پلینۆمی سێهەمی کۆمیتەی ناوەندیی حیزبی کۆمۆنیستی ئێران هەڵبژێردراوی کۆنگرەی ١٣ لە ڕۆژانی شەممە و یەکشەممە ٢١ و ٢٢ی مانگی خەزەڵوەر بەرابەر لەگەڵ ١٢ و ١٣ی مانگی نوامبری ٢٠٢٢ بەڕێوەچوو. بەشی سەرەکیی باسەکان لە دەوری ڕاپۆرتی سیاسیی کۆمیتەی ئیجرایی بە پلینۆم چڕ بووەوە کە لەژێرناوی بزووتنەوەی شۆڕشگێڕانەی ژینا و ئەرکی کۆمۆنیستەکان ئامادە کرابوو. لە بەشێک لەم ڕاپۆرتەدا لەسەر پێویستیی پەرەپێدانی ئاسۆی ڕووخاندنی شۆڕشگێڕانە لەناو جەماوەر تەئکید کرا.
لەو جێگەوە کە بەشە جۆراوجۆرەکانی ئۆپۆزیسیۆنی بۆرژوازیی ئێران لەژێرناوی دووری گرتن لە توندوتیژی شۆڕش بە هەڵە دەزانن، لە وەها قۆناغێکدا یەکێک لە ئەرکە سەرەکییەکانی ئێمە ڕەواجدان و پەرەپێدانی وێنەیەکی کامڵە لە ڕووخاندنی شۆڕشگێڕانەی کۆماری ئیسلامی بە مانای تێکشکاندنی گشت ماشێنی دەوڵەت، لەوانە هەڵوەشاندنەوەی ئەرتەش و سپای پاسداران، هێزی نیزامی و سەرجەم ئۆرگانەکانی سەرکوت و بوروکراتیکی دەسەڵاتدار و ناوەندە تەبلیغی و ئایدیۆلۆژییەکان و هەڵوەشاندنەوەی یاسای بنەڕەتی و باقیی یاسا دژەئینسانییەکانی ڕێژیمی ئیسلامی. پێویستە ئاسۆ و ئاستی چاوەڕوانیی کرێکاران و بێبەشان لە ڕووخاندنی شۆڕشگێڕانەی کۆماری ئیسلامی بەجۆرێک بەرز بکەینەوە کە هیچ کام لە بەشەکانی ئۆپۆزیسیۆنی بۆرژوایی نەتوانن بە دەست بە دەست کردنی دەسەڵات لەسەر سەری خەڵکەوە شۆڕش لەبار بەرن. کۆمۆنیستەکان لە ڕوانگەی بەرژەوەندی چینی کرێکاری شۆڕشگێڕەوە خوازیاری شۆڕشی بەردەوامن. بۆ ئێمە کۆمۆنیستەکان ڕووخاندنی ڕێژیمی کۆماری ئیسلامی، کردەوەیەکی شۆڕشگێڕانە بەئامانجی ستاندنی دەسەڵاتی سیاسی و ئابوورییە لە گشت چینی سەرمایەداری ئێران. هەر بۆیە خەباتی ئێمە بۆ ڕووخاندنی کۆماری ئیسلامی، بوارێکی جیانەکراوە لە ڕوانگەی سیاسی و خەباتکارانەی ئێمە لەپێناو شۆڕشی کۆمەڵایەتی. شۆڕشی کۆمەڵایەتی نەک هەر بەمانای دەست بە دەست بوونی دەسەڵاتی سیاسی، بەڵکوو بەمانای ژێروژوورکردن و ڕیشەکێش کردنی نیزامی سەرمایەداری و بنیاتنانی نەزم و سیستەمێکی نوێی کۆمەڵایەتییە کە کاریگەریی لەسەر هەموو بەشەکانی کۆمەڵگە هەبێت و خۆشبژێوی و یەکسانیی هەموو مرۆڤەکان زەمانەت بکات.
ڕەخنەی لێبڕاوانە لە ئۆپۆزیسیۆنی بۆرژوایی
یەکێک لە ڕێگاکانی بەرەنگاربوونەوە لەگەڵ مەترسیی تێکشکاندنی ئاخێزی شۆڕشگێڕانەی ئێستا و یەکێک لە بنەماکانی دابینکردنی هێژمۆنیی چینی کرێکار لە خەبات بۆ ڕووخاندنی کۆماری ئیسلامی ڕەخنەی ڕادیکاڵ و ڕیشەیی سازشکاری، ڕێکار و ئاڵتێرناتیڤی بەشە جۆراوجۆرەکانی ئۆپۆزیسیۆنی بۆرژواییە، لە کۆماریخوازانی لائیک و سێکۆلارەوە بگرە تا هێزەکانی ناوەندی هاوکاری لە کوردستان، تا شۆرای مودیریەتی گوزار و موجاهدین و سەڵتەنەت تەڵەبەکان. ئەم هێزانە هێستاش بە هیوای تێپەڕینی هێمنانە لە کۆماری ئیسلامی یان ئینتقالی دەسەڵاتی سیاسی لە سەرەوە، ڕاکێشانی پشتیوانی ئەرتەش و سپای پاسداران و هاوکاری زلهێزە ئیمپریالیستەکانن. سەڵتەنەت تەڵەبەکانیش ڕەوتی بەرەودواوەچوونی ژیانی کۆمەڵایەتیی لە ئێرانی پاش شکستی شۆڕشی ٥٧، بە هۆکاری هەڵەبوونی شۆڕشی داهاتوو دەزانن. نابێ ڕێگە بدەین ئەم هێزانە بەم شێوەیە بێباکانە، دژبە شۆڕش تۆوی گومان و ناباوەڕی بچێنن.
