ڕۆژانێک تێدەپەڕێنین کە ڕەنگە لەچاو بەرینایی گۆڕانە کۆمەڵایەتییەکان زۆر کورت بنوێنن. لەم گۆشەیەی جیهان دەڵێی ئەقرەبەکان خێراتر دەسووڕێن. لێرە کۆت و بەندی هەموو ئەو دیلیەتییەی کە زیاتر لە چوار دەیە بەسەر ژنانی کۆمەڵگەدا سەپاوە بە ئازایەتی و قارەمانیەتیی هەر ئەم ژنانە دەپچڕێت. ژنان خۆیان فەرمان دەدەن و خۆشیان جێبەجێکاری فەرمانی خۆیانن. دەڵێن ئێمە بەندی دیلیەتییەک کە زیاتر لە چوار دەیە لەژێرناوی سەرپۆش و حیجاب بەسەر ئێمەتاندا سەپاند، دەیدڕێنین، ئاگری تێبەردەدەین و هەموو ئەو خۆشی و شادییەی کە لێتان زەوت کردووین، دەیستێنینەوە. لە زانکۆکان دیواری هەڵاواردنی ڕەگەزیتان کێشابوو، بەڵام ئێمە ئێستا ئیرادەمان کردووە کە ئەم دیوارە بڕووخێنین و ئەم حوکمەی خۆشمان بەڕێوە دەبەین. حوکمتان دابوو کە شەقامەکان هی ئێوەی پیاوسالارانی کۆنەپەرستە، بەڵام ئێمە شەقامەکانمان کردە هی خۆمان. کۆنەپەرستترین بوونەوەرەکانتان لە گۆڕستانی هەزاران ساڵە هێنایە دەر تا هەرچییەک کە نیشانەی مرۆڤایەتی، پێشکەوتنخوازی، حورمەتی ئینسانی، ئازادی و بەرابەریی پێوەیە، لەناوی بەرن. کرێکارانی ئەم وڵاتە دەبووایە هەرزان و بێدەنگ بن ئەگینا دەتانخستنە بەندیخانە و تەنانەت تیکە نانەکەشتان لە چنگ دەردێنان. وەبەر گولـلەتان دان و شەلاقتان لە جەستەی لاواز و ماندوویان دا. منداڵانتان لە جیات مەدرەسە، ڕەوانەی کورەخانە و کارگەکان کرد و کردتاننە منداڵانی کار و شەقام. حورمەت و کەرامەتی بەساڵاچووانتان کردە قوربانیی تەماع و قازانجپەرستیی خۆتان. مامۆستایانتان ناچار کرد تا بە هەموو دەرد و ڕەنجێکەوە، هەم بۆ بژیوی خۆیان و هەم بۆ زانستی بەدوور لە جەهل و خورافە خەبات بکەن. ئێستا هەموو ئەم زامدارانە، هەموو ئەم تاڵانکراوانە، هەموو ژنانێک کە بە دیل کێشراون، هەموو لاوانێک کە داهاتووتان لێ زەوت کردوون. هەموو منداڵانێک کە ئایندەی بەفیڕۆچووی گەنجانی نەسلی پێشووی خۆیان دەبینن، هاتوونەتە مەیدان و دەنگیان هەڵبڕیوە. باوەڕتان بێ ئەوان ئیتر ئۆقرە ناگرن و ئەوەش هەموو ڕۆژێ لە مەدرەسە، شەقام، زانکۆ، کارخانە و لە گۆشە و کەناری کوچە و کۆڵان، لە ڕووناکایی و لە تاریکیدا هاوار دەکەن. “ئازادی، ئازادی، ئازادی” بووەتە ناوێ ڕەمز و خەباتکاران ئیتر بە بەند کێشرانی هیچ ژنێکیان بۆ تەحەمول ناکرێت. ڕزگاری لە کۆیلەتیی سەرمایە هاوار دەکەن و سوورن لەسەر ئەوەیکە دەرگای زیندانەکان بشکێنن، تا هیچ کەس بەخاتری بیروباوەڕ و بۆچوون نەخرێتە بەندیخانەوە.
