینمان بۆ بەدواداچوونی ئامانجەکانی بزووتنەوەی شۆڕشگێڕانەی ژینا و بۆ تێکشکاندنی سیاسەتی سەرکوتگەرانەی کۆماری ئیسلامی. پێویتسە لە سەرتاسەری ئێران و لە دەرەوەی وڵات بە هەر شێوەیەک کە دەگونجێ یەکگرتوویی و هاودەنگیمان نیشان بدەین.
لەم ڕۆژەدا، وێڕای ڕێزگرتن لە گیانبەختکردووانی بزووتنەوەی شۆڕشگێڕانەی ساڵی ١٤٠١ی هەتاوی، پێویستە لەسەر کۆتایی هێنان بە لێپرسینەوە و گرتن و پەروەندەسازی لەدژی چالاکانی بزووتنەوە کۆمەڵایەتییەکان، لەسەر ئازادیی بەندکراوان و لەسەر هەڵوەشاندنەوەی سزای ئێعدام لەلایەن ڕژیمی تاوانکاری کۆماری ئیسلامی پێداگری بکەین.
بڕووخێ ڕژیمی سەرمایەداریی کۆماری ئیسلامی
بژی ئازادی، بژی سۆسیالیزم!
شۆرای هاوکاریی هێزە چەپ و کۆمۆنیستەکان
٢٢ی خەرمانانی ١٤٠٣ بەرابەر بە ١٢ سێپتامبەری ٢٠٢٤
واژۆکان: ئیتحادی سۆسیالیستی کارگەری، حیزبی کۆمۆنیستی ئێران، سازمانی ڕاهی کارگەر، سازمانی فەداییان (ئەقەلییەت) و هەستەی ئەقەلییەت