لە پلینۆمی سێهەمی کۆمیتەی ناوەندیی حیزبی کۆمۆنیستی ئێران هەڵبژێردراوی کۆنگرەی ١٣ کە لە ڕۆژانی شەممە و یەکشەممە ٢١ و ٢٢ی مانگی خەزەڵوەر بەرابەر لەگەڵ ١٢ و ١٣ی مانگی نوامبری ٢٠٢٢ بەڕێوەچوو، بەشی سەرەکیی باسەکان لە دەوری ڕاپۆرتی سیاسیی کۆمیتەی ئیجرایی بە پلینۆم چڕ بووەوە کە لەژێرناوی بزووتنەوەی شۆڕشگێڕانەی ژینا و ئەرکی کۆمۆنیستەکان ئامادەکرابوو. لەم ڕاپۆرتەدا تەئکید کرابوو کە: ئەم ئاخێزە شۆڕشگێڕانەیە بێجگەلە ئەم دەستکەوتە سیاسییانە لە بواری تاکتیکیشەوە پوختەتر لە ئاخێزەکانی پێشوویە. تاکتیکی وێکخستنی ناڕەزایەتییەکانی شەقام لەگەڵ مانگرتنی گشتی لەئاستی شار، بەرپاکردنی ناڕەزایەتیی سەرشەقام هاوکات لە چەندین شوێنی شار و پێکهێنانی ڕێبەندان بۆ سنووردارکردنی توانای مانۆڕی هێزە سەرکوتگەرەکان، خستنە داو و ڕاونانی هێزە سەرکوتگەرەکان، هێرش بۆسەر پایەگا و ناوەندە نیزامییەکانی ڕێژیم لە وڵام بە پەلاماری هێزە سەرکوتگەرەکان، گرتنەوە و ئازادکردنی چەند ناوچە لە شار بۆ چەند کاتژمێر، کردنی زانکۆ و مەدرەسە بە ناوەندی ناڕەزایەتی و مانگرتن کە هەزینەی سیاسیی سەرکوت لەم شوێنانە بۆ ڕێژیم قورسترە و لە دوایین نموونەدا بەڕێوەبردنی مەراسیمی چلەمین ڕۆژی گیان بەختکردووانی ئەم ئاخێزە لە شارە جۆراوجۆرەکان وەک تاکتیکی کاریگەر بۆ جەماوەریتر کردنەوەی ئەم بزووتنەوە شۆڕشگێڕانەیە، لە زومرەی ئەو تاکتیکانە بوون کە لەم قۆناغەدا لەلایەن چالاکان و ڕێکخەرانی ناڕەزایەتییەکانەوە بەکار هێندراون. ڕێکخەرانی ئەم ناڕەزایەتییانە بە گرتنەبەری ئەم تاکتیکە جۆراوجۆرانە سەرانی ڕێژیم و هێزە سەرکوتگەرەکانیان ئاڵۆز و سەرلێشێواو کردووە.
ئەم بزووتنەوە شۆڕشگێڕانەیە بەپێچەوانەی بۆچوونی سەرانی هێزە ئۆپۆزیسیۆنەکانی بۆرژوایی کە بە بزووتنەوەیەکی خۆڕسک و خۆبەخۆیی پێناسەی دەکەن، لانیکەم لەئاستی مەحەلیدا خاوەنی ئاستێکی بەرچاو لە ڕێکخستنە. لەماوەی دوو مانگی ڕابردوودا ئێمە شایەدی بەشداریی نەسلێک لە ڕێبەران و چالاکان و ڕێکخەرانی ناڕەزایەتییەکانین کە ئەگەرچی لاون، بەڵام دوو ئاخێزی مەزنی شۆڕشگێڕانە لەماوەی پێنج ساڵی ڕابردوو، ئاخێزی جەماوەریی خەڵکی خووزستان و ئیسفەهان دژبە بێ ئاوی، ناڕەزایەتیی جەماوەری دژبە هەژاری و گرانی و کاریگەریی مانگرتنی شکۆداری کرێکارانی حەوت تەپە و بەتایبەت کرێکارانی پەیمانیی نەوت و گاز و پێترۆشیمی لە ساڵی ١٤٠٠ی هەتاوی و درێژەی مانگرتن و ناڕەزایەتیی دەورەیی و سەرانسەریی مامۆستایان لەسەر کەشوهەوای کۆمەڵگەیان تەجروبە کردووە. ئەوەیکە ئەم ئاخێزە شۆڕشگێڕانەیە سەرەڕای سەرکوتی خوێناوی و ڕەشبگیریی بەرین هەروا بەردەوامە و چووەتە قۆناغێکی نوێوە، بەشێکی بەرهەمی ڕۆڵی ئەم ڕێبەرانەیە. ژنان و پیاوانی لاوی شۆڕشگێڕ لە گەڕەکی شارەکان لە تۆڕێکی خەباتکارانەی گرێداودان و پەیوەندییەکی زیندوو و ئۆرگانیکیان لەگەڵ شوێنی چالاکیی