لەو جێگەوە کە دروشمەکان پێگەیەکی دیاریکراویان لە قووڵبوونەوەی ئەم بزووتنەوە شۆڕشگێڕانەیەدا هەیە، پێویستە قووڵبوونەوەی ئەم ئاخێزە و ئاسۆی ڕوونی هەرچی زیاتر لە دروشمەکاندا ڕەنگ بدەنەوە. بێگومان دروشمەکانی “ژن، ژیان، ئازادی”، ” مەرگ بۆ دیکتاتۆر” و “مەرگ بۆ خامنەیی” و “مەرگ بۆ جمهوری ئیسلامی” دروشمگەلێکی شۆڕشگێڕانەن چون وەدیهاتنیان لە گرەوی ڕووخانی کۆماری ئیسلامیدایە . بەڵام ئەم دروشمانە بەتەنیا ئاسۆیەکی ڕوون لە ڕووخاندنی ڕێژیمی ئیسلامی نیشان نادەن. هەروەک چۆن دروشمی مەرگ بۆ شا لە شۆڕشی ٥٧دا ئاسۆیەکی ڕوونی نیشان نەدا، شای ستەمکار ڕۆیشت، بەڵام ڕێژیمێکی ستەمکار و تاوانکارتر جێگای گرتەوە. دروشمی مەرگ بۆ موبارەک لە میسر، مەرگ بۆ بێن عەلی لە تونس و مەرگ بۆ قەزافی لە لیبی لە ئاخێزە جەماوەرییەکانی ڕۆژهەڵاتی ناوەڕاستدا ئاسۆیەکی ڕوونیان نیشان نەدا. ئەم دیکتاتۆرانە لەسەر کار نەمان بەڵام دەسەڵاتە سەرمایەدارە کۆنەپەرستەکان لەسەر جێگای خۆیان مانەوە و جەماوەری خەڵک سەرەڕای هەموو گیانفیداییەکانیان بە خواستەکانیان نەگەیشتن. هەربۆیە دروشمی مەرگ بۆ دیکتاتۆر و بڕووخێ کۆماری ئیسلامی پێویستە لە بەیانی خواستی جەماوەری ستەملێکراو کە وەدیهاتنی هەر کامیان گۆڕانێک لە ژیانیاندا پێک دێنێنت، مانا پەیدا بکات. واتە ئەو دروشمانەی کە پەیوەندییەکی نزیکیان هەیە لەگەڵ چاوەڕوانییەکان لە حکومەتی سەرچاوەگرتوو لە شۆڕش. بۆ نموونە هەڵوەشاندنەوەی گشت دەزگای سەرکوت و بەرەو دواوە بردنی جەماوەر، جیایی دین لە دەوڵەت، ئازادیی بێ شەرت و مەرجی سیاسی، هەڵوەشاندنەوەی گشت یاساکانی هەڵاواردنی ڕەگەزی و دژی ژن و بەرابەریی ژن و پیاو، ئازادیی سەرجەم بەندکراوانی سیاسی و هەڵوەشاندنەوەی سزای ئێعدام، دابینکردنی بیمەی بێکاری بۆ هەموو بێکاران، کۆتایی هێنان بە لەناوبردنی ژینگە، هەڵوەشاندنەوەی دیپلۆماسیی نهێنی و هیتر، لە زومرەی ئەو کارانەن کە هەر دەوڵەتێکی سەرچاوەگرتوو لە ڕاپەڕینی سەرکەتووانەی جەماوەر دەستبەجێ پێویستە ئەنجامی بدات و بیخاتە دەستووری کارەوە. هەروەها، دروشمەکانی وەک “نان، کار، ئازادی، ئیدارەی شۆرایی”، “ئازادی، بەرابەری، حکوومەتی کرێکاری”، “بژی سۆسیالیسم” کە ئاسۆی شۆڕشی بەردەوام و نەپساوە تا ڕووخاندنی سەرمایەداری دەخاتە بەردەم بزووتنەوەی کرێکاری و ئەم ئاخێزە شۆڕشگێڕانەیە، پێویستە هەرچی زیاتر جەماوەری بنەوە.