جەماوەری خەڵک لەماوەی چوار دەیەی ڕابردوودا گەلێک جار تامی شکستیان چێشتووە و ئەمجار دەخوازن شکستەکانی ڕابردوویان بە سەرکەوتنیان لەبیر بکەن. بەڵام سەرەڕای هەموو ئەم هیوا و گوڕوتینە، نابێ فەرامۆشی بکەین کە زلهێزە ئیمپریالیستەکان لە بۆسە دان تا دیسانیش شایەدی شکستی ئێمە بن. لە بۆسەدان تا لەسەر سەری ئێمەوە مۆرە بێ بایەخەکانی خۆیان لە قالبی قارەمانێکی ساختە، لە قالبی سیمایەکی ڕازاوە و یان لە قالبی داکۆکیکاری لێبڕاوی سێکۆلاریزمدا بێننە مەیدان، تا هەموو ئێمە ببینە تەماشاچیی سیرکەکەیان. هەموو توانای خۆیان دەخەنە کار تا دەنگی ڕەسەنی ئێمە لەگەڵ دەنگی ساختەیان تێکەڵ بە بەک بکەن و لە میدیا سەرەکییەکانی جیهانی سەرمایەدارییەوە لە جاڕی بدەن. دروشمەکانمان نیوەچڵ دەردەخەن، داخوازییە سەرەکییەکانمان سانسۆڕ دەکەن و یان لە ناوەرۆکی شۆڕشگێڕانە بەتاڵی دەکەن تا بتوانن بەدیلی خۆیان بە کورسی بنیشێنن. لایان وایە چاومان نابینێت و گۆێمان نابیستێت و ئاگامان لە هەوڵ و تەقەلای دەسەڵاتە ئیمپریالیستەکان نییە. چل و سێ ساڵ لەمەوبەر لە گوادلوپ، دوورگەیەک لە موستەعمەرەکانی فەڕانسە، خومەینییان دەستنیشان کرد و هێنایانە مەیدان و ئێستاش هەوڵ دەدەن بە “ئێران ئینترنەشناڵ، مەنۆتۆ و بی بی سی” و بە یارمەتیی فەرشگەردییەکان، بەدیلی خۆیان هەنگاو بە هەنگاو بێننە مەیدان و دایسەپێنن. هەر بۆیە سەیر نییە کە هەفتەی ڕابردوو یەکێک لە سێ دەستووری جەلەسەکانی دانیشتنی وەزیرانی دەرەوەی جی ٧ لە ئاڵمان، بارودۆخی ئێران بوو. قەیرانی وزە و شەڕی ئۆکراینیش دوو تەوەری دیکەی ئەم دانیشتنە بوو. هەر ئەوەیکە بارودۆخی ئێستای ئێران لە جەرگەی قەیرانە جیهانییەکاندا بەمجۆرە لەلایەن دەسەڵاتە ئیمپریالیستەکانەوە گرنگیی پێدەدرێت، وشیاریی زیاتر لە ئێمە دەخوازێت. پێویستە داخوازی، دروشم و ڕێکخراومان بە تەواو مانا سنووربەندیمان لەگەڵ ئەوانەی کە ملیۆنان مرۆڤیان کردووەتە کۆیلەی کاری مزدی، ڕوون و شەفاف نیشان بدات. سنووری ئێمە نابێ لەگەڵ سنووری ئەوانەی وا ژنانیان بۆ ڕازاندنەوەی کاڵاکانیان دوێت تێکەڵ بێت. ئاخێزی ئێمە مۆری ستەملێکراوانی ئەم کۆمەڵگەیەی پێوەیە. پاراستنی ڕەسەنایەتیی ئەم ئاخێزە لە ئەستۆی هەموو ئێمەیە کە ئامادەین تێیدا هەموو جۆرە فیداکارییەک بکەین.
تەلەڤیزیۆنی کۆمەڵە و حیزبی کۆمۆنیستی ئێران