خۆیان هەیە. ناوەند و ڕێکخراوە جۆراوجۆرە خوێندکارییەکان لە جەرگەی هەر ئەم ناڕەزایەتییانەدا پێکهاتوون. لە هێندێک لە مەدرەسەکان ڕێکخراوەکانی خوێندکاران پێکهاتوون. دوو مانگ مانگرتن و کۆبوونەوەی ناڕەزایەتیی لە دەیان زانکۆ و مەدرەسە، مانگرتنی سەرانسەریی مامۆستایان و بەشەکانی تر هەر هەموویان نیشانەی ئاستێکی باڵا لە ڕێبەری و سازماندانە. بەڵام ئەم ڕێبەرە خۆجێییانە بەهۆی ئەوەیکە لە دڵی هەر ئەم ئاخێزە شۆڕشگێڕانەیەدا هاتوونەتە دەر، ستراتێژی سیاسیی ڕوون و بەرنامەیەکی دیاریکراویان بۆ هیدایەتی گشت بزووتنەوەکە و بۆ بەڕێوەبردنی کۆمەڵگە لە دواڕۆژی ڕووخاندنی کۆماری ئیسلامیدا نییە. ئەم ڕێبەرە خۆجێییانە و ڕێکخەرانی ناڕەزایەتییەکانی شەقامیش لەژێر گوشاری سەرکوت و ڕەشبگیری، پچڕاندنی ئینتەرنێت، فیلتێرینگی تۆڕە کۆمەڵایەتییەکان نەیانتوانیوە پێکەوە پەیوەند بدرێن. لەم ڕووەوە ئەم ئاخێزە شۆڕشگێڕانەیە ئەگەرچی سەرانسەرییە، بەڵام هێشتا ڕێبەرییەکی سەرانسەریی بە ئاسۆی شۆڕشگێڕانە و سۆسیالیستییەوە نییە. ئەم بۆشایییە ئەرکێکی تایبەت دەخاتە دەستووری کاری هەڵسووڕاوانی کۆمۆنیست و حیزب و ڕێکخراوەکانی بزووتنەوەی کۆمۆنیستیی ئێران.
ئەم بزووتنەوە شۆڕشگێڕانەیەی ئێستا سەرەڕای دەستکەوتە مەزنەکانی و سەرەڕای شەوق و هیوایەک کە لە کۆمەڵگەدا پێکی هێناوە، درێژە و پێشڕەوییەکەی هەروا لە گرەوی سەراسەریتر بوونەوە و جەماوەریتر بوونەوە و هاتنە مەیدانی چینی کرێکار لەئاستی کۆمەڵایەتی و سەرانسەریدایە. ئەوەیکە زۆربەی جەماوەری ژێر ستەمی ئێران بەم بزووتنەوەیە پەیوەست نەبوون، خۆی بەتەنیا ناتوانێ خاڵی لاواز بێت، هەموو شۆڕشە مەزنەکانی مێژوو کەمینەیەکی شۆڕشگێڕ و پێداگر دەستیان پێکردووە و لە درێژەدا جەماوەری بوونەتەوە. ئەم بزووتنەوەیەی ئێستا بەرەو هەرچی زیاتر جەماوەری بوونەوە هەنگاو هەڵدەگرێت. هەر ئەندازە ئەم ئاخێزە سەرانسەری بێتەوە و پارێزگا و شاری زیاتر لەخۆ بگرێت، دەتوانێ لە چڕبوونەوەی هێزی سەرکوتگەری دوژمن لە ناوەندە سەرەکییەکانی ناڕەزایەتی ڕێگری بکات. جەمازەریتر بوونەوەی ئەم ئاخێزە دەبێتە هۆی ئەوەیکە هێزە سەرکوتگەرەکان نەتوانن ڕیزی ناڕازییان پەڕاکەندە بکەن و ئەم ناڕەزایەتییانە بەرەو شەڕ و تێکهەڵچوونی شەقام بەرن. چینی کرێکار کە بێگومان دڵی لەگەڵ ئەم ناڕەزایەتییانە لێدەدات، ئەگەر بە مانگرتنی سەرانسەری بێتە مەیدان و ماشێنی سەرکوتی ڕێژیم ئیفلیج و زەوینگیر بکات دەتوانێ درێژە و پێشڕەویی ئەم ئاخێزە شۆڕشگێڕانەیە زەمانەت بکات. بە بێ هاتنە مەیدانی چینی کرێکار، بە بێ دابینکردنی هێژمۆنی و ڕێبەریی ئەم چینە، بزووتنەوەی شۆڕشگێڕانەی ئێستا توانای ڕووخاندنی شۆڕشگێڕانەی دەسەڵاتی ئیسلامی و وەدیهێنانی داخوازی و دروشمی ئازادیخوازانی نابێت. هەوڵ بۆ ڕەواندنی ئەم کەموکۆڕییانەیە، ئەرکی سەرەکیی کۆمۆنیستەکان لەم قۆناغەدا دیاری دەکات.