بەشێک لە باسەکانی پلینۆم بە ڕێکخستنی شۆرایی تەرخان کرا.
لە بواری ڕێکخستندا پێویستە بیر لەوە بکەینەوە کە تۆڕی پێکەوە پەیوەنددراوی لاوانی شۆڕشگێر لە گەڕەکی شارەکان و لە زانکۆکان کە لە سازماندانی ئەم ناڕەزایەتییانەدا دەورونەخشیان بووە، بەردی بناغەی شۆراکانی گەڕەک و زانکۆ پێک بێنن. ئەم شۆرایانە لە بارودۆخی ئێستادا دەتوانن وەک ئۆرگانی ڕێکخستن و ڕێبەریی خەباتی جەماوەری ڕۆڵ ببینن و لەگەڵ لاوازتر بوونی ڕێژیمی ئیسلامی و لەگەڵ هەر بۆشاییەک کە لە ئیدارە و بەڕێوەبردنی گەڕەک و شاردا پێک دێت وەک ئۆرگانی ئیدارە و مودیریەتی کۆمەڵگە دەورونەخشیان بێت. لەم بارودۆخەدا پێویستە بناغەی ڕێکخراو و شۆرای جەماوەریی ژنان داڕێژرێت.
بزووتنەوەی کرێکاریی ئێران لەماوەی ساڵانی ڕابردوودا هەزاران مانگرتن و ناڕەزایەتیی گەورە و چکۆلەی تەجروبە کردووە. لە جەرگەی ئەم مانگرتنانەدا نەسلێک لە چالاکان و ڕێبەرانی کرێکاری پەروەردە بوون و هاتوونەتە مەیدان کە زۆربەیان ئەزموونی ڕێکخستن و ڕێبەریی مانگرتن، ئەزموونی بەرپایی مەجمەعی عموومیی کرێکاری و دەخاڵەتدانی کرێکاران لە بڕیاردانیان هەیە. کرێکارانی ئازەراب و هێپکۆ لە ئەراک، مانگرتنی کرێکاری و بەرپایی مەجمەعی عموومییان تەجروبە کردووە. کرێکارانی سەنعەتی نەوت و پێترۆشیمی تەجروبەی پێکهێنانی شۆرای ڕێکخستنی ناڕەزایەتیی کرێکارانی پەیمانی، سازماندانی مانگرتنی سێ مانگە و بەڕێوەبردنی مەجمەعی عموومییان هەیە. کرێکارانی فوولادی ئەهواز، مەعدەن و ڕێگەی ئاسن و ناوەندەکانی تر، خاوەنی ئەزموونی پێکهێنانی کۆمیتەی مانگرتن و ڕێکخستنی مانگرتنی کرێکارین. مامۆستایان، ڕێگای بەڕێوەبردنی مانگرتن و ناڕەزایەتیی سەرانسەرییان نیشان دا. کرێکارانی حەوت تەپە لەماوەی پێنج ساڵی ڕابردوودا دەیان جار مەجمەعی عموومیی کرێکارانیان بەڕێوەبردووە و ژیانی شۆراییان تەجروبە کردووە. ئەم ئەزموونانە پێمان دەڵێن کە ماتریالی ئینسانی و کادری ڕێکخەر، کە بە ئیدەی دەخاڵەت دانی ڕاستەوخۆی کرێکاران لە بڕیاردان و بە ئیدەی شۆرایی بارهاتوون، لەناو بزووتنەوەی کرێکاریی ئێراندا بوونی هەیە. لە لایەکی دیکەشەوە بزووتنەوەی کرێکاری بزووتنەوەیەکی زیندوویە و بەردەوام لە جموجۆڵ دایە و ڕۆژانە شایەدی مانگرتن و ناڕەزایەتیی کرێکارین. دیاردەیەکی کۆمەڵایەتی کە لە حاڵی حەرەکەتدا بێت، ڕێگای پێگەیشتنی خۆی پەیدا دەکات. لەماوەی ساڵی ڕابردوودا چینی کرێکار زیاتر لە سێ هەزار مانگرتن و ناڕەزایەتیی تەجروبە کردووە. کەوابوو بەستێنی گونجاوتر بۆ پێکهێنانی شۆرای کرێکاری ئامادەیە. بێگومان پێکهێنانی شۆرای کرێکاری لە کارخانە و ناوەندە سەنعەتییەکان پێویستی بە هاوسەنگییەکی هێزی گونجاوترە. بەڵام پێویستە ئەم واقعییەتەشمان لەبەرچاو بێت کە هەوڵی ڕێکخراو بۆ پێکهێنانی شۆراکان، خۆی بەشێکە لە خەبات بۆ گۆڕینی هاوسەنگیی هێز بە قازانجی بزووتنەوەی کرێکاری و سەروساماندان بە پایەکانی ئاڵتێرناتیڤی سۆسیالیستی.
تەلەڤیزیۆنی کۆمەڵە و حیزبی کۆمۆنیستی ئێران