ئەو مەترسییانەی هەڕەشە لەم ئاخێزە شۆڕشگێڕانەیە دەکەن!
سەرکوتی خوێناوی و بەرینتر لەوەیکە هەتا ئێستا ئەنجام دراوە یەکێک لەو مەترسییانەیە کە هەڕەشە لەم بزووتنەوە شۆڕشگێڕانەیە دەکات. ئەگەرچی ڕەنگدانەوەی جیهانیی ئاڵوگۆڕەکانی ئێران هەزینەی سیاسیی سەرکوتی بەرینی بۆ ڕێژیمی ئیسلامی یەکجار بردووەتە سەرێ و لەلایەکی دیکەوە بەسەرەنجدان بەوەیکە سەرکوتی بەرین سەرەکیترین بژاردەی ڕێژیمە بۆ بەرەنگاربوونەوە لەگەڵ ڕەوتی ڕوو لە گەشەی ئەم بزووتنەوەیە، لەم ڕووەوە ئەم دوایین بژاردە و تاکتیکە بەشێوەیەکی پارێزکارانەتر بەکار دێنێت. بەڵام بە هەموو ئەمانەشەوە سەرکوتی بەرین مەترسییەکی جیددییە بۆ ئەم بزووتنەوەیە. مەترسییەکی ئیحتمالیی دیکە سازانی سپای پاسداران لەگەڵ ئەمریکا و دەسەڵاتەکانی ڕۆژاوایە. لەگەڵ پێشڕەویی ئەم ئاخێزە شۆڕشگێڕانەیە سپای پاسداران کە زیاتر لە شەست لەسەدی ئابووریی وڵاتی لەدەست دایە و ئامرازە سەرەکییەکانی دەسەڵات لەوانە هێزی چەکدار، دەزگای ئیتلاعات، دیپلۆماسیی مەیدانی و سەدا و سیما و ناوەندەکانی تری لە ئیختیار دایە و بەم ئیعتبارە کودتای خۆی پێشتر ئەنجام داوە، حازر نابێت هەموو ئەم سەرچاوانەی دەسەڵات لەپێناو پاراستنی نیزامی ویلایەتی فەقیه و دەزگای ڕووحانییەت لەدەست بدات. لەلایەکی دیکەوە پڕۆژەی ئاڵتێرناتیڤسازیی دەسەڵاتە ئیمپریالیستەکان بە یارمەتیی هێزە جۆراوجۆرە ئۆپۆزیسیۆنەکانی بۆرژوازی بۆ تێکشکاندنی شۆڕش، بە بێ پشتیوانی و بەشداریی بەشێک لە سپای پاسداران و ئەرتەش و هێزی چەکدار، پڕۆژەیەکی کارتۆنییە و لە باشترین حاڵەتدا تەنیا ڕۆڵی ئامرازی گوشاری سیاسیی بۆسەر ڕێژیمی ئیسلامی دەبێت. بوونی ئەم مەترسیانە بۆ جارێکی دیکە جەخت لەسەر پێویستیی هاتنە مەیدانی چینی کرێکار و ڕووخاندنی شۆڕشگێڕانەی ڕێژیمی ئیسلامی و تێکشکاندنی ماشێنی دەوڵەتییەکەی دەکات.
تەلەڤیزیۆنی کۆمەڵە و حیزبی کۆمۆنیستی ئێران